YEKIKITHI AKINIU 34 - Sumi Naga CL (Re-edited) Bible (BSI)

Josiah no Judah lo Kalu

¹ Josiah ye ampe tache shi akelono ayepelu eno Jerusalem lono ampe shighi lakhi ayepe.

² Pa ye Ampeu zülo kiu no achipi keno shike eno pa sü David no shikeu thokha shino piyiumu ajeumu tsüghü wuve moe.

³ Kughengu pa yepe mpe akütacheu lo, ti ye apulhothe shi aphi lono, pa ye pa sü David Lhou mllauve, eno ampe chighiakiniu loye pa no Jerusalem ngo Judah lo qhemghaike-a, Asherim, küxütha keu julho, eno ayi julhoqo kütsave tsü.

⁴ Panongu no pa zülono Baal kümlla khacheqo loqhive tsü, axokütsüngü kiptiaqo hephove tsü, Asherah julho ngo kütau asüatu julho kümtsü mukhumuno shivetsü. Pa no Asherim julho, küxütha keu julho, eno ayi julhoqo atachu shi kubove tsüno pesü tipaqo mlla chekemi kumo shou vepukuve.

⁵ Pa no achinemi saghiqo ghi tipaqo kiptia lono pitive tsüno Judah ngo Jerusalem akimthe shipe qhive.

⁶ Manasseh, Ephraim, Simeon, Naphtali kutolo, eno kütsakungo püakeu mishighüna kümtsü lo,

⁷ pa no Israel ghakhu kümtsü lo akümlla-khacheqo hepholeve tsü, Asherim ngo ajulhoqo mukhumuno shive tsü, eno axokütsüngü kiptiaqo tulave tsü. Tishino pa no Jerusalem lo ideighi.

Ayezah Kaku Phulu

⁸ Josiah yepe mpe chighiakütacheu lo, ti ye pa no aghakhu ngo achineki shikimthe luve kethiu, pa no Azaliah nu Shaphan ngo Maaseiah mishighüna lo angh, eno Joahaz nu yekikithiu Joah, ishi Ampeu pa Lhou ki pukho kithe penike puwu.

⁹ Panongu no achinetou Hilkiah lau ighi no Ampeu ki kulaghi lo abohu khemi Levimi no Manasseh ngo Ephraim eno Israelmi ghükulumi, ti ye Judah, Benjamin, eno Jerusalem lo akemi launo qhakütsülu keu pisa pesü pa tsüve.

¹⁰ Panongu no Ampeu ki shikithe akeu lo akümlami tsüve. Akümlami no pukho kithe eno shikithe keu lo peitha.

¹¹ Panongu no asü kümlami ngo aki kishimi pelo hekütha tu ngo asüpa eno Judah kükami no pümave tsükeqo lo sünike akika qhü penike aki kishimi tsüve.

¹² Timiqo no amikucho shi akümla shi; tipaqo jukütsü penike Levimi Merari li lono Jahath ngo Obadiah, eno Kohath li lono Zechariah ngo Meshullam süsüve. Levimi khunoqo alebo kipe lo shitsa keno,

¹³ panongu no akho kupumi ngo kütau kümla jeli kümtsü shou jukütsüpe, eno Levimi dolo khami no yekikithimi, hiyampemi eno khagho khemi shipe.

¹⁴ Panongu no Ampeu kilo peiloghi keu pisa pesü ipeche kelono, achineu Hilkiah no Moses vecheo tsükeu Ampeu Yezah Kaku ithulu.

¹⁵ Tileno Hilkiah no Shaphan vilo pi, “I no Ampeu ki lono Ayezah Kaku ithulue.” Hilkiah no kaku pesü Shaphan tsüve.

¹⁶ Shaphan no akükau lau kaku peighi eno pi, “Nono o qemi lau pichebe keu thokha panongu no shi ani.

¹⁷ Panongu no Ampeu kilo pisa aghi keu kümtsü pesü jukükütsümi ngo akümlami tsüvae.”

¹⁸ Tishino Shaphan akiyeu no akükau vilo pi, “Achinetou Hilkiah no kaku hipau I tsüe.” Eno Shaphan no akükau zülono phisü.

¹⁹ Kughou akükau no Ayezah tsa chilu keno, pa phi süxüve.

²⁰ Pa no Hilkiah, Shaphan nu Ahikam, Micaiah nu Abdon, Shaphan akiyeu, eno akükau qeu Asaiah, vilo azah tsü,

²¹ “Wulo, eno kaku hipau lo yepüa keu kiqi lono I ghenguno eno Israel ngo Judah lo akeqo ghenguno Ampeu pütsa julo. Ampeu ye ningu lau shishe aloghu ide ani, kughengu ni puasüqo no kaku hipau lo shilo pikeu pape move ke.”

Huldah Mhekiqi Tungkuptsa

²² Tileno achinetou Hilkiah ngo akükau no puwu keqo no achineki lo tiphimini jukükütsüu Hasrah nu Tikvah nu Shallum nipu Huldah tungkupliu, lau wuno li sasü küptsa (li ye Jerusalem lo asa akiniu lo ache).

²³ Li no panongu vilo pi, “Ampeu Israel Lhou no ishi piani: ‘Nongu hape I lau puwu keu timi vilo pilo,

²⁴ Ampeu no ishi piani, Julo, I no a-a hipau lo eno xüküami lau kütsakungo süghini cheni, eno kaku hipau lo ghukusho tsa yepüa keqo kiu Judah kükau zülo phisüve akeno kümtsü shikupu nani.

²⁵ Kughengu panongu no I milive eno pano kümla küghütha vecheo I mlo shikighide tsüniye kütau lhouqo lau akümllagho tsüe, tighenguno I loghu ye a-a hipau shou ikughi nani eno ti ye iqüvemo nani.

²⁶ Ikemu Judah kükau khuu no Ampeu lau ighijuni ke nongu pesü I lau puwu keno, pa vilo ishi pilo, Nono chiluve keqo tsa vehulo Ampeu Israel Lhou no ishi piani,

²⁷ aphughi hipau eno hile xüküami shou Ampeu no pikeu tsaqo nono chilu kelo, nono kuchunipe o phimini süxü no I zülo mloqa keu Ni ghi chiluvae, ipi Ampeu no sheshu ani.

²⁸ Ikehu julo, I no o puasüqo gholo o hekütsüve nani eno no ye aloino o kumo lo ilo nani, o nhethi ye I no a-a hipau shou kütsakungo süghi niye akeu ithulumo nani.’” Panongu no akükau lau atsa hipau pesü ideighi.

²⁹ Tileno akükau no Judah ngo Jerusalem lo sakiphemi kukütsü.

³⁰ Akükau no pa gholo Judah ngo Jerusalem lo xüküami kümtsü, achinemi, tungkupmi, eno kije kitilami kümtsü sasü Ampeu kilo wue. Ampeu ki lono Puloshoqhi Kaku ithulu keu lo yepüa keu tsaqo pa no kümtsü zülono phisü.

³¹ Akükau no puthugho no pa mlo eno pa ngulho kuchopu no Ampeu papeni ke, eno Pa zakütsü, akhuaye eno pimheyeqo gholuni ke, Ampeu zülo puloshoqhi shi, eno puloshoqhi kaku lo yepüa keu tsaqo pekupu nike piqhi.

³² Tishino pa no Jerusalem lo küami ngo Benjaminmi kümtsü pelo puloshoqhi shipe. Jerusalem lo küami no pano puasü Lhou lau puloshoqhi shikeu kiqi lono xüe.

³³ Josiah no Israelmi ghakhu lono aphikümqhüpu thime kümtsü kütsaleve eno Israelmi kümtsü pelo Ampeu pano Lhou huthupe. Pa küxü tivilo panongu ye Ampeu pano puasü Lhou launo tsüghüve moe.