YEKIKITHI AKINIU 20 - Sumi Naga CL (Re-edited) Bible (BSI)

Jehoshaphat Kighini

¹ Hipa thiu Moabmi ngo Ammonmi no Meunimi pano gholo küqha no Jehoshaphat leighi.

² Aghinimi khami no Jehoshaphat lau ighi no pi, “Edom lono, azü kukuu no o lenike aqokitikhi kije cheni; panongu ye Hazazon-tamar (ti ye Engedi) lo ani.”

³ Tileno Jehoshaphat ye msave no pa gi kughope Ampeu phu, eno Judah ghakhu kümtsü no kümvü penike azah tsü.

⁴ Judah timi no Ampeu lau akukuphu khunike hekütsü luve; Judah lo mishighüna kümtsü lono Ampeu phu ighi.

⁵ Judah ngo Jerusalem lo timiqo no Ampeu ki khala akitheu zülo kumqo akelo Jehoshaphat no puthugho,

⁶ eno pi, “O Ampeu, ni puasü Lhou, No ye kungugha lo Alhou ke kumo keshea? Nono ayeghi lo kükaqha kümtsü shou ayepe ani. O u lo aküka eno akumto akeu ghenguno timi khumu o mjochile mlae.

⁷ O Alhou, Nono Israelmi zülono hile xüküami hapheve tsüno ayeghi hipau pesü O poshuu Abraham polo kughukomi alholo ghenguno tsüke kumo keshea?

⁸ Panongu no hile acheni eno O gihuni ke achineki shiqhe no pi,

⁹ ‘Amhekiqi, azütakikihi, püsa, püqümiye, ningu shou ikughi aye, nino aki hipau zülo eno o zülo puthughoni—kughengu O je ye aki hipau lo ani—eno ni ghime lono O lau ighamku kelo Nono chilu tsüno ni xalu nani.’

¹⁰ Itehi julo, Ammonmi, Moabmi, eno Seir Toghi lo kungomi khunoqo Israelmi no Egypt lono ipeghi ke ghuloki lono Nono lelu pemove eno Israelmi no tipaqo mxüsü wu kemu kütsa move keno—

¹¹ tipa jume shi panongu no Nono ni tsükeu mheghi yeghi lono ni hapheve niye ani.

¹² O ni Lhou, No ye panongu shou xakütha puku tsümo keshea? Kughengu hi aqokitikhi kije ni leniye chekemi zülo ningu ye aküka kühavae. Ningu ye kiu shikepu keno mthavae, ikemu ningu ye O lau ju anie.”

¹³ Tile Judah timi kümtsü no pano nga kughunu, anipu eno atianuli sasü Ampeu zülo puthugho ae.

¹⁴ Ikelo Ampeu Ghungu no kumqope akeqo gholo Levimi lakhi shou ikughive: pa ye Asaph lagha lo Mattaniah nu Jeiel nu Benaiah nu Zechariah nu Jahaziel ke.

¹⁵ Pa no pi, “Judah timi kümtsü, Jerusalem lo küami, eno Akükau Jehoshaphat, inilo: Ampeu no ishi piani, ‘Msa kevilo eno hi aqokitikhi kije jupe aghüthisü kevilo, kughengu aghüshi ye nonguw kumoe ikemu Alhouw ke.

¹⁶ Thoghiu panongu küpüghü nike wulo. Panongu ye Ziz kita lono iqhoghi nani. Nongu no akhila shekha, Jerual sayeqha kipelau no panongu sasü kusholu nani.

¹⁷ Nongu ye hipa ghüshi shimo nani. Mtotoi puthugho lulo, eno nongu züqhushi Ampeu no xakulu tsükeu julo, O Judah ngo Jerusalem timi.’ Msa kevilo eno aghüthisü kevilo. Thoghiu panongu küpüghü nike wulo, eno Ampeu no nongu gholo anani.”

¹⁸ Tileno Jehoshaphat no pa gi ayeghi lo pishiqhove, eno Judah ngo Jerusalem lo küami kümtsü no Ampeu zülo itsaqi no Pa mlla.

¹⁹ Levi lagha lo Kohath ngo Korah limi no puthugho no asütsa kuloghi lono Ampeu, Israel Lhou sheqhe.

²⁰ Thanau inaqhe ithe ithu no panongu no Tekoa sayeqha lo wuve. Kughou panongu no tilau ipeghi keno Jehoshaphat no puthugho no pi, “Judah ngo Jerusalem timiqo, I tsa inilo! Ampeu nongu Lhou pülülo, nongu no mtotoilu nani; Paw tungkupmi pülülo nongu no tolu nani.”

²¹ Kughou pa no timiqo sasü küsütsa luve keno, pa no alephemi khami pelo akimthe phimini pepusü ghüshimi züuno Ampeu lau ale ishi phe penike kishe, “Ampeu lau shikimthi tsülo, kughengu Paw iqemokeu kikimiye ye alholo acheni.”

²² Kughou panongu no akishe le phethu keno, Ampeu no Ammonmi, Moabmi eno Seir Toghi lo küami, khunoqo Judah leniye ighi keno, panoqo kheluve no theqhive.

²³ Kughengu Ammonmi ngo Moabmi no Seir Toghi lono ighi kemi lethuve eno tipaqo kütsave, eno kughou panongu no Seirmi pithi khave keno, itaghi panongu dolo lakhi no lakhi kütsa khave.

Ampeu no Judah Xaphelu

²⁴ Judah timi no asayeqha qogheki lo ighi no aghümi kütsasa akeqo küdau jupuwu kelo khunomu poka mlano akithi kumo no ayeghi lo aghive.

²⁵ Kughou Jehoshaphat ngo paw timiqo no anhemgha likütsü niye ighi keno panongu no tile thime kivi, aphimini, akughupu thime, kutomo ithulu no pütüta no pemlave ke kutolo hekütsü lue. Tipaqo no kütsasa kehu panongu ye ti pekishe keu no atsala küthü puwove.

²⁶ Atsala abidini no panongu no Beracah Khila lo kumqo no Ampeu sheqhe. Ikehu tipa-a pesü ishi kutolo Beracah Khila ipi cheni.

²⁷ Tishino Jehoshaphat no akütsü shino Judah ngo Jerusalem timi kümtsü alokivi shi Jerusalem lo ideighi, kughengu Ampeu no panongu pelo aghümi shou alovilu peke.

²⁸ Panongu no aheo, akighi lebo eno afuko ighasü Jerusalem lo Ampeu kilo ighi.

²⁹ Ampeu kümsa no aghakhu kükaqha kümtsü shou ikughive, kughengu Ampeu no Israelmi ghümi sasü aghü shikeu panongu no chiluve.

³⁰ Jehoshaphat yekipeqha ye iqüghai lue, kughengu pa Lhou no aqha kümtsü lono pa kulhoqhi tsüke.

³¹ Hitoi Jehoshaphat no Judah lo ayepelu. Pa ye ampe shighi pungu shi akelono Judah lo ayepelu eno Jerusalem lono ampe muku pungu ayepelu. Pa za ye Shilhi nonga Azubah.

³² Pa ye papu Asa no shikeu kümla kümtsü shike, eno Ampeu zülo kiu no achipi keno ti likhi shino tipau lono tsüghüve moe.

³³ Ikemu qhemghaike-a ye ikhimoe; timiqo ye tikutolo pano puasü Lhou lau pano mlo tsümoe.

³⁴ Jehoshaphat kümla küghütha kütau abothu lono ashekha kutolo, Hanani nu Jehu yekikithi lo yepüani, ti ye Israel Kükami Kaku lo ani.

Jehoshaphat Yepe Shekha

³⁵ Hipa thiu Judah kükau Jehoshaphat ye Israel kükau Ahaziah kixikila kümla kishiu sasü lakhi shive.

³⁶ Pa no Ezion-geber lono Ahaziah sasü Tarshish lo wuni keu zükiluqo mlae.

³⁷ Tile Mareshahmi Dodavahu nu Eliezer no Jehoshaphat kütüghü, “Nono Ahaziah sasü küqhake ghenguno nono kiu mla püani keno, Ampeu no kütsave tsü nani.” Zükiluqo ye shopholeve no Tarshish lo wumlave.