YEKIKITHI AKINIU 26 - Sumi Naga CL (Re-edited) Bible (BSI)

Uzziah no Judah lo Kalu

¹ Judah lo timi kümtsü no Uzziah, khuu ampe chighitsügho shi akeno, pa pesü papu Amaziah thisü luvepe.

² Akükau no thive no pa puasüqo gholo zühuve kethiu pa no Eloth shiqhe no Judah tsüchile.

³ Uzziah ye ampe chighitsügho shi akelono ayepelu eno Jerusalem lono ampe lhopungu kini ayepe. Pa za ye Jerusalemmi Jecoliah.

⁴ Pa ye Ampeu zülo kiu no achipi keno shike, ti ye papu Amaziah no shikeu kiqi lono.

⁵ Zechariah no xüake lo Ampeu sükümsa lono pa kütsü che, eno pa no Alhou pülü ake tivilo Alhou no pa pelo ikoishe lupe.

⁶ Uzziah no Philistiami sasü aghü shinike wuno Gath liwo, Jabneh liwo, eno Ashdod liwo kümtsü hepholeve tsü, pa no Ashdod eno Philistia qhalo mishighünaqo shiqhe.

⁷ Alhou no pa kuphu no Philistiami, Gurbaal lo Arabmi akeqo, eno Meunimi shou tolupe.

⁸ Ammonmi no sükusho süqha pesü Uzziah tsü, eno pa ye ighono akumto shive kehu pa jekipi no Egypt kutolo piwove.

⁹ Uzziah no Jerusalem lo Acheku Khagho, Akhila Khagho, eno Hokütsüghü-a lo qogheki shipe qhino putukhave.

¹⁰ Pa no asayeqha lo ghi qoghekiqo shipe qhino azü tughuko kutomo chhu, kughengu kulolau naghuto pukhu küxa lo ngo aqa yeghi lo pa ye lhoxü loji kutomo pighiche. Pa ye alu kichimi ngo atsailu kichimi ato yeghi lo ngo aqa lo ache, kughengu pa no aghüma yeghi kimiye ke.

¹¹ Tinguno alau, pa ye ghüshimi kutomo kuto püache. Tipaqo ye akükau ghüshimi zatsümi gholo lakhi Hananiah mijekütsü kiqi lono akiyeu Jeiel ngo kijemi lakhi Maaseiah pama heküsa kiqi lono amqo kijepe qhi.

¹² Ali lo akütsü khunoqo aghütomi keno pano 2,600 ache.

¹³ Panongu qholo ghüshimi lakh küthü qhethonhe tsüni no aqhe pungu no aküka kumto lono aghümi launo akükau kuphuni kemi ae.

¹⁴ Uzziah no ghüshimi kümtsü ghenguno azüto, angu, ayi kütsükuqho, amla küküzü, asüzü ngo apiji eno hevüla tu kuto tsü.

¹⁵ Jerusalem lo timi shitsami vecheo putsüghü mlaphe no tipaqo pesü qoghekiqo lo ngo aliwo chekuqo lo ghopeqhi, eno tipaqo lono apiji ngo atu kijeje kapuwu niye kuto. Eno pa jekipi ye aqha kümtsü lo pikülhave, kughengu pa no akumto shi ake kutolo Alhou no akümzapu shi pa kuphue.

Uzziah Qheküza eno Aghime

¹⁶ Ikemu kughou pa no akumto shive keno, pa ye qhezauve no pa kuluqhive. Pa ye pa Lhou Ampeu lau amikucho shimove eno Ampeu chineki lo tsüngqüi keu kiptia lo piti nike ilove.

¹⁷ Ikemu achineu Azariah eno pa gholo Ampeu chinemi akumtomi lhotache no akükau pape ilo,

¹⁸ eno panongu no akükau Uzziah lachile no pa vilo pi, “Uzziah, tsüngqüi keu kipti pesü Ampeu tsüni keu ye o kümla kumoe, ti ye achinemi Aaron nuli pelo shipenike süsü püani. Akimthe-a lono ipeve lo, kughengu no ye akumou shivae eno hi shikeu lono Ampeu Alhou launo kiumu agigihupu ithumla nani.”

¹⁹ Uzziah ye amlo ideve. Pa ye pa u lo tsüngqüi keu kiptibo pe ake, ikelo paikhavi Ampeu kilo achinemi zülono pa kishe lo apügha ipeghive.

²⁰ Achinetou Azariah ngo achinemi kümtsü no pa jukelo pa ye akishe lo apügha ipeghive! Panongu no mtazü pa sasü khalau ipeve, pa ghi mighimghai ipeve, kughengu Ampeu no pa ghimeve ke.

²¹ Akükau Uzziah ye pa kithi tsala kutolo apügha puve, eno apüghami kehu pa ki kütashi ache, eno Ampeu kilo sasü move. Pa nu Jotham no akibo vehu kümtsü jukütsü eno aghakhu lo timiqo shou ayepe che.

²² Uzziah kümla küghütha, abothu lono ashekha kutolo Amoz nu tungkupu Isaiah no yepüani.

²³ Uzziah ye pa puasüqo gholo zühuve eno kükami kumokilive lo panongu no pa puasüqo gholo shiqhove, kughengu panongu no pi, “Pa ye apüghamie.” Eno pa nu Jotham no pa thisü luve.