YEKIKITHI AKINIU 16 - Sumi Naga CL (Re-edited) Bible (BSI)

Asa Küxü Shekhalau

¹ Asa yepe mpe shighi akütsüghou lono Israel kükau Baasha no Judah leighi, eno Judah kükau Asa lau ipeilo keu kümtsü lakhave tsüniye Ramah phughi shiqheve.

² Tile Asa no Ampeu ki eno kükaki lo akini pekükütsü chebo lo qhipüa keu ghükayi ngo ameshoyi kümtsü Damascus lo Syria kükau Ben-hadad tsüpuwu no pi,

³ “Nikujo papu pama dolo visho acheke toi, nikujo dolo ghi anie. Julo, I no ghükayi ngo ameshoyi o tsüpuwu ani. Tighenguno Israel kükau Baasha lau visho shipüa keu xachileve lo. Nono tishi aye, pa ye I launo idechile wove nani.”

⁴ Ben-hadad no Asa tsa luve no paw ghüshimi zatsüu pelo Israel levepe, eno Ijon, Dan, Abel-maam, eno Naphtali yeghi lo kuchukini hekükütsü mishighüna kümtsü leluve tsü.

⁵ Kughou Baasha no ti chilu keno, pa no Ramah shiqhe akeu lakhape qhive.

⁶ Tileno Akükau Asa no Judah timi kümtsü sasü wuno Ramah shiqhe akeu lo atu eno asüpa luve no pewo Geba ngo Mizpah shiqheve.

⁷ Tipa ghuloki lo tungkupu Hanani no Judah kükau Asa lau wuno pi, “Nono Ampeu o Lhou pükhüni ke züqhulo Syria kükau shou pükhübe kehu, Syria kükau ghüshimi ye o launo poka luvae.

⁸ Ethiopiami ngo Libyami ye ghüshimi kihikha kümlapu shi akeu gholo khurkulu ngo khurshimi kutomo ake kumo keshea? Ikeghi nono Ampeu pükhü ke ghenguno Pa no tipaqo pesü o u lo sütsüke kumo keshea?

⁹ Khunono Ampeu lau tukutiye küha no acheni keno Pa ye akumtoshi tipaqo kuphuni ke ayeghiqha kümtsü thebei jukuto acheni. No ye hipau lo anikha shivae, tighenguno hinguno hilau no ye aghüshi cheniae.”

¹⁰ Asa no tungkupu shou amlo ideve no pa küghape ayikichhe no tshüpe qhive. Eno hipa ghuloki lono Asa no timi khami ghi ghimeve.

¹¹ Asa kümla küghütha kütau hukuthu lono ashekha kutolo, Judah ngo Israel Kükami Kaku lo yepüani.

¹² Asa yepe mpe shighi atokuu lo pa ye apukhu lo aküsü ikughive no zaghi shive. Ikeghi aküsü hipau lomu pa ye Ampeu kukuphu phumoe eno shikipivimi lau wuve.

¹³ Asa yepe mpe lhobidi lakhi shi akelono, pa ye pa puasüqo gholo zühuve,

¹⁴ Eno David phughi lo pa no atuqu kumoki chhu püakeu lo shiqhove. Panongu no axokütsüngü kümlami no axokütsüngü jeli kuto püakeu lüpa lo pa beve, eno ami kuloghi shipe pa gihue.