YEKIKITHI AKINIU 11 - Sumi Naga CL (Re-edited) Bible (BSI)

Rehoboam no Kükaqha Süsholu

¹ Kughou Rehoboam no Jerusalem lo ighi keno, pa no Judah ngo Benjamin lagha lo ghüshimi kishekiphe lakh lakhi qhethonhe lhotache kukütsü no Israel sasü aghü shino kükaqha süsho niye shi.

² Ikemu Alhou timi Shemaiah lau Alhou tsa ighi:

³ “Judah kükau Solomon nu Rehoboam eno Judah ngo Benjamin eno Israelmi kümtsü vilo pilo,

⁴ ‘Ampeu no ishi piani, Nongu ye no thiküzümi sasü aghü shinike wu kevilo. Timi kümtsü pütüta kilo idewove lo, kughengu hi ye I launo ke.’” Ikehu panongu kümtsü no Ampeu tsa luno idewove eno Jeroboam sasü aghü shinike wumove.

⁵ Rehoboam ye Jerusalem lo acheuve eno sükusho ghenguno pa no Judah lo mishighünaqo shiqhe.

⁶ Pa no hipaqo shiqhe, Bethlehem, Etam, Tekoa,

⁷ Beth-zur, Soco, Adullam,

⁸ Gath, Mareshah, Ziph,

⁹ Adoraim, Lachish, Azekah,

¹⁰ Zorah, Aijalon, eno Hebron, hipaqo ye Judah ngo Benjamin lo aliwo kumto mishighünaqo ke.

¹¹ Pa no aliwoqo mtotoi mlave eno lakhikhi lo zatsüu süsüpe qhino achuqupu, thazü, eno atsaizü kutope qhitsü.

¹² Pa no mishighüna kümtsü lo azüto ngo angu pesü shikumtope qhive. Hitoi pa no Judah ngo Benjamin pesü pa qholo qhive.

Achinemi ngo Levimi

¹³ Israel kümtsü lo achinemi ngo Levimi akemi no chesü akükau lau ighi.

¹⁴ Levimi no panow aqü yeghi ngo amheghiqo qhive no Judah ngo Jerusalem lo ighive, kughengu Jeroboam ngo pa nuliqo no pano pelo Ampeu chinemi shipe move,

¹⁵ Jeroboam no qhemghaike-a lo ane ngo amshiti mla keqo ghenguno pa chinemi süsüve.

¹⁶ Israel shiaye dolo khunono Ampeu Israel Lhou mllani shikeno tipaqo ye Levimi papesü Jerusalem lo wuve, eno panongu no Ampeu pano puasü Lhou lau aghashie.

¹⁷ Panongu no Judah kükaqha shikumto eno ampe küthü kutolo Solomon nu Rehoboam süsho, kughengu panongu no ampe küthü kutolo David ngo Solomon la lo cheche ke.

Rehoboam Kibolomi

¹⁸ Rehoboam no David nu Jerimoth nga Mahalath pesü pa nipu shive, li paza ye Jesse nu Eliab nonga Abihail.

¹⁹ Li no anu hipaqo punutsü, Jeush, Shemariah, eno Zaham.

²⁰ Li thiu pa no itaghi Absalom nonga Maacah luve, li no anu hipaqo punutsü, Abijah, Attai, Ziza, eno Shelomith.

²¹ Rehoboam no pa nipuqo eno alojilimi kümtsü dolo Absalom nonga Maacah kimiye (pa ye anipu chighitache lu eno alojilimi lhotsügho ache, anu muku tache, eno anga lhotsügho ache).

²² Rehoboam no Maacah nu Abijah pelo pa thiküzümi shou kükaputou shipe kughengu pa ye Abijah pesü akükau shipenike kughu ae.

²³ Pa no alokütsü shi pa nuli shou amakho pipe, Judah ngo Benjamin tokukujo kümtsü lo eno aliwo kumto mishighünaqo lo pa nuli khami kije puwuve, eno chuqu-kusho kupukuno shi tsüpuwu no panongu ghenguno anipu lutsüe.