YEKIKITHI AKINIU 27 - Sumi Naga CL (Re-edited) Bible (BSI)

Jotham no Judah lo Kalu

¹ Jotham ye ampe muku pungu shi akelono ayepelu eno Jerusalem lono ampe chighitsügho ayepe. Pa za ye Zadok nga Jerushah.

² Pa ye Ampeu zülo kiu no achipi keno shike, eno Ampeu chineki alou ilomo kethono papu Uzziah no shikeu kiqi lono thokha shie. Ikemu timiqo no shiküpsa khuaye pape wuve.

³ Pa no Ampeu kilo lashou khagho mla eno Ophel liwo lo kutomo mlasü.

⁴ Tinguno alau pa no Judah ato yeghi lo mishighünaqo shiqhe eno atoghi ghasü lo aliwo ngo qoghekiqo shiqhe.

⁵ Pa no Ammonmi kükami sasü aghü shino tipaqo shou tolu. Tipa mpe lo Ammonmi no ghükayi ahu 3,400, ashothi ahu lakh muku eno barleythi ahu lakh muku pa tsü. Ammonmi no ampe akiniu ngo aküthüu lo ghi tishi pa tsüe.

⁶ Ikehu Jotham ye akumto shive kughengu pa no Ampeu zülo müzüchoi xüke.

⁷ Jotham kümla küghütha kütau ngo pa ghüshi ghili kümtsü eno pa küxü ghili ye Judah ngo Israel Kükami Kaku lo yepüani.

⁸ Pa ye ampe muku pungu shi ake lono ayepelu eno Jerusalem lono ampe chighitsügho ayepe.

⁹ Jotham ye pa puasüqo gholo zühuve eno panongu no David phughi lo pa puasüqo gholo shiqhove, eno pa nu Ahaz no pa thisü luve.