YEKIKITHI AKINIU 28 - Sumi Naga CL (Re-edited) Bible (BSI)

Ahaz no Judah lo Kalu

¹ Ahaz ye ampe muku shi akelono ayepelu eno Jerusalem lono ampe chighitsügho ayepe. Pa sü David no Ampeu zülo achipi shike toi pa ye tishimoe,

² ikemu Israel kükami no xükeu laghi pape. Pa no Baal ghenguno ayi julho ghi mlae.

³ Pa no Hinnom Nu Khila lono akümllagho tsüno pa nu pesü akipti kümllagho shive, ti ye Ampeu no Israelmi zülono hapheve keqo shiaye no aphikümqhüpu khuaye peche ketoi shike.

⁴ Pa no aghakishi ngo akümllagho pesü qhemghaike-a, atoghi, asübo kicheqho kümtsü lono mllae.

Judah Theqhive

⁵ Tighenguno Ampeu no Ahaz pesü Syria kükau u lo süvetsü eno Syria kükau no pa leluve no timi kutomo küghape Damascus lo wuve. Pa ye Israel kükau u lo ilove eno Israel kükau no akumto shi pa theqhive.

⁶ Kughengu Ramaliah nu Pekah no Judah lo aghütomi lakh lakhi qhethonhe muku atsala lakhi lono ghiqhive tsü, kughengu panongu no Ampeu pano puasü Lhou pheve ke.

⁷ Ephraimmi Zikhri no Akükau nu Maaseiah ngo kükaki peitha kicheu Azrikam eno akükau shelo zatsüu Elkanah pithive tsü.

⁸ Israelmi no pano bolomi totimi ngo atianuli lakh kini küghape wuve eno tinhemgha ghi kutomo hakho pesü Samaria lo wuve.

⁹ Ikemu Ampeuw tungkupmi lakhi Oded ipikeu no Samaria lo Israel ghüshimi idewo chekeqo vilo pi, “Julo, Ampeu nongu puasü Lhou no Judah lau amlo ideve no nongu pelo panoqo leluvepe, ikemu nongu no axukighide lono panongu ghiqhive keu no iku atsütsü tovae.

¹⁰ Eno itehi nongu ye Judah ngo Jerusalem timi küghape ighi kemi kiptimi ngo totimi pesü no qemi shiniye kümsü ani. Nongu ye Ampeu nongu Lhou shou axine shipüani kepi mtha keshea?

¹¹ Ikehu itehi I tsa inilo, no bolomi akughumi gholono kügha saghi akeqo kighide puwove lo, kughengu Ampeu loghu ye nongu shou ikughivae.”

¹² Ephraimmi sakiphemi khami ghi aghüshi lono idewo chekemi lachile; tipaqo ye Jehohanan nu Azariah, Meshillemoth nu Berekhiah, Shallum nu Jehizkiah, eno Hadlai nu Amasa.

¹³ Panongu no pi, “Nongu ye akughumi hilau saghi kevilo, kughengu ningu xine kipimi itehi akeu shou nongu ye itaghi Ampeu lau akipimi alau saghi niye ani. Ningu kipimi ye ighono kije shivae, eno Israel shou aloghu kije ani.”

¹⁴ Ikehu ghüshimi no akughumi ngo anhemgha hakholu keqo pesü sakiphemi ngo hoho zülo qhivetsü.

¹⁵ Timi khunoqo je kuphe keno, tipaqo no ithu no anhemgha lepughi keu lono aphimini pesü akughumi aphikümsa shi akeqo pipeve. Panongu no tipaqo aphimini eno apukhuqho pipe, chuqu-kusho tsüve, eno nukisheve. Tishino khurhaqo lono panongu ngaqo kümtsü xapusü Jericho lo amsabo mishighüna lo pano bolomi lau saghitsü. Eno panongu ye Samaria lo idewove.

¹⁶ Tipa ghuloki lo akükau Ahaz no Assyria kükau lau akukuphu khu puwu.

¹⁷ Kughengu Edommi no itaghi Judah leve eno akughumi küghape wuve.

¹⁸ Itaghi Philistiami no kulolau naghuto küxa lo mishighünaqo eno Judah apeu leighi no Beth-shemesh, Aijalon, Gederoth, Soco, eno tipa sükümxa lo aphu akeqo, Timnah eno sükümxa lo aphu akeqo, Gimzo eno sükümxa lo aphu akeqo hakho luve eno tipaqo lo xüsüve.

¹⁹ Akükau Ahaz ghenguno Ampeu no Judah shikuchuni, kughengu pa no Judah pelo axine shivepe eno Ampeu lau pükhükulupu shipe moke.

²⁰ Assyria kükau Tiglath-pileser no pa shikumto nike züqhulo ighi no pa ghimeqhi.

²¹ Kughengu Ahaz no Ampeu kilo, kükaki lo, eno sakiphemi ki lono akini qhakütsü no sükusho süqha shi Assyria kükau lau tsüpuwu, ikemu tinomu pa kuphu mlave.

Ahaz Xine

²² Paw shiluküsa ghuloki lono pa ye alau Ampeu lau amikucho shimove, hi ye akükau Ahaz ghili pi anike.

²³ Kughengu pa no Syriami khunoqo pa shou toluve keno tipaqo lhou lau aghakishi kümllagho tsüuve eno pi, “Syria lhouqo no Syria kükami kuphu tsü kehu I no tipaqo lau aghakishi kümllagho mllani, tishikeu lono ni ghi kuphu peni.” Ikemu tipaqo ghenguno pa shou eno Israelmi shou kütsakungo süghi.

²⁴ Ahaz no Alhou kilo abohu kümtsü ikhipe kubopinyive eno Ampeu ki khave no Jerusalem lo acheku kümtsü lo pa kümlla khache shipe qhiwove.

²⁵ Judah lo mishighüna kümtsü lo pa no kütau lhouqo lau akümllagho tsünike ghenguno qhemghaike-a mla, eno tino Ampeu, pa puasü Lhou loghu shikighide tsüke.

²⁶ Ahaz kümla küghütha kütau ye, hukuthu lono ashekha kutolo Judah ngo Israel Kükami Kaku lo yepüani.

²⁷ Ahaz ye pa puasüqo gholo zühuve eno panongu no Jerusalem lo pa shiqhove, eno pa nu Hezekiah no pa thisü luve.