YEKIKITHI AKINIU 31 - Sumi Naga CL (Re-edited) Bible (BSI)

Achinemi Shikikithe

¹ Hi kümtsü tave kethiu, tile ighi kemi Israelmi kümtsü no Judah, Benjamin, eno Ephraim ngo Manasseh mishighünaqo lo wuno atsükucho hepholeve, Asherim loqhive eno qhemghaike-a ngo akümlla-khache kümtsü hephove. Ti kümtsü hephove kethiu no Israelmi no pütüta kilo idewove.

² Hezekiah no akümlapu kiqi lono achinemi ngo Levimi amqo-amqo shi akikithi shitsü, ti ye akipti kümllagho ngo külakishi kümllagho tsüni kemi, Ampeu ghazü khagho lo huthu, shikimthi eno akishe le pheni kemi kijeve tsü.

³ Akükau no qhasü tsükeu ye paw lüthü lono akipti kümllagho ghenguno: ti ye ina kijili akipti kümllagho, Sabbath, aqhi kithe lo akipti kümllagho, eno Ampeu Yezah kiqi lono ampe lo tiqhetini ghenguno ke.

⁴ Hezekiah no Jerusalem lo küami vilo achinemi ngo Levimi saje tsülopi azah tsü, tishianguno panongu pelo amlo tsüqhiyi Ampeu Yezah lono mla peniye ke.

⁵ Akükau no aqha lo azah tsüve kemtsa Israelmi no ghile amsüu athi, atsaizü, thazü, akhingozü, eno alu lo pekighi jeli kupukuno shi tsü. Panongu no thokha lo chighi saje kupukuno shi süghie.

⁶ Judah mishighüna lo Judahmi eno Israelmi akemi kümtsü no amishi ngo ambe chighi saje tsü, eno Ampeu pano Lhou lau ikhiphetsü keu chighi saje pewo amoqhe tsü.

⁷ Tipaqo ye aqhi aküthüu lono ghekütsü thu kelo aqhi akütsüniu lono kütsü qhilue.

⁸ Akükau Hezekiah ngo paw kijemi no ghekütsü püakeu ithulu kelo Ampeu sheqhe eno Israel kümgha tsü.

⁹ Hezekiah no agho tipaqo ghenguno achinemi ngo Levimi pütsae.

¹⁰ Zadok limi achinetou Azariah no pa vilo pi, “Timiqo no Ampeu kilo agho süghi thuke ningu ye chu ani eno lukümkha shino achili ghi shive ani, kughengu Ampeu no Paw timiqo kümgha tsü kehu ningu ye hijeje achili ipeghi ani.”

¹¹ Tileno Hezekiah no Ampeu kilo acheboqo kuto lopi azah tsü kelo panongu no kutove.

¹² Panongu no amikucho shi tüqhatüzü eno chighi saje ngo Alhou lau ikhiphe tsü keqo kümtsü tile hekütsü. Tipaqo shou atou ye Levimi Conaniah eno pa thiküzüu Shimei no pa shelo atou shie.

¹³ Akükau Hezekiah ngo Ampeu kilo atou Azariah pama no timi hipaqo pelo Conaniah ngo pa thiküzüu Shimei kukuphumi shi penike süsüve, Jehiel, Azaziah, Nahath, Asahel, Jerimoth, Jozabad, Eliel, Ismakhiah, Mahath, eno Benaiah.

¹⁴ Levimi Imna nu Kore, kipela khagho kheu no Alhou lau pulokini gho, Ampeu ghenguno kotha keu kümllagho kijeni keu, eno shishe akimthe kümllagho shou ampi shie.

¹⁵ Eno Eden, Miniamin, Jeshua, Shemaiah, Amariah, eno Shecaniah no amikucho shi pa kuphu no achinemi mishighünaqo lo wuno achipi lono pano thiküzümi amqo kiqi lono, kichi-iti aphiphi lono thokha kije tsü.

¹⁶ Tinguno alau laghaphi lo kiptimi ampe küthü nguno kunguu aje akeqo, pütüta kümla eno amqo kiqi lono Ampeu kilo tsala kipe kümla jeli shinike iloche kemi kümtsü kije tsü.

¹⁷ Achinemi ye pano li kiqi lono kihiküsü shi; Levimi ye ampe muku nguno kunguu shive keqo pano kümla eno amqo kikije kiqi lono kihiküsü shi.

¹⁸ Panongu ye pano tianuli ayitiu lono akichiu eno anipuqo kümtsü kihiküsü shi, kughengu panongu ye amikucho lono pano pesü akimthe shike.

¹⁹ Aaron nuli achinemi, mishighüna lo aqoaho yeghi lo küghüna akeqo ghengu ye, mishighüna kutomo lo timi khami ajuaje kuphe no süküsü shino tipaqo pelo kihiküsü lo akemi achinemi kiptimi thaqhü lau asaje kijetsü penike pichetsü, tihutoi Levimi lau ghi tishipe.

²⁰ Hezekiah no Judah qha kümtsü lo hitoi shive, Ampeu pa Lhou zülo kiu no akivi, achipi eno pükhübekulu keno pa no shike.

²¹ Eno Alhou ki ghenguno pa no ayezah lo akeu kiqi lono, pa Lhou phuno akümla shikeu kümtsü, pa mlo kuchopu pesü shino ikoishe lue.