YEKIKITHI AKINIU 18 - Sumi Naga CL (Re-edited) Bible (BSI)

Jehoshaphat ngo Ahab Küthalu

¹ Jehoshaphat no küakini ngo ajuaje auve, pa no külakupu vecheo Ahab sasü küthalu.

² Ampe hami thiu pa no Samaria lo Ahab lau iqi. Ahab no Jehoshaphat ngo pa gholo kichemi ghenguno ambe ngo amishi kütsasa heqhi tsü, eno Jehoshaphat pelo Ramoth-gilead le penike züiza.

³ Israel kükau Ahab no Jehoshaphat vilo pi, “No ye I sasü Ramoth-gilead lewuni ma?” Jehoshaphat no khochile, “Ni ye no ampi thoke, Iw timiqo ye ow timiqo thoke. Ningu no o gholo aghüshi lo wuni.”

⁴ Ikemu Jehoshaphat no pi, “Ampeu launo kimchiju paghilo,”

⁵ Israel kükau no tungkupmi 400 kutolo kukütsü no pi, “Ningu ye Ramoth-gilead lewu kepu kema?” Panongu no pi, “Lewu lo, kughengu Alhou no tokulu akükau tsü nani.”

⁶ Jehoshaphat no pi, “Ampeuw tungkupu nino ighiju kulupu kütami anima?”

⁷ Israel kükau no Jehoshaphat vilo pi, “Ningu no Ampeu vehu ighiju kulupu milakhi aphi, pa ye Imlah nu Micaiah; ikemu ni ye pa mithi cheni, kughengu pa ye khilemu I ghenguno tungkuptsa akivi pimono alhokuthu alhoksa likhi picheni.” Jehoshaphat no pa vilo pi. “Akükau ye tishi pikepu kumoe.”

⁸ Tileno Israel kükau no kijemi lakhi kuno pi, “Mtazü Imlah nu Micaiah saghilo.”

⁹ Israel kükau ngo Judah kükau pama no aküka nanu pepusü Samaria khagho lo athi kütsüghü-a lo kükalakhü lo iqa eno tungkupmi kümtsü pama zülono tungkuptsa piae.

¹⁰ Chenaanah nu Zedekiah no ayi kiboqo mlano Ahab vilo pi, “Ampeu no ishi piani, ‘Akibo hipaqo pesü nono Syriami tuhasü panongu kümtsü kütsa khave nani.’”

¹¹ Tungkupmi kümtsü no tipa tsatho pi, eno ishi pi, “Ramoth-gilead lewu no tokulu shilo. Ampeu no akükau u lo süvetsü nani.”

¹² Micaiah lau aghinimi wukeu no pa vilo pi, “Tungkupmi kümtsü no athoshi akükau lau akivi pivae. No ghi athoshi akivi pive tsülo.”

¹³ Ikemu Micaiah no pi, “Ampeu xü anike I Lhou no I vilo kiu pi keno, ni ye ti pi nani.”

¹⁴ Kughou pa no akükau Ahab zülo ighi keno akükau no pa vilo pi, “Micaiah, ningu ye Ramoth-gilead lewu kepu kema?” Pa no khochile, “Wulo eno tokulu shilo; Ampeu no o u lo sütsü nani.”

¹⁵ Ikemu akükau no pa vilo pi, “O pelo Ampeu je lono kuchou kumo aye kütau kiumu pipemo nike ni ye ghuthu khije o pelo ashoqhi shipeni kea?”

¹⁶ Pa no pi, “Israelmi ghüshimi kümtsü naghuto lo akheu küha keu mbe toi apanagha chekeu I no ithulu. Eno Ampeu no pi, ‘Hipaqo ye ampeu kühae; panongu pelo iqünhei aki lo wove pelo.’”

¹⁷ Israel kükau no Jehoshaphat vilo pi, “Pa ye I ghenguno alhoksa thono akivi tsa piqhimo nanie pi I no o vilo pike kumo?”

¹⁸ Micaiah no pi, “Tighenguno Ampeu tsa inilo: Ampeu no Pa kükalakhü lo iqa, eno Paw kungumi no Pa u piyiu ngo ajeu puthugho akeu I no ithulue.

¹⁹ Eno Ampeu no pi, ‘Khuu no Ahab pelo Ramoth-gilead lo wuno ikiqive penike züiza ani kea?’ Tile khami no atsa lakhi pi, khami no kütau piuve.

²⁰ Ikelo aghawu lakhi no Ampeu zülo ipeghi no pi, ‘I no pa züizani.’ Ampeu no iniju, ‘Kiu lono shini kea?’

²¹ Aghawu no khochile, ‘I no wuno paw tungkupmi kümtsü kichi lo akimki ghungu süve tsüni.’ Pa no pi, ‘No ye pa ghozü no tolu masae; wuno tishilo.’

²² Tighenguno itehi julo, Ampeu no ow tungkupmi kümtsü kichi lo akimki ghawu süve tsüae. Ampeu no amhekiqi o shou pukuvae.”

²³ Tileno Chenaanah nu Zedekiah no Micaiah lau ighi no pa gilo ghatsü eno iniju, “Ampeu Ghungu ye o pütsa niye khipa la no I launo wuve kea?”

²⁴ Micaiah no pi. “Jualo, nono koküthabo alou itshü niye wuke tsala lono ithi nani.”

²⁵ Tileno Israel kükau no pi, “Micaiah küghaluve lo eno pa sasü aphughi lo angh Amon eno akükau nu Joash pama lau wulo,

²⁶ eno pilo, ‘Akükau no ishi piani, Timi hipau akughuki lo khathave no I no akivishi ideighi moke kutolo asho ngo azü likhi pesü tsü aghilo.’”

²⁷ Micaiah no pi, “Nono akivishi ideighilu aye Ampeu ye I pütsa püamoe.” Pa no pi, “Nongu kümtsü hi inilo!”

Ahab ye Aghüshi lono Thive

²⁸ Israel kükau ngo Judah kükau pama no Ramoth-gilead phughi leniye wu.

²⁹ Israel kükau no Jehoshaphat vilo pi, “I no I ju kilive no aghüshiqa lo ilonike no ye o küka nanu pepusü ngolo.” Tishino Israel kükau no pa ju kilive no aghüshiqa lo ilo.

³⁰ Syria kükau no paw khurkulu küsami keptenqo azah tsü, “Israel kükau likhi thono kütami kije kitila khumu sasü aghüshi kevilo.”

³¹ Ikehu panongu no akükau Jehoshaphat ithulu kemtsa pi, “Hi no Israelmi kükaue.” Panongu no pa mjonike ighive, tile Jehoshaphat no ighamku kelo Ampeu no pa kuphu; Alhou no pa launo tipaqo satsüghüsü wuve.

³² Kughou khurkulu küsami keptenqo no pa ye Israel kükau kumoe pi kimchi luve keno, pa hamo no ideighive.

³³ Ikemu timi lakhi no inapügha paw shexilika kapuwu kelono Israel kükau kichiqho lo vesüve tsü. Tileno pa no paw khurkulu sakicheu vilo pi, “Tsüghüve no aghüshiqa lono I xapusü ipevelo, kughengu ni ye izavae.”

³⁴ Tipani kupuju aghü shive, akükau ye paw khurkulu lo puthughope Syriami küdau jupuwo ae. Tishino khetsünhe iloke ghuloki lono pa ye thive.