YEKIKITHI AKINIU 29 - Sumi Naga CL (Re-edited) Bible (BSI)

Hezekiah no Judah lo Kalu

¹ Hezekiah ye ampe muku pungu shi akelono ayepelu eno Jerusalem lono ampe muku toku ayepe. Pa za ye Zechariah nga Abijah.

² Pa sü David no shike toi pa ye thokha kiu no Ampeu zülo achipi keno shike.

Hezekiah no Achineki Shikimthe

³ Pa yepe mpe atüghüu aqhi atüghüu lo pa no achineki khaghoqo khaqhi no tipaqo pukho kithe.

⁴ Pa no achinemi ngo Levimi aqo lakhi sawo achineki kipelau kodibo lakhi lo kumqo

⁵ eno panoqo vilo pi, “Levimiqo, I tsa inilo! Nongu kishekimthe lo, Ampeu nongu puasü Lhou ki ghi shikimthe lo, eno Akimthe-a lono kitiqeve keu jeli kümtsü ikhive lo.

⁶ Kughengu ningu puasüqo ye pükhükulupu shimove eno Ampeu ni Lhou zülo kiu no axine keno shive. Panongu no Pa qhive eno Ampeu kungoa lono pano gi tsüghüsü wuve no azübo kugho puwo tsüe.

⁷ Panongu no achineki hukikha ghi khave, akulu pinheve eno axokütsüngü piti move, momu akipti kümllagho pesü Israel Lhou lau Akimthe-a lono mlla move.

⁸ Tighenguno Ampeu loghu Judah ngo Jerusalem shou ikughi, eno Pa no tipaqo lau akümsapu, akichiqhipu, jukünatha kepu shivetsü, ti ye nongu nhethi ghi ithulu anie.

⁹ Kughengu julo, hi ghenguno ni puasüqo ye azütakikihi lono thive, eno ningu tianuli ngo nipuqo ye akughumi shi sawuve.

¹⁰ Itehi Ampeu, Israel Lhou sasü puloshoqhi shinike I no xatha luvae, tishianguno Pa xukighide ningu launo tave peni.

¹¹ I nuliqo, itehi ye kughucho kevilo, kughengu Ampeu no nongu pelo Pa zülo puthugho no Pa huthu penike, Pa qemi shi penike eno akümllagho Pa tsü penike nongu kishelue.”

¹² Tishino Levimi no ithuve; Kohath li lono Amasai nu Mahath ngo Azariah nu Joel; Merari li lono Abdi nu Kish ngo Jehallelel nu Azariah; eno Gershon li lono Zimmah nu Joah ngo Joah nu Eden;

¹³ Elizaphan li lono Shimri ngo Jeuel; Asaph li lono Zechariah ngo Mattaniah;

¹⁴ eno Heman li lono Jehuel ngo Shimei; eno Jeduthun li lono Shemaiah ngo Uzziel.

¹⁵ Panongu no pano thiküzümi hekütsü no pano kishekimtheve no Ampeu tsa vecheo akükau no azah tsüke kiqi lono Ampeu ki shikimthe nike ilove.

¹⁶ Achinemi no Ampeu ki alou mitheni ke ilove eno tile mithekumo jeli kümtsü achineki khala lo pesü ipeghi. Tishino Levimi no pesü Kidron Khila lo wuve.

¹⁷ Panongu no aqhi atüghüu atsala atüghüu lono mithethu kelo atsala akütacheu loye Ampeu ki kulaghi toluve. Tishino atsala tache Ampeu ki shikimthe no aqhi atüghüu atsala chighiakütsüghou loye kümtsü shikhave.

¹⁸ Tileno panongu no akükau Hezekiah lau wuno pi, “Ningu ye Ampeu ki kümtsü shikimthe khavae, ti ye akipti kümlla khache eno tile abohu kümtsü, akimthe sho kibepu eno tile abohu kümtsü mithevae.

¹⁹ Akükau Ahaz no aküpülü küküha ghuloki lono abohu ikhive keqo kümtsü ningu no shikimthepe qhivae, julo, tipaqo ye Ampeu kümlla khache zülo ani.”

Akümlla Huthu Kithelu

²⁰ Tithiu Hezekiah no ithe ithu no mishighüna lo hiyampemi kukütsü sasü Ampeu kilo wu.

²¹ Panongu no amshitsü tsüni, ambetsü tsüni, ambeti tsüni, eno anetsü tsüni pesü kükaqha ngo akimthea eno Judah kümtsü ghenguno axine kümllagho shitsü. Pa no Aaron li lono ighi keqo achinemi vilo Ampeu kümlla khache lono mlla lopi azah tsü.

²² Ikehu panongu no amshitsü heqhi, eno achinemi no aji pesü akümlla-khache lo lepuku. Panongu no ambetsü heqhi eno achinemi no aji pesü akümlla-khache lo lepuku. Panongu no ambe heqhi eno achinemi no aji pesü akümlla-khache lo lepuku.

²³ Tithiu panongu no aneqo sasü akükau ngo ahohomi lau ighi, eno panongu no aneqo shou panongu u be,

²⁴ eno achinemi no tipaqo heqhi no aji pesü akümlla-khache lono axine kümllagho shi Israel ghenguno lokichile shi. Kughengu akükau no Israelmi kümtsü ghenguno akipti kümllagho ngo axine kümllagho shilopi azah tsüke.

²⁵ David ngo akükau tungkupu Gad eno tungkupu Nathan zakütsü kiqi lono pa no Levimi pelo küghapayi ngo akighilebo jeli pesü Ampeu kilo ngope, ayezah hi ye tungkupmi vecheo Ampeu launo ighike.

²⁶ Levimi no David lebo peluve, eno achinemi no afuko peluve no puthughove.

²⁷ Tishino Hezekiah no akipti kümllagho tsü penike azah tsü. Akümllagho piti kemtsa Ampeu lau shekiqhe le phethuve eno afuko ngo Israel kükau David lebo ghi küigha thuve.

²⁸ Ahohomi kümtsü no Alhou mlla, eno alephemi no ale phe no afuko kipemi no afuko igha. Akipti kümlla no tave moke kutolo tishi ae.

²⁹ Ti tave kethiu no akükau Hezekiah ngo timi kümtsü no pishiqhope Alhou mllae.

³⁰ Akükau Hezekiah ngo hiyampemi no Levimi vilo David ngo tungkupu Asaph pamaw Ampeu kishe le phelopi azah tsü. Panongu no alokivi lono phe eno panongu no pishiqhope Alhou mllae.

³¹ Tithiu Hezekiah no pi, “Itehi nongu ye kishekimthepe Ampeu lau tsüvae. Aphivilo ighilo; aghakishi eno shikimthi kümllagho pesü Ampeu tsülo.” Ahohomi no aghakishi ngo shikimthi kümllagho pesü tsü, eno pulokinimi no akipti kümllagho ghi pesü ighi.

³² Panongu no amshitsü lhotsüni, ambetsü 100, eno ambeti 200 akipti kümllagho lo süghi; hi kümtsü Ampeu lau akipti kümllagho shike.

³³ Kishekimthe keu kümllagho ye amshitsü 600 eno ambe 3,000.

³⁴ Ikemu achinemi no aghulo likhi kehu akipti kümllagho kümtsü pitimla kepu shive, tighenguno achinemi kütami no panongu shikimthe lumphi kutolo pano thiküzümi Levimi no panongu kuphu, ti ye akümla kishekha moke kutolo, kughengu achinemi nguno Levimiu no pano shikimthe keu lo amlo tsüqhiyi ae.

³⁵ Akipti kümllagho kutomo tsükeu gholo külakishi kümllagho ghenguno atha ae, eno akipti kümllagho gholo atsaizü kümllagho ghi ae. Hitoi Ampeu kilo akümlla huthu kitheve.

³⁶ Hezekiah ngo timi kümtsü no alovi kughengu Alhou no timiqo ghenguno pekithi tsükeu vecheo hi kümtsü paikhavi lono shiluve ke.