YEKIKITHI AKINIU 4 - Sumi Naga CL (Re-edited) Bible (BSI)

Achineki lo Nhemgha

¹ Pa no alazayi kümlla khache lakhi akushulau aunhekipshe 30, akijelau aunhekipshe 30 eno akiqhelau aunhekipshe 15 mla.

² Pa no alazayi zütughuko aliho shi mla, ti ye akijelau aunhekipshe 15, akiqhelau aunhekipshe tsüni tüxa, eno aliho hokümxa aunhekipshe 45.

³ Tipa qhou apoxi julho no aunhekipshe 15 azütughuko homxa ghi shisü. Ti apoxiqo ye ajo kini shino abohu lo shisü puku.

⁴ Azütughuko ye amshitsü julho chighikini shou bepe qhi, küthü no ahuu jupuwo, küthü no kulola, küthü no apeu, eno küthü no kipelau jupuwo ghi qhie. Amshitsüqo ye agi no ashou juphepe qhie.

⁵ Azütughuko ye akishilau aulotikipshe bidi eno amtsü no ajukhu mütsü toi lapu xamunu pule akeu koghe lono mla, eno azü liter 60,000 ilolu kepu mlae.

⁶ Ti qhukimthe kepu chithakhu chighi mla, pungu no apeu küdau eno pungu no ahuu küdau qhi; hile no panongu pelo akipti kümlla lo peitha keqo qhuqhive peniye ke. Azütughuko ye achinemi pelo qhukimthelu peniye ke.

⁷ Pa no kughu püake toi, ameshoyi kulu kibepu chighi mlape achineki lo qhi, apeu no pungu eno ahuu no pungu qhive.

⁸ Pa no akibepu chighi mlape achineki lo qhi, apeu küdau pungu eno ahuu küdau pungu. Eno ameshoyi chithakhu 100 mla.

⁹ Pa no achinemi chebo mlatsü, eno khalau chebo ghi mla, acheboqo ghenguno ahukikha mla eno ahukikhaqo ye alazayi no küzüve.

¹⁰ Pa no azütughuko ye achineki apeu-kipelau ghove.

¹¹ Hiram no ali, sholepu, eno chithakhuqo mlae. Hiram no akükau Solomon ghenguno Ampeu ki shikeu lo akümla pa pülü keu kümtsü shikhave.

¹² Atsükucho kini,

¹³ atsükucho kütsüqa lo chopumloi kini ghokeu lo khaghatu mlakeu 400, ti ye ajo kini shi qhi, eno tino atsükucho kütsüqa lo chopumloi keu küzüve.

¹⁴ Pa no tuhakulu xugha mla, eno abohuqo tipa shou mlape qhi,

¹⁵ azütughuko eno tipau ghokepu amshitsü chighikini mlae.

¹⁶ Ali, sholepu, jilisa, eno Alhou kilo peithani keu nhemgha kümtsü Hiram no Akükau Solomon ghenguno nupheve keu alazayi no mlatsüe.

¹⁷ Akükau no alazayi hipaqo Jordan qa lo Succoth ngo Zeredah küma dolo ayeghi chhigha akeu lono süphe.

¹⁸ Solomon no thime hipaqo kütsasa shi mlae, kughengu alazayi kimshi ye mighiju moveke.

¹⁹ Ikehu Solomon no Alhou kilo abohu akeqo kümtsü mlae: ameshoyi kümlla khache, Alhou tsükeu sho kibepu,

²⁰ akulu kibepuqo, kughu tsükeu kiqi lono akimthe-a alou küiqü kepu ameshoyi kimthe no mlakeu kulubo;

²¹ axamunu, akulubo, eno ameshoyi kütsüghüu tsümtsaqo;

²² akulu fukipinhepu, abohuqo, axokütsüngü kiptibo, amikihepu, kümtsü ameshoyi no shikeu; eno Shishe Akimthe-a hukikha lo eno akümlla bocho khalau hukikha tsapayi kümtsü ameshoyi no mlae.