YEKIKITHI AKINIU 19 - Sumi Naga CL (Re-edited) Bible (BSI)

Jehoshaphat no Akikili Süghi

¹ Judah kükau Jehoshaphat ye kütüsü mono Jerusalem lo pa kükaki lo ideighive.

² Ikemu Hanani nu tungkupu Jehu no akükau sasü kushoni ye ighi no pi, “No ye kixikilami kuphu eno Ampeu mithi chekemi kimiye masave keshea? Hi ghenguno Ampeu loghu o shou ighivae.

³ Tishimu o lolo akivi hami phulue, ti ye nono Asherah julho aghakhu lono ikhive tsüno o mlo tsüqhiyi Alhou phuke.”

⁴ Jehoshaphat ye Jerusalem lo ache. Pa no itaghi Beersheba lono Ephraim ghakhu ato yeghi kutolo timiqo lau wuno panongu sasü Ampeu pano puasü Lhou lau saghi.

⁵ Pa no aliwo kumto mishighüna atsütsü xaküthami süsüpe qhi,

⁶ eno xaküthami vilo pi, “Nono mlakeu lo kutokupui lo kughengu nongu ye timi ghenguno xatha anike kumoe ikemu Ampeu ghenguno ke. Pa ye nonguw xakütha lo ani.

⁷ Tishiaye Ampeu sükümsa nongu shou alo. Nongu no xatha keu lo kutokupui lo, kughengu Ampeu ni Lhou ghenguno amikucho kumo momu agikuju momu külügho kulu ye a-a kühae.”

⁸ Tinguno alau, Jehoshaphat no Jerusalem lo Levimi ngo achinemi khami eno alitomi Ampeu je lono xakütha tsü penike eno aküküpna xatha penike süsü. Panongu ye Jerusalem lo hiyam ache.

⁹ Pa no azah panongu tsü: “Nongu ye Ampeu sükümsa, amikucho eno amlo kuchou no hitoi shilo:

¹⁰ kughou no thiküzümi mishighüna lo ache kemi launo atsakügha kepu nongu lau süghini keno, ti ye aji peleve keu vehu, momu ayezah, azakütsü, pimheye vehu lo, nongu ye panongu ghutu masae, tishianguno panongu ye Ampeu zülo akipimi shimo nani, momu aloghu no nongu eno no thiküzümi shou ikughimo nani. Hitoi shi aye, nongu ye akipimi shimo nani.

¹¹ Julo, achinetou Amariah no Ampeu chineki vehu kümtsü lo nongu shou ampeu, Ishmael nu Zebadiah, Judah lo angh no akükau vehu lo ampeu, eno Levimi no hiyampemi shi nongu huthu nani. Amlo kuloghi shino mla lo eno Ampeu no akümzümi gholo apeni!”