YEKIKITHI AKINIU 23 - Sumi Naga CL (Re-edited) Bible (BSI)

Joash Pesü Akükau Shive

¹ Ikemu ampe akütsüniu lo Jehoiada no amlo kumto shino ghüshimi aqhe zatsümi sasü küptsa luve: Jeroham nu Azariah, Jehohanan nu Ishmael, Obed nu Azariah, Adaiah nu Maaseiah eno Zikhri nu Elishaphat.

² Panongu no Judah lo mishighüna kümtsü lono Levimi ngo ali lo akütsü kümtsü Jerusalem lo kukütsü.

³ Eno kümtsü no Ampeu ki lono akükau sasü puloshoqhi shive. Eno Jehoiada no pi, “Julo, akükau nu! Ampeu no David nuli ghenguno piqhi püake toi pa pelo ayepe pelo.

⁴ Nongu no hitoi shilo: nongu Levimi ngo achinemi Sabbath tsalani akümla lo wumo keqo no kikije küthü lo lakhi no khagho kheluve lo.

⁵ Lakhi no kükaki kheluve eno lakhi no Aboqha Khagho kheluve lo.

⁶ Achinemi ngo Levimi kukuphumi kumo aye khumu Ampeu kilo ilo moni. Panongu ye akimthe kehu ilolu nani, ikemu timi kümtsü no Ampeu zakütsü papelo.

⁷ Levimi no pütüta ghünanu au lo pesü akükau bothape pa süshoni eno khukhumu aki alou iloghi keu ye pithive lo. Akükau no ipeiloke kümtsü lo pa gholo shilo.”

⁸ Levimi ngo Judah timi kümtsü no achineu Jehoiada no mijetsü keu kiqi lono shino pütüta no timi lakhikhi sasü ighi, ti ye Sabbath tsala lo akümla lo wumoni kemi eno wuni kemi kinikujo, kughengu achineu Jehoiada no akümlami puwu move.

⁹ Achineu Jehoiada no Ampeu kilo Akükau David ngu eno azüto kijeje ngo aghulo püakeqo pesü keptenqo küphatsü.

¹⁰ Pa no timi kümtsü pelo akükau ghukhemi shi pütüta ghünanu au lo tsüqüpe ngope, aki apeu küdau no ahuu kutolo, akümlla-khache hokümxa eno aki khepe.

¹¹ Tishino panongu no akükau nu saipeghi no akütsükuqho pa pipe eno ashepe pa tsü. Panongu no pa pesü akükau kepi sheshu, eno Jehoiada ngo pa nuli no pa nukisheve, tishino panongu no pi, “Akükau axüshu peniu!”

Athaliah Pithive

¹² Kughou Athaliah no timiqo kupo eno akükau sheqhe keu ghügha chilu keno, li no Ampeu kilo timiqo lau ighi.

¹³ Li no ju kelo akükau no atsükucho phivilo puthugho aghi, eno keptenqo ngo afuko küighami eno timiqo kümtsü no alokivishi igha eno afuko igha aghive. Athaliah no li phi süxüve no ighamku, “Pishikiqhi! Pishikiqhi!”

¹⁴ Tileno achineu Jehoiada no keptenqo azah tsü, “Kijemi mta lono li sasü ipeghilo eno khuu no li pape cheghini keno tipau pithive lo.” Kughengu achineu no pi, “Ampeu kilo ye li pithi kevilo.”

¹⁵ Tighenguno panongu no li sünhe sasü kükaki lo khurshi khagho kulaghi lo wuve no tilauno li pithive.

Jehoiada no Akikili Süghi

¹⁶ Jehoiada no timiqo eno akükau sasü Ampeuw shini kepi puloshoqhi shi.

¹⁷ Tishino timi kümtsü Baal chineki lo wuno ti kuboleve; panongu no pa kümlla-khache ngo pa julhoqo kuboleve tsü eno Baal chineu Mattan akümlla-khache zülono pithive.

¹⁸ Jehoiada no Ampeu kilo aghukhemi pelo ngokhe luvepe, tipaqo ye Moses Yezah lo yepüake toi Levi lagha lo achinemi ngo Levimi Ampeu lau ale phe alokivi kije lono akipti kümllagho tsü penike eno Ampeu kilo ampi shi penike David no süsü keqoke.

¹⁹ Jehoiada no Ampeu ki khagho lo akhemi qhive, tishikeu lono mithekumomi ye lakhimu alou ilope move.

²⁰ Pa no kepten, ghenimi, timiqo shou angh, eno aghakhu lo timi kümtsü sasü Ampeu ki lono akükau khe sasü khagho lashou kathasü kükaki lo wuve. Eno panongu no akükau pelo kükalakhü lo iqave pe.

²¹ Ikehu aghakhu lo timi kümtsü no alokivi shive, eno Athaliah pithive kethiu mishighüna ye qümüive.