YEKIKITHI AKINIU 13 - Sumi Naga CL (Re-edited) Bible (BSI)

Abijah no Judah lo ka

¹ Akükau Jeroboam yepe mpe chighiakütacheu lono Abijah no Judah lo ayepelu.

² Pa ye Jerusalem lono ampe küthü ayepelu. Pa za ye Gibeahmi Uriel nonga Micaiah. Abijah ngo Jeroboam pama aghüshi.

³ Abijah no aghütomi lakh bidi sasü aghüshi lo wu. Eno Jeroboam no aghütomi kishekiphe lakh tache sasü kithepe ngoluve.

⁴ Abijah no Ephraim ato yeghi lo Zemaraim Toghi lo ngoluve no pi, “O Jeroboam ngo Israelmi, I tsa inilo!

⁵ Ampeu Israel Lhou ye amti puloshoqhi vecheo Israel küka pesü alholo David ngo pa nuliqo tsüe pi nongu ye mtha keshea?

⁶ Ikeghi David nu Solomon qeu Nebat nu Jeroboam no pa mpeu sasü kumjo ani,

⁷ eno ame küküha kixikilami no pa gholo süküqha no Solomon nu Rehoboam hebide eno Rehoboam ye alhothe eno puju shijumo kehu tipaqo puqhe mlave.

⁸ “Itehi nongu ye Ampeu no David laghami tsüve keu kükaqha sasü kumjoni ke kümsü no aqokitikhi kije cheni, eno nongu lhou shi penike Jeroboam no mlatsü keu ameshoyi mishitsüqo sasü cheni.

⁹ Nongu no Ampeu chinemi, Aaron laghami eno Levimi hapupove no ashiaye kütami no shicheke toi nongu kutoshi no achinemi süsüve ke kumo keshea? Khukhumu amshitsü lakhi momu ambe tsüni peighi keu ye kichile lhou chinemi shivepe.

¹⁰ Ikemu ni ghengu ye Ampeu no ni Lhou, eno ningu ye pa pheve mphie. Ningu ye Aaron laghami no Ampeu chinemi shi, eno Levimi no panoqo kuphu cheni.

¹¹ Panongu no ina kijili atsütsü Ampeu lau akipti kümllagho ngo axokütsüngü pesü tsücheni, ameshoyi akiviu kibepu lo asho kutope qhitsü cheni, eno ameshoyi kulu kibepu tucho cheni, tishianguno akulu pelo kijili atsütsü iqü peniye ke. Ningu ye Ampeu no azah tsükeu pape cheni, ikemu nongu ye Pa phevae.

¹² Julo, Alhou no ni sakipheu shino ni gholo ani, eno Pa chinemi no aghüshi fuko pesü nongu sasü aghü shinike kuniye kutope ani. O Israel nuliqo, Ampeu nongu puasü Lhou sasü aghüshi kevilo, kughengu nongu ye tomla nani.”

¹³ Jeroboam no pa nongu zübou no panongu le penike ghüshimi puwu. Ikehu pa gholo ghüshimi no Judahmi zülo ngokhe eno amqo lakhi no pano zübou ngoluve.

¹⁴ Kughou Judahmi no ju keno, ghüshimi no pano züu eno athiu aghive. Panongu no Ampeu lau ighamku eno achinemi no afuko igha.

¹⁵ Tishino Judahmi no aghügha kije lono aghüleku. Kughou Judahmi no igha keno, Alhou no Abijah ngo Judah zülono Jeroboam ngo Israelmi kümtsü theqhive.

¹⁶ Israelmi no Judahmi zülono pove, eno Alhou no panongu pesü Judah u lo sütsü.

¹⁷ Abijah ngo paw ghüshimi no akumto kije lono panongu pithive, ikehu Israel ghüshimi kishekiphe pano lakh pungu thive.

¹⁸ Judahmi no Israelmi mhoqhive, kughengu panongu no Ampeu pano puasü Lhou shou pükhübe ke.

¹⁹ Abijah no Jeroboam hawu no mishighünaqo luvetsü: Bethel eno tile aphuqo, Jeshanah eno tile aphuqo, Ephron eno tile aphuqo.

²⁰ Abijah ghuloki lo Jeroboam ye pa küka xamlave. Eno Ampeu no pa hekulu qhive no pa ye thive.

²¹ Abijah ye aküka kumto alau shive. Pa ye anipu chighibidi eno anu muku kini, anga chighitsügho ache.

²² Abijah kümla küghütha kütau, pa küxü eno pa tsapi ye tungkupu Iddo xülhe lo yepüani.