YEKIKITHI AKINIU 17 - Sumi Naga CL (Re-edited) Bible (BSI)

Jehoshaphat no Judah lo Kalu

¹ Asa nu Jehoshaphat no pa thisü luve eno Israel mjonike pa ampi shikumto luve.

² Pa no Judah lo aliwo kumto mishighüna kümtsü lo, eno Ephraim lo mishighüna papu Asa no hakholu keu kümtsü lo aghukhemi qhive.

³ Ampeu no Jehoshaphat gholo ae, kughengu pa no pasü David yepe bothu lo toi shike. Pa ye Baal mllamoe,

⁴ ikemu pa puasüqo Lhou phuke, eno Israelmi khuaye kumono Alhou zakütsüqo pape.

⁵ Tighenguno Ampeu no pa kükaqha iqhikumto tsü. Judah timi kümtsü no sükusho süqha pa tsü, eno pa ye küakini ngo ajuaje auve.

⁶ Ampeu qenike pa mlo no ighono akumto shie. Pa no Judah lono qhemghaike-a ngo Asherim kütsaleve tsü.

⁷ Pa yepe mpe aküthüu lo pa no paw hiyampemi Ben-hail, Obadiah, Zechariah, Nethanel, eno Micaiah pesü Judah mishighünaqo lo shika penike puwu.

⁸ Tipaqo gholo Levimi hipaqo, Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, eno Tobadonijah. Hipaqo gholo achinemi Elishama ngo Jehoram ghi puwu.

⁹ Panongu no Ampeu Yezah Kaku pesü Judah lo mishighüna kümtsü wuno timiqo shika.

¹⁰ Judah cheaxü lo kükaqha kümtsü lo Ampeu kümsa ighive, eno khunomu Jehoshaphat sasü aghü shimove.

¹¹ Philistiami khami no agho pesü Jehoshaphat tsü, eno ghükayi no sükusho süqha shi tsü, Arabiami ghi pa lau ambetsü 7,700 eno ane 7,700 süghitsü.

¹² Pa ye asheshi no mto kitheve. Pa no Judah lo aliwo kuptu ngo kuchukini pekükütsü mishighünaqo shiqhe.

¹³ Judah lo mishighünaqo lo pa no kuchukini pofushi qhive, eno Jerusalem lo ghüshimi, aghütomi qhive.

¹⁴ Ali kiqi lono hitoi aje yesülu: Judah lono, qhethonhe zatsümi: zatsüu Adnah gholo aghütomi lakh küthü;

¹⁵ pa shelo zatsüu Jehohanan gholo aghütomi lakh kini qhethonhe lhotache;

¹⁶ pa shelo Zikhri nu zatsüu Amasiah, pa ye akutoshi no Ampeu qenike ighi, gholo aghütomi lakh kini.

¹⁷ Benjamin lono: aghütou Eliada gholo azüto ngo asüzü kipemi lakh kini;

¹⁸ pa shelo Jehozabad gholo aghütomi lakh lakhi qhethonhe lhotache.

¹⁹ Timi hipaqo no akükau kümla lo ache eno akükau no panoqo pelo Judah lo aliwo kumto mishighünaqo lo khepe.