YEKIKITHI AKINIU 14 - Sumi Naga CL (Re-edited) Bible (BSI)

Asa no Judah lo Kalu

¹ Abijah ye pa puasüqo gholo zühuve eno David phughi lo qhove. Eno pa nu Asa no pa thisü luve. Pa ghuloki lo aghakhu ye ampe chighi kutolo akulho qhilu.

² Asa ye Ampeu pa Lhou zülo kiu no akivi eno achipi keno ti shike.

³ Pa no inami kümlla khache, qhemghaike-a ikhive, atsükuchoqo hephove tsü, eno Asherah julho ghekuchove tsü.

⁴ Pa no Judahmi vilo Ampeu pano puasü Lhou pulou shilopi azah tsü, eno ayezah ngo azakütsü pape penike azah tsüe.

⁵ Pa no Judah lo mishighüna kümtsü lo qhemghaike-aqo ngo tsüngqüi keu kiptiaqo ikhive tsü. Eno aghakhu ye pa küka qholono akulho qhilue.

⁶ Pa no Judah lo aliwo kumto mishighünaqo shiqhe, kughengu aghakhu ye akulhoqhi ake. Tipa ghuloki lo pa ye aghü shimoe kughengu Ampeu no alokughuno pa tsüke.

⁷ Pa no Judah lo akemi vilo pi, “Ningu mishighüna hipaqo shiqheni ighilo, eno tipaqo homxape aliwo ngo qogheki eno khagho ngo akhaduqo mlanie. Aghakhu hi ye niw aphi, kughengu nino Ampeu ni Lhou phu kelo Pa no ako kümtsü lono iqüghai keu ningu tsüe.” Ikehu panongu no shiqhe eno ikoishelu.

⁸ Asa ye Judah lono ghüshimi azüto kijeje kipemi ngo angu kipemi lakh küthü, eno Benjamin lono azüto kipemi ngo shexilika kipemi lakh kini qhethonhe lhotache ache. Hipaqo kümtsü aghütomi ke.

⁹ Ethiopiami Zerah no pa mjonike paw ghüshimi qhethonhe chighi eno khurkulu 300 sasü Mareshah kutolo ighive.

¹⁰ Asa no pa mjonike wuno Mareshah lo Zephathah Khila lo kithepe ngoluve.

¹¹ Asa no Ampeu pa Lhou lau ighamku inikhu, “O Ampeu, akumtomi ngo miqemlei kemi dolo kuphu tsüni keu O toike khumu kühae. Ni kuphu tsülo, kughengu ningu ye O shou pükhü ani, eno O je lono ningu ye aqokitikhi sasü kumjoni ke ighi ani. O Ampeu, No ye ni Lhou ke, khuu pelomu ni theqhivepe kevilo.”

¹² Ikehu Ampeu no Asa ngo Judahmi zülono Ethiopiami theqhive, eno Ethiopiami ye kuha pove.

¹³ Asa ngo paw ghüshimi no Gerar kutolo panoqo hawu eno Ethiopiami lakhimu püxümo no pithi khave, kughengu panongu ye Ampeu ngo Paw ghüshimi mukhumuno shive tsüke. Judahmi no aghüshi lono hakholu keu thime kutomo pesü wuve.

¹⁴ Panongu no Gerar hokümxa lo mishighünaqo kümtsü leluve, Ampeu kümsa no kümtsü shou ikughive. Panongu no mishighüna kümtsü xüleve tsü, kughengu tile xulelu kepu kutomo ake.

¹⁵ Panongu no lhoxü kipighimi phiki ghixüve tsüno ambe ngo sayeshi kütsasa sasü wuve. Tishino panongu ye Jerusalem lo idewove.