YEKIKITHI AKINIU 3 - Sumi Naga CL (Re-edited) Bible (BSI)

Solomon no Achineki Mla

¹ Tishino Solomon no Jerusalem lo Moriah Toghi, khile Ampeu no papu David lau ipeghi no David no ti kichepüa keno, tile Ampeu ki shiqhe thuve, tipa-a ye Jebusimi Ornan niqa ke.

² Pa küka mpe abidiu, aqhi akiniu lono aki shithue.

³ Solomon no Ampeu ki shiqhe keu ye akimghi hitoi: akimghi thosülo aqau peitha chekeu kiqilo, akushulau aunhekipshe 90 eno akijelau aunhekipshe 30.

⁴ Akulaghi lo achebo ye akushulau aunhekipshe 30, ti ye akijelau pahi, eno agizüu aunhekipshe 30 thonhei ke eno akiqhelau aunhekipshe 180. Pa no tipau alou ameshoyi thakütsüghüve keu no kümtsü küzüve.

⁵ Akümlla chebo loye pa no asahusü no kithipe dave no ameshoyi kivi no küzüve, tipa shou amsabo julho ngo ayikichhe shisü.

⁶ Aki kümtsü akughupu tu pesü jukivipu shi qhino Parvaim yeghi lono süghi keu ameshoyi akiviu pesü mla.

⁷ Pa no ameshoyi pesü aki küzüe—akhetsü kucho, akikhasü, atozü, eno ahukikha, pa no atozüqo lo cherubim shisüpe qhie.

⁸ Pa no Shishe Akimthe-a mlae. Akushulau ye aki akijelau qhemi ti ye aunhekipshe 30 eno akijelau ghi aunhekipshe 30. Ti kümtsü ameshoyi akiviu ahu 20,400 pesü küzüve.

⁹ Ameshoyi ahu tüxa toike qhemi pesü ayishu lakhikhi shi. Eno kunguu chebo ghi ameshoyi pesü küzüve.

¹⁰ Shishe Akimthe-a lo, pa no cherubim kini asü no mla eno ameshoyi no küzüve.

¹¹ Cherubim chishibo küma sükho keu kimghi ye aunhekipshe 30; achishibo lakhikhi no aunhekipshe tsüni tüxa, tino aki kuchughi tozü kutolo chope qhi, eno achishibo tüxau no cherub lakhiu chishibo sasü kuchope qhie.

¹² Cherub lakhiu chishibo ghi aunhekipshe tsüni tüxa, eno tino aki kuchughi tozü kutolo chope qhi, achishibo tüxau no cherub atüghüu chishibo sasü kuchope qhie.

¹³ Cherubim chishiboqo ye aunhekipshe 30 eno cherubim küma ye puthughope akümlla chebo küdau jughi qhie.

¹⁴ Pa no tsülabei, hughai, hughüi, eno amekusho phi pesü nhaqhiphi mla, eno tile cherubim shisüpe qhie.

¹⁵ Pa no aki gizüu atsükucho kini mla, akiqhelau aunhekipshe 50, eno tiküma kütsüqa lo aunhekipshe tsüni tüxa no ghokünape qhi.

¹⁶ Pa no achi toike ayikichhe mlano tipaqo pesü atsükucho kütsüqa lo qhi, eno itaghi khaghatu aqhe mlape ayikichhe lo qhie.

¹⁷ Atsükucho tiküma ye achineki zülo, lakhi no apeu eno lakhiu no ahuu ishi ghope qhi; ti apeu akeu je pesü Jachin, eno ahuu je no Boaz ipi kuvetsü.