YEKIKITHI AKINIU 2 - Sumi Naga CL (Re-edited) Bible (BSI)

Achineki Shinike Kuto

¹ Solomon no Ampeu je lono achineki ngo pa kükaki shiqhe nike kughu.

² Pa no pekisheni kemi timi 70,000, eno atu heküthami timi 80,000 ato yeghi lo pichetsü, eno tipaqo shou jukükütsümi pano 3,600 süsü.

³ Pa no Tyre kükau Hiram lau asütsa pi puwu: “Nono I pu David sasü kilhisho no pa no ngokepu ki shiqhelu penike cedar pa tsüpuwu ketoi I lau ghi tishi tsülo.

⁴ Julo, ni ye Ampeu I Lhou je ghenguno aki shiqhe nike kuto ani, eno tileno axokütsüngü piti, tsalakipe akümlla sho qhitsü, eno Israelmi ghenguno alholo ina kijili, Sabbath lo, aqhi kithe lo, eno Ampeu ni Lhou tiqhetini lo, akipti kümllagho tsünike aki tipau ikhiphe tsüniye ani.

⁵ I no achineki shiqhe niye akeu ye kije ke, kughengu ni Lhou ye alhou kümtsü nguno akijeu ke.

⁶ Ikemu kungugha akiqheu thotsü Pa qhilu kepu-a kühake khuu no Pa ghenguno aki shikulupu kea? Pa zülo akümllagho tsünike ghenguno kumo aye ni ye khuue pi Pa ghenguno aki shiqhe luni kea?

⁷ Ikehu itehi ameshoyi, ghükayi, alazayi, eno ayi jeli kümla lo agho kütsümi, eno hughai, hughüi, tsülabeike phi ghothi kemi, eno aye shisüthi kemi, lakhi puwu tsülo. Tishino pa pelo I pu David no Judah ngo Jerusalem lo atshamgha shikithimi kishepe qhitsü keqo gholo mla peni.

⁸ Lebanon lono cedar, asahubo, eno algum süpa ghi I tsüpuwu lo, kughengu I no ithi anike o qemi ye Lebanon lo asü küxüthi ani. Eno I qemi pelo o qemi gholo mla peni,

⁹ tishino asü ililai kuto peni, kughengu I no aki shiniye akeu ye kije eno jukivipu shinani.

¹⁰ I no o qemi, asü küküxümi ashothi tsüghüve keu ahu lakh lhobidi bidi, barleythi ahu lakh lhobidi bidi tsüni, atsaizü ahu lakh bidi qhethonhe lhobidi, eno thazü ahu lakh bidi qhethonhe lhobidi tsü puwuni.”

¹¹ Tyre kükau Hiram no khokichile yesü Solomon tsü puwu, “Ampeu no paw timiqo kimiye kehu Pa no o pelo pano kükau shipe.”

¹² Hiram no highi pi, “Atsütsü eno ayeghi lhokeu Ampeu Alhou sheqhelo, kughengu Pa no alokütsü nu pesü shiye kuloghi shou ka penike David tsüe. Khuu tsükhüi eno shitsa keno, pa no Ampeu chineki eno pa kükaki shiniye kuto anie.

¹³ “I no shitsa eno vethakulumi Huram-abi puwutsü ani,

¹⁴ paza ye Dan limi eno papu ye Tyremi. Pa ye ameshoyi, ghükayi, alazayi, ayi, atu ngo asü kümla eno hughai, tsülabei, hughüi, eno amekusho phi kümla lo qokiphe luve kemi. Pa ye I mpeu eno o pu David kümlami gholo aye yekütha kümla jeli kiukiu pa pülü mu, kümtsü shilu nani.

¹⁵ Tighenguno I mpeu no piveke toi ashothi ngo barley, thazü ngo atsaizü ishi o qemi tsüpuwu tsülo.

¹⁶ Eno ningu no Lebanon lono nono kiukiu sübo avehupu shimu ashuka lono Joppa kuto puighi tsüni, tilauno o pelo Jerusalem lo pewuve peni.”

¹⁷ Tishino Solomon no papu David no timi kikihi lupüake toi Israel yeghi lo inaghami xü akemi thaqhü kihiju kelo, lakh lakhi qhethonhe lhopungu küthü no aqhe tsügho aghi.

¹⁸ Tipaqo gholo pekisheni kemi 70,000, atu heküthami 80,000 ato yeghi lo picheve tsü, eno tipaqo shou jukükütsümi 3,600 süsüve.