YEKIKITHI AKINIU 24 - Sumi Naga CL (Re-edited) Bible (BSI)

Joash no Achineki Shikithe

¹ Joash no ampe tsüni shiake lono Judah lo ayepelu eno Jerusalem lono ampe lhobidi ayepe. Pa za ye Beershebami Zibiah.

² Achineu Jehoiada no xüake tivilo Joash ye Ampeu zülo kiu no achipi keno shiche.

³ Jehoiada no Joash ghenguno anipu kini lutsü eno pama no atianuli punutsü.

⁴ Tithiu Joash no Ampeu ki pukho kitheni ke xathave.

⁵ Pa no achinemi ngo Levimi kukütsü no panongu vilo pi, “Judah mishighünaqo lo wuno Israelmi kümtsü launo Ampeu ki pukho kitheni ke ampe lo pisa qhakütsü lo, nongu no mtazü ti shilo.” Ikemu Levimi no mighi move.

⁶ Ikehu akükau no achinetou Jehoiada kuno pi, “Kushiye no ye Levimi pelo Judah ngo Jerusalem lono Ampeu qeu Moses no timiqo pelo Ampeu kungo phiki tucho kepu süqha tsü penike pi püakeu lo jusümo kea?”

⁷ Kughengu kixikila topumi Athaliah nuli no Alhou ki hepho ilo Ampeu kilo akimthe thime kümtsü pewo Baal mllave ke.

⁸ Tileno akükau zakütsü lono abohu lakhi mlape achineki khagho lo qhive.

⁹ Eno Jerusalem ngo Judah kümtsü lo, Alhou qeu Moses no asayeqha lono azah tsükeu, Ampeu ghenguno zame peighi penike sheshuve.

¹⁰ Ikelo sakiphemi eno timi kümtsü no alokivi shive no zame pewo abohu chhi moke kutolo süe.

¹¹ Kugho kughomu abohu lo pisa no chhive no Levimi no akükauw kijemi lau abohu peighi kelo, akükauw akiyeu ngo achinetouw kijemi no luve no itaghi abohu pewo qhiveche. Tsala kipetsü panongu no tishi, eno pisa kütsasa kütsü luve.

¹² Akükau ngo Jehoiada pama no ti pesü achineki kümla lo ampi shitsü akeqo tsüve. Panongu no Ampeu ki pukho kitheni ke, aki kishimi ngo asü kümlami piqe, eno ayi kümlami ngo alazayi kümlami ghi piqeve.

¹³ Akümla shi akeqo no pükapütsa mla kehu akümla ighono ajuiche lu, tishino panongu no Alhou ki shikithepe mtotoi püzüu tho shiluve.

¹⁴ Kughou panongu no mla tave keno, ghükayi achili pesü akükau ngo Jehoiada pama lau süghi, eno Ampeu ki ghenguno akümlla lo ngo akipti kümlla lo peitha kepu bohu, axokütsüngü khu, eno ameshoyi ngo ghükayi bohu mlave.

¹⁵ Jehoiada ye kitemi shino thive. Pa ye ampe 130 shi ake lono thive.

¹⁶ Panongu no David phughi lo kükami kumoki lo pa qhove, kughengu pa no Israelmi lau, Alhou lau, eno achineki ghenguno akümla kivi mlake.

¹⁷ Jehoiada thive kethiu Judah lo ampemi no akükau lau ighi no agigihu tsü. Eno akükau no panoqo tsa inive.

¹⁸ Panongu no pano puasü Lhou Ampeu chineki pheve no Asherah ngo ajulhoqo qeuve. Akipimi hipau ghenguno Judah ngo Jerusalem shou aloghu ikughive.

¹⁹ Ikeghi Pa no tungkupmi puwu no Pa lau ideighi penike kütüghü. Hipaqo no panongu lau ashepe shi kemu panongu no ini tsümoe.

Joash Pishikiqhi

²⁰ Tile Alhou Ghungu no achineu Jehoiada nu Zechariah peitha luve, eno pa no timiqo zülo puthugho no ighamku pi, “Alhou no ishi piani, ‘Nongu ye kushiye Ampeu no azah tsükeu hebideve keu lono ikoishe mlave ani kea? Nongu no Ampeu pheve kehu Pa no nongu phevae.’”

²¹ Ikemu panongu no pa shou küsüqe, eno akükau zakütsü lono Ampeu ki khala lono atu pesü pa veqhive.

²² Hitoi akükau Joash no Zechariah papu Jehoiada no pa lau kikimiye piye keu kümsülu move no Jehoiada nu heqhive. Zechariah no thiuche kelono pi, “Ampeu no ithulu no amkhülu tsü peniu!”

Joash Pithive

²³ Tipa mpe shekhau Syriami ghüshimi no Joash leighi. Panongu no Judah ngo Jerusalem lo sakiphemi kümtsü pithive tsüno tinhemgha kutomo hakhope Damascus kükau lau tsü puwuve.

²⁴ Syria ghüshimi ye aghulo likhi ighi keghi Ampeu no panoqo pelo ghüshimi kutomo shou toluvepe, kughengu Judah no Ampeu pano puasü Lhou qhiveke. Hitoi panongu no Joash shou küghathabe.

²⁵ Kughou panongu no Joash ghüzave no idewove keno, pa qemi no pa no Jehoiada nu heqhive keu mkhü lutsüni ke küsüqeve, eno pa züa lono pithive.

²⁶ Pa shou küsüqe keu ye Ammonmi Shimeah nu Zabad ngo Moabmi Shimrith nu Jehozabad.

²⁷ Pa nuli xülhe ngo pa shou pipuku keu tsa kutomo eno pa no Alhou ki shiqhe kithe keu ye Kükami Xülhe Kaku lo yepüani. Eno Pa nu Amaziah no pa thisü luve.