YEKIKITHI AKINIU 12 - Sumi Naga CL (Re-edited) Bible (BSI)

Egypt no Jerusalem Le

¹ Kughou Rehoboam no pa yepe iqhikumto pe mtotoi luve keno, pa eno pa gholo Israelmi kümtsü no Ampeu yezah milive.

² Akükau Rehoboam yepe mpe apunguu lono Egypt kükau Shishak no Jerusalem leighi, kughengu panongu no Ampeu pükhü move ke.

³ Khurkulu 1,200, khurshimi 60,000, eno kihikha kümla ghüshimi no Shishak sasü Egypt lono ighi—tipaqo ye Libya, Sukkim, eno Ethiopia timiqo ke.

⁴ Pa no Judah lo aliwo kumto mishighünaqo leluve eno Jerusalem kutolo ighive.

⁵ Rehoboam ngo Judah lo sakiphemi no Shishak ghenguno Jerusalem lo hekütsüpe akelono tungkupu Shemaiah no ighi no panongu vilo pi, “Ampeu no ishi piani, ‘Nongu no I qhiveke ghenguno I no nongu pesü Shishak u lo süve tsüae.’”

⁶ Tileno akükau ngo sakiphemi no panongu pesü kuchuni no pi, “Ampeu ye amikuchoe.”

⁷ Kughou panongu no kuchunive keu Ampeu no ithulu keno, Ampeu tsa Shemaiah lau ighi: “Panongu no pano kuchunive ake ghenguno Ni ye panongu kütsa moae, ikemu I no panongu xaphelu kepu tsüni, eno Shishak vecheo Jerusalem lo I loghu lepuku moae.

⁸ Tishimu panongu ye Shishak qemi shini, tishianguno panongu no I qekeu ngo aghakhu kükaqhaqo qekeu dolo kütüqü akeu vethalu nani.”

⁹ Ikehu Egypt kükau Shishak no Jerusalem leighi no Ampeu kilo eno kükaki lo küakini kümtsü pewuve tsü. Pa no thokha kümtsü pewuve. Solomon no mlakeu ameshoyi zütoqo ghi kümtsü pa no pewuve.

¹⁰ Tipaqo theli lo, akükau Rehoboam no alazayi zütoqo mla eno akükau ki hukikha lo aghukhemi shou kijemi shiche keqo pelo ti jukütsü penike pichetsü.

¹¹ Akükau no Ampeu kilo iloke kümtsü lo aghukhemi no azüto tipaqo pesü wuche eno tishive kethiu itaghi azütoqo pewo aghukhe chebo lo qhive che.

¹² Kughou pa no pa ampi kuchuni keno, Ampeu loghu ye pa launo tsüghüve eno tino qhoi kütsaleni keu lono süsholu. Tinguno alau Judah lo ado aghuloki kivi ighive.

¹³ Ikehu Akükau Rehoboam ye Jerusalem lo mtotoi ayepe. Rehoboam ye ampe lhobidi lakhi shi akelono ayepe eno Jerusalem lono ampe chighitsüni ayepelu, Jerusalem ye Ampeu no Israel shiaye kümtsü dolono kishelu keu phughi ke.

¹⁴ Rehoboam no alhoksa mlae, kughengu pa ye Ampeu phu keu lo pa mlo tsümoe.

¹⁵ Akükau Rehoboam kümla küghütha kümtsü, abothu lono ashekha kutolo, tungkupu Shemaiah ngo Iddo pama yekikithi lo yepüani ke kumo keshea? Rehoboam ngo Jeroboam pama ye ishokibe aghü shiche.

¹⁶ Rehoboam ye pa puasüqo gholo zühuve eno David phughi lo shiqhove, eno pa nu Abijah no pa thisü luve.