YEKIKITHI AKINIU 22 - Sumi Naga CL (Re-edited) Bible (BSI)

Ahaziah no Judah lo Kalu

¹ Jerusalem lo xüküami no pa nu anipau Ahaziah pelo pa thisü luvepe, kughengu timi amqo lakhi Arabmi gholono aghazü lo ighi keqo no pa nu anoghimi kümtsü pithive tsü kehu Jehoram nu Ahaziah no Judah lo kaluve.

² Ahaziah ye ampe muku kini shi akelono ayepelu, eno pa ye Jerusalem lono ampe lakhi ayepe. Pa za ye Athaliah, eno li ye Omri tilimi.

³ Pa ghi Ahab kibolomi no cheche keu laghi lo chewu, kughengu paza no kixikila kümla shinike pa shikumtoe.

⁴ Ahab kibolomi no shike toi pa ye Ampeu zülo kiu no axine keno shike. Kughengu papu thive kethiu panongu no pa lapiyemi shive, eno tino pa pelo ikiqive peke.

⁵ Panoqo kichekütsü lono pa ye Ahab nu Jehoram Israel kükau gholono Syria kükau sasü Ramoth-gilead lo aghü shiniye wuke. Eno Syriami no Joram ghüzave.

⁶ Tileno pa ye Syria kükau Hazael sasü Ramah lono aghüshi kelono Syriami no pa ghüzave keu lono viluve niye Jezreel lo idewove. Eno Jehoram nu Ahaziah Judah kükau ghi chesü Jezreel lo Ahab nu Joram no izave kehu pütsa niye iqie.

⁷ Ikemu Joram pütsa niye wuke lono Ahaziah pelo ikiqive penike Alhou no kughuve. Ikehu kughou pa no tilau ighi keno, pa no Jehoram gholono Nimshi nu Jehu pütsa niye ipe; Jehu ye Alhou no Ahab kibo kütsave peniye nukishe ke.

⁸ Jehu no Ahab kibolomi shou küghakütha shitsü akelono pa no Judah lo ampemi ngo Ahaziah thiküzümi nu khunoqo Ahaziah gholo chekeno, tipaqo kusholu no heqhive tsü.

⁹ Pa no Ahaziah phuwu no Samaria lo itshü aghi kelono küghaluve. Panongu no pa sasü Jehu lau ighi no pithive. Panongu no pa shiqhove, kughengu panongu no pi, “Pa ye amlo kuchopu no Ampeu phu chekeu Jehoshaphat tilimi ke.” Eno Ahaziah kibo lo lakhimu kükaqha lo ayepeni keu kühave.

Athaliah no Judah lo Kalu

¹⁰ Kughou Ahaziah paza Athaliah no li nu thive keu sütsa chilu keno, li no akükau bolomi kümtsü pithi khave.

¹¹ Ikemu akükau nga Jehoshabeath no akükau nuliqo pithi akelono Ahaziah nu Joash sawo küsü no pa eno pa saputhu akeu aqeliu pama aküzü chebo lo qhive. Hitoi Jehoshabeath khuu Jehoram nga eno achineu Jehoiada nipu eno Ahaziah chepu ghi keno, li no Joash pesü Athaliah launo küsüve eno pa ye pithi move.

¹² Eno pa ye panongu gholo ampe tsügho Athaliah no ayepe ake tivilo Ampeu kilo itshüpe ngove.