YEKIKITHI AKINIU 10 - Sumi Naga CL (Re-edited) Bible (BSI)

Rehoboam Shou Hebide

¹ Rehoboam no Shechem lo wu, kughengu Israelmi kümtsü no Shechem lono pa pesü akükau shinike hekütsü ae.

² Kughou Nebat nu Jeroboam no ti chilu keno (pa ye Solomon msano Egypt lo pove ke tikutolo tilau ake), pa no Egypt lono ideighi.

³ Eno panongu no pa kupuwu kehu, Jeroboam ngo Israelmi kümtsü Rehoboam lau ighi no pa vilo pi,

⁴ “O pu Solomon no ighono ni ghime püani. Tighenguno itehi o pu ghime kümla ngo paw kuokhasü kimshi ni launo kümthü tsülo, tishi aye ningu no o qeni.”

⁵ Pa no panongu vilo pi, “Atsala küthü thiuno ideighi lo.” Ikehu panongu no wuve.

⁶ Akükau Rehoboam no papu Solomon qholo mlache kemi layemi sasü küsütsa ju, “Timi hipaqo khochile nike nongu ye kiu kükümsü I tsüni kea?”

⁷ Panongu no pi, “Nono ishi panongu lau akivi piye, panongu lopu shitsü eno atsa kivi pi aye, panongu ye alhokuthu o qemi shi nani.”

⁸ Ikemu pa no layemi kükümsü lumove eno lhothemi pa sasü kümtsa xüighi no pa zülo puthugho akeqo kükümsü luve.

⁹ Pa no panongu vilo pi, “Timi hipaqo no I vilo, ‘O pu no ni xapipe keu kho kümthü tsülo,’ ipi akeu lo nongu ye kiu kükümsü pesü I tsüni kea?”

¹⁰ Lhothemi pa sasü xüighi keqo no pi, “Timi khunoqo no o vilo, ‘O pu no ni xapipe keu kho kümthü tsülo,’ ipi keno tipaqo vilo ishi pilo, ‘I uloti anipau huno I pu luko nguno shishoi ani.

¹¹ Ikehu I pu no amakho kije pesü nongu shou betsü keu gholo I no süküpha tsüni. I pu no akighikipili pesü nongu sakiyi, ikemu I no achuwopaza pesü nongu ghaqhi nani.’”

¹² Ikehu atsala aküthüni, Jeroboam ngo timi kümtsü Rehoboam no, “Atsala aküthüni no ideighi lo,” ipike toi pa lau ighi.

¹³ Akükau no layemi kükümsü lumove no mkamihi timiqo khochile,

¹⁴ Akükau Rehoboam no lhothemiqo no pikeu kiqi lono pi, “I pu no nongu makho kimshi tsükeu gholo I no süküpha tsüni. I pu no akighikipili pesü nongu sakiyi, ikemu I no achuwopaza pesü nongu ghaqhi nani.”

¹⁵ Ikehu akükau no timiqo tsa initsü move, kughengu ti ye Ampeu no Shilohmi tungkupu Ahijah vecheo Nebat nu Jeroboam vilo pi püakeu tsa shikupu niye ke.

¹⁶ Kughou Israelmi kümtsü no akükau no panongu tsa initsü move keu ithive keno, panongu no akükau khochile, “David launo ni saje kiu ani kea? Ningu ye Jesse nu launo amheghi kiumu kühae. O Israel, pütüta pusho lo idewove lo! O David, o kibo julo.” Tishino Israelmi ye pütüta pusho lo wove.

¹⁷ Ikemu Judah phughi lo Israelmi akeqo shou Rehoboam no ayepe.

¹⁸ Tishino Akükau Rehoboam no anguka lono akümla shikemi shou ampeu Hadoram hape Israelmi lau puwu, ikelo Israelmi no atu pesü pa veqhi pithive. Akükau Rehoboam no paw khurkulu lo mtazü ikuno Jerusalem lo pove.

¹⁹ Ikehu ishi kutolo Israelmi ye David kibolomi sasü kumgho acheni.