YEKIKITHI AKINIU 36 - Sumi Naga CL (Re-edited) Bible (BSI)

Judah Kükau Joahaz

¹ Aghakhumi no Josiah nu Jehoahaz kishepe Jerusalem lo akükau shivepe.

² Jehoahaz ye ampe muku küthü shi akelono ayepelu eno Jerusalem lono aqhi küthü ayepe.

³ Tishino Egypt kükau no pa kügha sawuve eno Judah ye ampe lo ghükayi ahu 34,000 eno ameshoyi ahu 34 ishi sükusho süqha tsüpeni keu shive.

⁴ Egypt kükau no pa thiküzüu Eliakim pesü Judah ngo Jerusalem kükau shivepe eno pa je pesü Jehoiakim ipi kukideve tsü. Ikemu Neco no pa thiküzüu Jehoahaz ye sasü Egypt lo wuve.

⁵ Jehoiakim ye ampe muku pungu shi akelono ayepelu eno Jerusalem lono ampe chighiqhaqhi ayepe. Pa ye pa puasüqo no shike toi Ampeu zülo kiu no axine keno shike.

⁶ Babylon kükau Nebuchadnezzar no pa sasü aghüshi eno ayikichhe no pa tshü sasü Babylon lo wuve.

⁷ Nebuchadnezzar no Ampeu kilo abohuqo hami pesü wuve eno Babylon lo pa kükaki lo qhive.

⁸ Jehoiakim kümla küghütha kütau, eno aphikümqhüpu kümla pa no shikeqo ngo pa shou ngukube keqo kümtsü Israel ngo Judah Kükami Kaku lo yepüani. Eno Pa nu Jehoiachin no pa thisü luve.

⁹ Jehoiachin ye ampe chighitache shi ake lono ayepelu eno Jerusalem lono aqhi küthü no atsala chighi ayepe. Pa ye Ampeu zülo kiu no axine keno shike.

¹⁰ Tipa mpe lo tsülü tusho lono akükau Nebuchadnezzar no pa pesü akughumi shi Babylon lo sawuve eno pa gholono Ampeu kilo akughupu bohuqo ghi pesü wuve. Jehoiachin thiküzüu Zedekiah pesü Judah ngo Jerusalem lo akükau shive.

¹¹ Zedekiah ye ampe muku lakhi shi akelono Judah ayepelu eno Jerusalem lono ampe chighiqhaqhi ayepe.

¹² Pa ye Ampeu zülo kiu no axine keno kümtsü shike. Pa ye tungkupu Jeremiah khuu Ampeu tsa piche keno pa zülo kuchuni moe.

¹³ Pa no akükau Nebuchadnezzar khuu no pa pelo Alhou je lono ashoqhi shipe keno, pa ghi hebide ke. Pa ye ighono kuthovi auve eno Ampeu Israel Lhou lau pa mlo tsümove.

¹⁴ Tipa shouno achinemi gholo hiyampemi eno timiqo kümtsü shiye kütami no aphikümqhüpu shiche keqo pape wuve eno akumou pükhükümla shive. Ampeu no Jerusalem lo Pa ki shikimthe tsükeu panongu no shipixive.

¹⁵ Ampeu, pano puasü Lhou no Pa tsapemi ide-ide panongu lau puwu, kughengu Pa ye Paw timiqo eno Pa chineki kimiyeqhiyi cheke.

¹⁶ Ikemu panongu no Alhou tsapemi thaigha, eno Ampeu loghu no panongu shou ikughi moke kutolo eno ti küghüqü luni keu kühave moke kutolo, Pa tsa jukünatha eno Paw tungkupmi junuqhi ke.

Jerusalem Leluve no Pitive

¹⁷ Tighenguno Ampeu no Chaldeami kükau pelo panoqo levepe eno panow apumiqo akimthea lono ghiqhive tsü, apumi na ilimi na kiteküsümi namu, khumu küpümoe. Ampeu no kümtsü pa u lo süvetsü.

¹⁸ Alhou kilo abohuqo kije aghulo, Ampeu kilo akini pekütsü püakeqo, akükau ngo sakiphemi kini pekütsü püakeqo kümtsü pa no Babylon lo pewuve.

¹⁹ Panongu no Alhou ki pitive tsü, Jerusalem liwo hepholeve tsü, kükaki ngo akughupu bohu kümtsü pitive tsü.

²⁰ Khunoqo azütakikihi lono pokalu keno, tipaqo kümtsü pa no hakiphi sawuve, eno Persia kükaqha ipeghi moke kutolo panongu pesü pa ngo pa nuli qemi shivepe.

²¹ Ampeu no tungkupu Jeremiah vecheo pi püakeu shikupu ghi ampe lhotsüni kupu moke kutolo, aghakhu no Sabbath kulhokiqhi ithulue; pighive keu do kupuju yenguyive.

Cyrus Shekushu

²² Persia kükau Cyrus yepe mpe atüghüu lo Ampeu no tungkupu Jeremiah vecheo pi püakeu shipuku niye Pa no Cyrus mlo peitha püzü pa kükaqha lo sheshu eno akiye lo ghi ishi yeve:

²³ “Persia kükau Cyrus no ishi piani, ‘Ampeu, Kungugha Lhou no ayeghi lo kükaqha kümtsü I tsüvae, eno Pa no Judah lo Jerusalem lo Pa chineki shiqhe peni keu za I tsü ani. Tighenguno nongu khunoqo Paw timiqo keno Ampeu Alhou no pa gholo apeniu. Pa ye wolu nani.’”