YEKIKITHI AKINIU 15 - Sumi Naga CL (Re-edited) Bible (BSI)

Asa no Shikikithe Süghi

¹ Alhou ghungu no Oded nu Azariah shou ikughi,

² eno pa no Asa sasü kusholu nike wuno pi, “Asa, eno nongu Judah ngo Benjamin lo küami kümtsü I tsa inilo: Ampeu ye nongu no Pa gholo ake tivilo nongu gholo ani. Nongu no Pa phu aye phulu nani, ikemu nongu no Pa pheve aye, Pa no nongu pheve nani.

³ Ado kushuo kutolo Israel ye kuchou Lhou sümo, achinemi shiküka sümo, eno ayezah pemono xüche.

⁴ Ikemu kughou panow shiluküsa lono panongu no Ampeu Israel Lhou lau ideighi no Pa phu keno, panongu no Pa phulue.

⁵ Tipa ghuloki lo aghakhu lo aküküpna kije no xüküami kümtsü qhasüpe akehu iqhoiqi ke milakhi mu aloino mlae.

⁶ Panongu pesü atachu shi hephove, shiye no shiye qhasü eno aphughi no aphughi qhasü, kughengu Alhou no aküküpna jeli pesü panongu pünaqhi ke.

⁷ Ikemu nongu ye akumto shilo! Nongu u qeive kevilo, kughengu nongu kümla ghenguno asaxü tsü nani.”

⁸ Oded nu Azariah no tungkuptsa pikeu Asa no chilu kemtsa, pa ye amlo mtoluve no Judah ngo Benjamin qha kümtsü, Ephraim ato yeghi lo mishighüna pa no hakholu keqo kümtsü lo ajulho ikhive. Pa no Ampeu chineki khala lo akümlla-khache shiqhe kitheve.

⁹ Pa no Judah ngo Benjamin timi, Ephraim ngo Manasseh eno Simeon timi khunoqo panongu gholo küghüna chekeno kümtsü hekütsü, kughengu Ampeu no pa gholo akeu timi kütsasa no ithulu kelo panongu no Israel qhive no pa lau ighive.

¹⁰ Panongu no Asa yepe mpe chighiapunguu aqhi aküthüu lono Jerusalem lo kumqolu.

¹¹ Tipa tsalani panongu no lepughi keu lono Ampeu lau amshitsü 700 eno ambe 7,000 aghashipe mllae.

¹² Panongu no pano mlo kümtsü eno angulho kümtsü süno Ampeu pano puasü Lhou phunike puloshoqhi shive,

¹³ ikemu lhothemi velami na, kiptimi totimi namu Ampeu Israel Lhou phumo keu ye pithiveni keu shive.

¹⁴ Panongu no afuko ngo akibo küigha no asütsa kuloghi lono Ampeu lau ashoqhi shive.

¹⁵ Judahmi kümtsü no puloshoqhi ghenguno alovi, kughengu panongu no amlo kümtsü süno ashoqhi shi, eno pulopinyi Pa phu kelo phulue. Ikehu Ampeu no aqha kümtsü lono alokughuno panoqo tsüe.

¹⁶ Akükau Asa no paza Maacah thotsü kükaliu lakhü lono ikhive, kughengu li no akimthipu Asherah julho mlape qhike. Asa no ajulho ghekuchope Kidron Khila lono pitileve.

¹⁷ Ikemu qhemghaike-aqo ye Israel lono ikhimoe. Tishinamu Asa mlo ye pa küxü kupuju lo Ampeu lau amikucho shiche.

¹⁸ Papuw akimthe kümllagho eno paw akimthe kümllagho, ghükayi, ameshoyi, eno abohuqo, pa no pesü Alhou kilo qhive.

¹⁹ Asa yepe mpe shighi apunguu kutolo aghükishi kiumu kühae.