YEKIKITHI AKINIU 1 - Sumi Naga CL (Re-edited) Bible (BSI)

Solomon no Gibeon lono Mlla

¹ David nu Solomon ye pa kükaqha iqhikumto luve, eno Ampeu pa Lhou no pa gholo akehu pa pesü shishe kije shivetsü.

² Solomon no Israelmi kümtsü, ghüshimi qhethonhe mqo eno aqhe mqo shou atomi, xaküthami, Israel lo sakiphemi kümtsü, eno ali lo akütsü kümtsü sasü küptsa.

³ Pa no hoho lo ighi kemi kümtsü Gibeon lo qhemghaike-a lo sawu, kughengu Ampeu qeu Moses no asayeqha lono Alhou sasü küptsa chekeu phiki mlakeu ye tile acheke.

⁴ (Ikemu David no Alhouw Puloshoqhi bohu Kiriath-jearim lono pesü ighi no Jerusalem lo pa no aphiki kuto püakeu lo qhive.)

⁵ Tinguno alau, Hur nu Uri nu Bezalel no mlakeu alazayi kiptia ghi tilau Ampeuw kungo-a chebo zülo ae, tighenguno Solomon ngo hoho no tilau wuke.

⁶ Solomon no kuposhukulu phiki lo wuno Ampeu zülo alazayi kiptia lono akipti kümlla qhethonhe pesü mllae.

Solomon no Alokütsü Khu

⁷ Tipa ji Alhou no Solomon zülo ipeghi no pi, “Ni ye kiu o tsü penishi ani keno khulo.”

⁸ Solomon no Alhou vilo pi, “Nono I pu David lau iqemokeu kikimiye kije piye eno I pelo pa-a lo kalu peke.

⁹ O Ampeu Alhou, O tsa I pu David lau piqhi keu shikupu tsülo, kughengu Nono I pelo timi ayeghimkhu jehi shou akükau shive apeke.

¹⁰ Itehi ye timi hipaqo sapheni ke alokütsü eno akighithi I tsülo, kughengu khuu no Ow timi hijeje shou ayepe luni kea?”

¹¹ Alhou no Solomon khochile, “Hino o mlo lo akehu no ye amheghi, akini, ajekipi, o mithi kemi küxü, momu axükushu khumoe, ikemu timi khunoqo shou I no o pelo akükau shipe keno tipaqo shou ayepe nike nono alokütsü eno akighithi khuke ghenguno,

¹² alokütsü eno akighithi ye o tsüvae. Itaghi I no küakini, amheghi, eno ajekipi o tsüni, ti ye o züu kükami khunomu ithulu püamo eno o thiumu khunomu ithulumo nani.”

¹³ Tishino Solomon ye Gibeon lo qhemghaike-a lo kuposhukulu phiki lono Jerusalem lo ideighive. Eno pa no Israel shou ayepe.

Küakini Solomon Tsü

¹⁴ Solomon no khurkulu ngo khurshimi hekütsü kelo khurkulu 1,400 eno khurshimi 12,000 aghi. Pa no tipaqo pesü khurkulu phughiqo lo qhive eno hami no Jerusalem lo pa gholo qhive.

¹⁵ Akükau no Jerusalem lo ghükayi pesü atu toi balha shive tsü, eno cedar pesü Shephelah lo tüküthibo toi kütsasa shive tsüe.

¹⁶ Paw khurshiqo ye Egypt ngo Kue lono süghiche, pa lhikishimi no Kue lono qhüche.

¹⁷ Khurkulu ye Egypt lono ghükayi ahu 66 eno khurshi no ghükayi ahu lakhi tüxa no qhüche. Titoi alhikishimi vecheo tipaqo pesü Hittimi ngo Syria kükami lau tsüpuwu che.