YEKIKITHI AKINIU 33 - Sumi Naga CL (Re-edited) Bible (BSI)

Judah Kükau Manasseh

¹ Manasseh ye ampe chighikini shi akelono ayepelu eno Jerusalem lono ampe lhopungu pungu ayepe.

² Israelmi zülono Ampeu no shiye hapheve keqo no aphikümqhüpu khuaye pepimhe chekeu, pa no tipaqo pape kelono pa ye Ampeu zülo axine shive.

³ Kughengu pa pu Hezekiah no qhemghaike-a kütsave tsükeqo pa no shikitheve, Baal kümlla-a mla, Asherah julho mla, eno aqhi-ayepu kümtsü mllae.

⁴ Ampeu ki khile Pa no, “I je ye alholo Jerusalem lo anani,” ipi keno, tilehi Manasseh no akümlla-khacheqo mlave.

⁵ Pa no Ampeu ki khala kini lo aqhi-ayepuqo mlla kepu akümlla khache mla.

⁶ Pa nuli küghape Hinnom Nu Khila lono piti mlla, eno asakiqhi, küdüu, asheazü tsa kipimi, tumumi, eno kithixashemi peitha. Ampeu zülo shishe axine shikeu lono pa no Ampeu mlo shikighide tsü.

⁷ Pa no ajulho mlape Ampeu kilo qhi, tipa ki vehulo Pa no David ngo pa nu Solomon vilo pi, “Israel shiaye kümtsü dolono I no kishelu keu, aki hipau lo eno Jerusalem lo, I no I je pesü alhokupuju ghenguno qhi nani,

⁸ Israelmi no I zakütsü eno I no I qeu Moses tsükeu Yezah kümtsü pelu aye, I no pano puasü tsükeu yeghi lono khalau panoqo puwuve monani.”

⁹ Ikemu Israelmi zülono Ampeu no shiye kütsave keqo no shiche keu nguno aküsau Manasseh no panongu sawo axine shivepe.

Manasseh no Xaide

¹⁰ Ampeu no Manasseh ngo paw timiqo lau kütüghü puwu kemu panongu no ini tsümoe.

¹¹ Tighenguno Ampeu no Assyria ghüshimi shou zatsümi pelo Judah levepe eno akuhoyi pesü Manasseh fuluve no alazayi kichhe no pa tshüpe Babylon lo wuvepe.

¹² Kughou pa no aghime lo akeno, Ampeu pa Lhou lau akukuphu khu eno pa puasü Lhou zülo kuchunive.

¹³ Pa no Alhou lau inikhu, eno pa kighini no Alhou mlo buve no Pa no itaghi Jerusalem lo pa kükaqha lo sachile ighive. Tileno Manasseh no Ampeu ye Alhou kepi ithive.

¹⁴ Tithiu Gihon kulolau akhila lo David phughi ghenguno eno Akha Khagho ghenguno Ophel homxa ghi pa no khalau kupuwu shishe qhemghai shiqheve. Pa no ghüshimi zatsümi pesü Judah lo aliwo kumto mishighüna kümtsü lo qhive.

¹⁵ Pa no Ampeu ki lono inaghami lhouqo ngo ajulho ikhive, eno Ampeu ki naghuto lo ngo Jerusalem lo akiptia pa no shikeqo kümtsü aphughi khalau peve.

¹⁶ Pa no Ampeu kümlla khache ghi süsü kitheve eno tileno külakishi kümllagho ngo shikimthi kümllagho pesü aghashi, eno Judahmi kümtsü Ampeu Israel Lhou huthulo pi azah tsü.

¹⁷ Timiqo no qhemghaike-a lono aghashi kemu Ampeu pano Lhou lau likhi shike.

¹⁸ Manasseh kümla küghütha kütau, pa Lhou lau pa kighini, eno tungkupmi khunono Ampeu Israel Lhou je lono pa pütsa keno, tipaqo ye Israelmi Kükami Yekikithi Kaku lo yepüani.

¹⁹ Pa kighini no kishi Alhou buve keno, pa xine, pa küpülü küküha, eno pa ampi kuchuni mphi züu pa no a-a khipaqo lo qhemghaike-a shiqhe no Asherim ngo ajulho mlape qhi keno, tipaqo ye Tungkupmi Yekikithi kaku lo yepüani.

²⁰ Tishino Manasseh ye pa puasüqo gholo zühuve eno panongu no pa kilo shiqhove, eno pa nu Amon no pa thisü luve.

Amon no Judah lo Kalu

²¹ Amon ye ampe muku kini shi akelono ayepelu eno Jerusalem lono ampe kini ayepe.

²² Pa pu Manasseh toi, pa ye Ampeu zülo kiu no axine keno shike. Amon ye pa pu no ajulho mla keqo kümtsü lau aghashi eno tipaqo mllae.

²³ Pa pu Manasseh no kuchuni ketoi mono pa ye Ampeu lau pa shikuchuni moe, ikemu Amon hipau ye alau-alau akipimi shi auve.

²⁴ Amon qemi no pa shou küsüqeve no pa kükaki lono pithive.

²⁵ Ikemu aghakhu lo timiqo no akükau shou küsüqe kemi kümtsü pithive, eno timiqo no pa nu Josiah pesü pa thisü luvepe.