YEKIKITHI AKINIU 35 - Sumi Naga CL (Re-edited) Bible (BSI)

Josiah no Hechekulu Ikhilu

¹ Josiah no Jerusalem lono Ampeu lau Hechekulu Ghulhu ikhilu. Panongu no aqhi atüghüu atsala chighiabidiu lono Hechekulu mbe heqhi.

² Pa no achinemi pesü panow hiyam lo süsü eno Ampeu kilo huthu penike panongu shikumto.

³ Levimi khunono Israelmi shika eno Ampeu lau akimthe shicheni keno, tipaqo vilo pa no pi, “Akimthe puloshoqhi bohu ye David nu Israel kükau Solomon no shikeu kilo qhivelo. Nongu ye abighi lono peche kelau kumoae. Itehi nongu ye Ampeu nongu Lhou eno Paw timi Israelmi huthulo.

⁴ Nongu ye Israel kükau David ngo pa nu Solomon no akiye shipe kichetsü ketoi no limi kiqi lono amqo kijepe kutolulo.

⁵ Eno achinemi kumomi no thiküzümi ali kiqi lono, eno Levimi no alimi kiqi lono kije püake toi Akimthe-a lo puthugho lo.

⁶ Tishino Hechekulu mbe ghiqhi no nongu ampi kishekimthe lo, eno Ampeu no Moses vecheo azah tsükeu kiqi lono no thiküzümi ghenguno kutolo.”

⁷ Josiah no achinemi kumomi ghenguno Hechekulu kümllagho shi ambe ngo ane 30,000 eno amshitsü 3,000 ikhiphetsü; hipaqo ye akükauw lhoxü loji lono tsüe.

⁸ Paw hiyampemi ghi puloniqhiyi timiqo, achinemi, eno Levimi lau hitoi shi küqha sütsü; Hilkiah, Zechariah eno Jehiel, Alhou chineki lo atomi hipaqo no ambeti ngo aneti 2,600 eno amshitsü 300 pesü achinemi lau Hechekulu kümllagho shi tsüe.

⁹ Levimi shou atomi Conaniah, eno Shemaiah ngo pa thiküzüu Nethanel, eno Hashabiah, Jeiel, ngo Jozabad no ambeti ngo aneti 5,000 eno amshitsü 500 pesü Hechekulu kümllagho shi Levimi tsüe.

¹⁰ Kughou ahoho ghenguno thokha kutove keno, akükau zakütsü lono achinemi no pano-a lo ngove eno Levimi ghi pano mqo lo ngove.

¹¹ Tishino panongu no Hechekulu mbe ghiqhi no achinemi no aji mighelu keu pesü küzüte, eno Levimi no lhoxüqo yiko lha.

¹² Tithiu panongu no Moses Kaku lo yepüake toi achinemi kumomi pelo Ampeu mlla penike akipti kümllagho kothape ali kiqi lono amqo kije püakeqo kijetsü. Panongu no amshitsüqo ghi tishive.

¹³ Ayezah kiqi lono panongu no Hechekulu mbe ami lono ghuve; eno akimthe kümllagho no aliqo lono lhoqhi no mtazü timiqo lau pewu.

¹⁴ Tithiu panongu no pano sala ngo achinemi sala kuto, kughengu Aaron nuli achinemi ye putho kutolo akipti kümllagho ngo atha piti mlla ae. Ikehu Levimi no pano sala ngo Aaron nuli achinemi sala kutoke.

¹⁵ David zakütsü kiqi lono Asaph limi alephemi, Asaph, Heman, eno akükauw tungkupu Jeduthun ye pütüta-a lo ngoe; eno khagho khemi no khaghoqo lo ngoke. Panongu ye pano kümla qhikepu shimoe kughengu pano thiküzümi Levimi no panongu ghenguno kuto tsüke.

¹⁶ Titoi Akükau Josiah zakütsü lono Hechekulu Ghulhu ikhilu nike eno Ampeu kümlla khache lo akipti kümllagho tsünike tipa tsala lono Ampeu lau hukuthu kümla shikepu thokha kutove.

¹⁷ Israelmi tile akemi kümtsü tipau tüqhüdo lono Hechekulu pini eno Kholaqhi sümokeu Sho atsala tsüni ikhilue.

¹⁸ Kughengu tungkupu Samuel ghuloki lo kumo aye, khilemu Hechekulu Ghulhu hitoi pini mphie. Israel kükami khunomu Josiah eno achinemi ngo Levimi, Judah ngo Israel timi tile ighi keqo eno Jerusalem lo küami no Hechekulu Ghulhu ikhilu ketoi ikhilu moe.

¹⁹ Josiah yepe mpe chighiakütacheu lono Hechekulu Ghulhu hipau ikhilue.

Aghüshi lono Josiah Thive

²⁰ Josiah no achine kilo thokha kutope qhive kethiu, Egypt kükau Neco no Euphrates lo Carchemish lono aghü shinike wue, Josiah no pa sasü kushoni ke wu.

²¹ Ikemu Neco no Josiah lau asütsa ishi pi puwu, “Nikujo dolo kiu shikepu ani kea, O Judah kükau? Ishi tsala hipau lo ni ye o mjonike chemoe, ikemu I sasü aghüshi akemi kumjoni ke cheni. Eno Alhou no I vilo mtazü lopi azah tsüke. Ikehu no ye Alhou khuu I gholo cheni keno, Pa lachile kevilo, tikumo aye Pa no o kütsave nosae.”

²² Ikeghi Josiah no idewo move, eno pa ju kilive no aghü shinike wuve. Pa no Alhou tsa Neco no pikeu inimo no aghü shiniye Megiddo qa yeghi lo ighi.

²³ Ikelo apiji kipemi no akükau Josiah chheve. Tileno akükau no pa qemi vilo pi, “I sasü wuve lo, kughengu ni ye zaghishi izavae.”

²⁴ Ikehu pa qemi no khurkulu lono pa khapesü paw khurkulu akiniu lo süve no xapusü Jerusalem lo wuve. Tilauno pa ye thive eno pa puasüqo kumoki lo qhove. Judah ngo Jerusalem lo akemi kümtsü no Josiah ghenguno mloqa.

²⁵ Jeremiah ghi Josiah ghenguno akumlo le phe tsüe; ishi kutolo alephemi kiptimi eno totimi no akumlo le lono Josiah ghili picheni.

²⁶ Josiah kümla küghütha kütau, eno Ampeu Yezah kiqi lono pa no akümla kivi shikeqo,

²⁷ eno pa kümla kümtsü, abothu lono ashekha kutolo Israel ngo Judah Kükami Kaku lo yepüani.