YEKIKITHI AKINIU 30 - Sumi Naga CL (Re-edited) Bible (BSI)

Hechekulu Ghulhu Pini

¹ Hezekiah no Israel ngo Judah kümtsü lau asütsa pi puwu, eno Ephraim ngo Manasseh shiaye lau yesü yepuwu no Ampeu Israel Lhou lau Hechekulu Ghulhu ikhiluni ke Jerusalem lo Ampeu kilo ighi lopi kue.

² Akükau ngo paw hiyampemi eno Jerusalem lo ampemi kümtsü no küptsa no aqhi akiniu lo Hechekulu Ghulhu ikhiluni keu shike,

³ panongu ye ado achipi lono ikhilu mlave, kughengu achinemi kishekimtheve kemi no lukümkha shimono ae, eno timiqo ghi Jerusalem lo hekütsü mlano ake.

⁴ Ikehu akukughu hipau ye akükau ngo ahohomi kümtsü no achipi shi kümsü luve.

⁵ Tighenguno panongu no Israel kümtsü pikülha nike xathave, ti ye Beersheba lono Dan kutolo timiqo no Jerusalem lo ighi no Ampeu Israel Lhou lau Hechekulu Ghulhu ikhiluni keu shi, kughengu panongu ye akhuaye pemla no ighive ke.

⁶ Ikehu yesü kipemi no Israel ngo Judah kümtsü lo akükau ngo paw hiyampemi yesü pewu no akükau no azah tsüke toi pi, “O Israelmi, Abraham, Isaac, eno Israel Lhou Ampeu lau ideighi lo, tishino Pa no nongu Assyria kükau u lono pojolu kemi ghükulumi lau tsüghü ighi nani.

⁷ Nongu ye no puasü eno no thiküzümi no Ampeu Alhou lau amikucho shimove ketoi kevilo, kughengu nongu no ithulu anike Pa no panongu pighive ke.

⁸ Itehi no puasüqo toi kuthovi kevilo, ikemu nongu pesü Ampeu tsüve lo eno Pa kimthe khache, khikhi Pa no alholo ghenguno shikimtheve akeno, tile ighi lo eno Ampeu nongu Lhou huthu lo, tishianguno nongu launo Pa loghu tsüghüve nani.

⁹ Nongu no Ampeu lau xaide aye, no thiküzümi eno atianuli ye pano küghaluve kemi no kimiyeve no aghakhu hipau lo ideighive nani. Kughengu Ampeu nongu Lhou ye küpükini eno kimiyekini, eno nongu no Pa lau xaide aye, Pa ye nongu launo Pa gi tsüghüve monani.”

¹⁰ Ikehu yesü kipemi no Ephraim ngo Manasseh mishighüna lakhi lono lakhi lo eno Zebulun kutolo wu, ikemu timiqo no panongu junuqhi eno thaigha.

¹¹ Tishimu Asher ngo Manasseh eno Zebulun laghami khami ye kuchunive no Jerusalem lo ighi.

¹² Alhou no Judah timi pelo amlo lakhi shino akükau ngo paw hiyampemi Ampeu tsa ikhilu penike akümla shive.

¹³ Aqhi akiniu lo Kholaqhi Sümokeu Ghulhu ikhilu nike ghenguno Jerusalem lo timi kütsasa kumqolu.

¹⁴ Panongu no akümla shithu eno Jerusalem lo ajulho kümlla khache kümtsü ikhive eno axokütsüngü kiptia ikhipe Kidron Khila lo peve.

¹⁵ Panongu no aqhi akiniu atsala chighiabidiu lo Hechekulu ghenguno ambe heqhi. Achinemi ngo Levimi ye mithe mlano akehu kujove no panongu ampi shikimtheve no tithiu no akipti kümllagho pesü Ampeu kilo iloghi.

¹⁶ Panongu no Moses Yezah kiqi lono pütüta-a lo ngove eno achinemi no Levimi no aji tsükeu pesü lepuku.

¹⁷ Ti kumqo akeqo gholo kutomo no pano shikimthe mono ae. Tighenguno Levimi no mithemo kemi kümtsü ghenguno Hechekulu mbe heqhipe Ampeu tsü masave.

¹⁸ Kughengu timi aghiu, akhoto no Ephraim, Manasseh, Issachar, eno Zebulun laghami kutomo no mithemo no ighi, ikeghi akhuaye veche ghi Hechekulu ghulhu chuve. Ikemu Hezekiah no panongu ghenguno inikhu tsü, “Ampeu akiviu no kümtsü kipimi qhitsü peni,

¹⁹ pa no akimthea khuaye kiqi lono mithe move namu, pa no amlo tsüno Ampeu Alhou, pa puasüqo Lhou phu aye, Ampeu no akipimi qhitsü peniu.”

²⁰ Ampeu no Hezekiah kighini chilu tsüno timiqo shipivi.

²¹ Atsala tsüni kutolo Jerusalem lo timi akeqo no Kholaqhi Sümokeu Ghulhu alokivi kije lono ikhilu eno ghulo atsütsü Levimi ngo achinemi no pano küka kumto lono Ampeu sheqhe.

²² Levimi no shitsa shi Ampeu huthuke ghenguno Hezekiah no panoqo shikumto tsü. Panongu no atsala tsüni aghulhu shi, külakishi kümllagho tsü eno Ampeu pano puasü Lhou shikimthi tsüe.

²³ Tishino ahohomi kümtsü no amlo lakhi lono itaghi atsala tsüni pinini keu shi pulove. Ikehu panongu no alokivi shi itaghi atsala tsüni pinive.

²⁴ Judah kükau Hezekiah no akümllagho ghenguno ahohomi amshitsü 1,000 eno ambe 7,000 tsü, eno hiyampemi no amshitsü 1,000 eno ambe 10,000 tsü. Achinemi kutomo no pano kishekimthelu.

²⁵ Judah lo kumqo kemi kümtsü, achinemi ngo Levimi, Israel lono ighi kemi kümtsü, inaghami Israel lono ipeghi kemi, eno inaghami Judah lo xüakemi kümtsü no alokivi shike.

²⁶ Ikehu Jerusalem lo alokivi kije shi, kughengu hikithipu ye David nu akükau Solomon ghuloki thiu ye khilemu shimphi ke.

²⁷ Tishino achinemi ngo Levimi no ithu no timiqo kümghatsü kelo Alhou no panongu sütsa chilu tsü, eno panongu kighini ye kungugha lo Alhou kungoa tove.