YEKIKITHI AKINIU 21 - Sumi Naga CL (Re-edited) Bible (BSI)

Jehoram no Judah lo Kalu

¹ Jehoshaphat ye pa puasüqo gholo zühuve eno pa sükumo ye papu David phughi lo qhove, eno pa nu Jehoram no pa thisü luve.

² Jehoshaphat nuli Jehoram thiküzümi tsügho ache: Azariah, Jehiel, Zechariah, Azariah, Michael, eno Shephatiah; panongu kümtsü Israel kükau Jehoshaphat nuli.

³ Panongu papu no ghükayi, ameshoyi ngo amekusho mheghi jeli kutomo panoqo tsükeu gholo Judah lo aliwo kumto mishighünaqo ghi kijetsü, ikemu pa no kükaqha ye Jehoram tsüve, kughengu pa no anoghiu ke.

⁴ Kughou Jehoram no papu kükalakhü lo iqa no iqhikumto luve keno, pa thiküzümi kümtsü azütakikihi pesü pithive eno Israel lo sakiphemi khami ghi pithive.

⁵ Jehoram ye ampe shighi kini shi akelono ayepelu eno Jerusalem lono ampe tache ayepelu.

⁶ Ahab kibolomi no shike toi pa ghi Israel kükami xine laghi papeuve, kughengu pa nipu ye Ahab nonga ke. Pa ye Ampeu zülo kiu no axine keno shike.

⁷ Ikeghi Ampeu no David sasü puloshoqhi shipüake ghenguno, eno alholo akulu pesü David ngo pa nuli tsünike Pa no piqhi püake ghenguno David kükaqha kütsani shimove.

⁸ Pa ghuloki lo Edom no Judah sasü kumjo ipeghi no pano kükau süsüve.

⁹ Tile Jehoram no paw ghüshimi zatsüu ngo khurkulu kümtsü sasü katha iku putho lono pa eno paw ghüshimi zatsümi bothape akeqo Edommi ghiqhive.

¹⁰ Ikehu ishi kutolo Edommi ye Judah yekipe sasü kumjo acheni. Tipa ghuloki lono Libnah ghi Judah sasü kumjo ipeghive kughengu Jehoram no Ampeu pa puasü Lhou pheve ke.

¹¹ Tinguno alau, pa no Judah lo ato yeghi lo qhemghaike-a mla eno Jerusalem lo xüküami sasü axine lo ilove no Judah pelo tsüghüve peke.

¹² Elijah tungkupu no Jehoram lau yesü lakhi hitoi tsü puwu: “Ampeu o sü David Lhou no ishi piani, nono o pu Jehoshaphat la lo chemo momu Judah kükau Asa la lo chemove kehu,

¹³ eno Israel kükami la lo chewuve eno Ahab kibolomi no Israelmi sasü axine lo iloke toi nono Judah ngo Jerusalem lo xüküami züiza sasü axine lo ilove eno o pu kibolomi, o thiküzümi khunoqo o nguno akiviu keno, tipaqo ghi pithive kehu,

¹⁴ julo, Ampeu no püsa kije ow timi, o nuli eno o nipuqo, eno o mheghi shou süghini cheni,

¹⁵ no ampi ghi kighinoli lo aküsü kije ikughive nani, eno kighinoli no ile ipeghive moke kutolo tsalakipe alhoksa shikithe nani.”

¹⁶ Ampeu no Ethiopiami phivilo akemi Philistiami ngo Arabmi xukutho no Jehoram shou axuide ipeghipe.

¹⁷ Panongu no ighi no Judah leluve eno kükaki lo tinhemgha xüle puwuve, pa nuli ngo pa nipuqo ghi sawuve ikemu pa nu anipau Jehoahaz ye sawu move.

¹⁸ Hi kümtsü thiu Ampeu no kighinoli küsü shipivi mlakeu pa lau pukutsü.

¹⁹ Tishino ampe akiniu shekha lo aküsü ghenguno pa kighi ile ipeghive eno pa ye aghime kitikhi shi thive. Paw timiqo no pa puasüqo thive kelo agigihu shi ami shiche keu shitsü move.

²⁰ Pa ye ampe shighi kini shi akelono akükau shilu eno Jerusalem lono ampe tache ayepelu. Pa no thive kelo timi khumu amloksa shimoe. Panongu no kükami kumoki lo kumono David phughi lo pa kumo shiqhove.