XAKUTHAMI 9 - Sumi Naga CL (Re-edited) Bible (BSI)

Abimelek no Küsüqe

¹ Gideon nu Abimelek no Shechem lo paza no bolomi lau wuno alaghami kümtsü vilo pi,

² “Shechem lo sakiphemi kümtsü vilo pilo, ‘Nongu ghenguno khikhiu pavi ani kea, Jerubbaal nuli pano 70 kümtsü no nongu shou ayepe peni keo, milakhi no pepeni kea?’ Ni ghi nongu ji lo kiyighi kepi kümsülu lo.”

³ Pa ngulimi no Shechem lo sakiphemi kümtsü kini lo hipau ghili pisütsü kelo, panongu no Abimelek papeni keu küghathave eno pi, “Pa ye ni thiküzüue.”

⁴ Panongu no Baal-berith chineki lono ghükayi 70 pesü pa tsü, eno pa no tipau pesü avehu kükühami ngo inapüghami piqe no pa papemi shipe.

⁵ Tishino pa no Ophrah lo papu kilo wuno atu lakhi shou no pa thiküzümi, Jerubbaal nuli pano 70 pithive. Ikemu Jerubbaal nu ayitiu Jotham ye itshü luve kehu pithi mlave.

⁶ Shechem ngo Beth-millo lo sakiphemi kümtsü Shechem lo kumqo eno aphisübo phivilo atsükucho lono Abimelek pesü panongu kükau shive.

⁷ Kughou Jotham no ti chilu keno, pa no Gerizim Toghi lo iqho no ighamku sheshu, “Nongu Shechem lo sakiphemi, Alhou no nongu sütsa initsü penike I sütsa inilo.

⁸ Khaghi asüboqo no akükau kisheni ke kumqo, panongu no olive sübo vilo pi, ‘Ni shou ayepe lo.’

⁹ Ikemu olive sübo no khochile, ‘Ni ye asüboqo shou ayepe niye Iw pekighi lono alhouqo ngo timiqo no agigihu ithulu chekeu pheve lopi keshea?’

¹⁰ Itaghi asüboqo no mububo vilo pi, ‘Nono ighi no ni shou ayepe lo.’

¹¹ Ikemu mububo no pi, ‘Ni ye asüboqo shou ayepe niye I xathi kivi ngonyi keu qhiveni keshea?’

¹² Asüboqo no atsaibo vilo pi, ‘Nono ighi no ni shou ayepe lo.’

¹³ Ikemu atsaibo no pi, ‘Ni ye asüboqo shou ayepe niye Alhou eno timi lopivilu chekeu I tsaizü qhiveni keshea?’

¹⁴ Tileno asübo kümtsü no asahubo vilo pi, ‘Nono ighi no ni shou ayepe lo.’

¹⁵ Asahubo no pi, ‘Nongu no süchou no I pesü nongu kükau shi penike I nukishe aye, I kicheqho ije ighilo, tishimo aye asahubo lono ami ipeghi no Lebanon lo cedar ghasü mühavepe nani.’

¹⁶ “Tighenguno itehi, nongu no süchou no eno akikhi shi Abimelek pesü nongu kükau shi anima? Jerubbaal ngo pa kibolomi kümla kihitsü eno tipau kiqi lono tsüchile anima?

¹⁷ Kughengu I pu ye nongu ghenguno aghü shino pa küxü ghi küpümo no Midianmi u lono nongu xaphe ke.

¹⁸ Ikemu ishi tsala lono nongu no I pu kibolomi hebide ipeghivae, eno atu lakhi shou no pa nuli 70 pithive tsüno pa qeliu nu Abimelek no nongu bolomi shiaghi kehu pa pesü Shechem lo akükau shivae.

¹⁹ Nongu no Jerubbaal eno pa kibolomi lau süchou no eno akikhi shi hi shi püaghi aye, Abimelek pesü nongu lokivipu shi eno nongu no pa lokivipu shialo.

²⁰ Ikemu tishimo aye, Abimelek phi lono ami iqü ipeghi keu no Shechem ngo Beth-millo lo sakiphemi pitiqhive peni; eno Shechem ngo Beth-millo lo sakiphemi phi lono ami iqü ipeghi keu no Abimelek pitiqhive peniu.”

²¹ Tishino pa mu Abimelek msa kelauno Jotham ye pove no Beer lo acheuve.

Abimelek Ikiqive

²² Abimelek no ampe küthü Israel lo ayepe.

²³ Tithiu Alhou no Abimelek ngo Shechem lo sakiphemi dolo mithekumo ghungu puwu no Shechem lo sakiphemi no Abimelek hebide ipeghi pe,

²⁴ tishikeu lono Jerubbaal nuli 70 lau akümla lhoksa shikeu ipeghive peniye ke, eno panongu ji ye pano thiküzüu Abimelek khuu panongu pithive keno pa shou, eno Shechemmi khunono Abimelek shikumto keno, tipaqo shou ghi ikughi peniye ke.

²⁵ Shechem lo sakiphemi no naghuto tsüqo kümtsü lo timiqo pesü pa theniye küghütshü, eno tipaqo no timi kümtsü pükaqhi. Ikelo asütsa hipau Abimelek tove.

²⁶ Tithiu Ebed nu Gaal no pa kibolomi sasü Shechem lo ighi, eno Shechem lo sakiphemi no pa pükhübe luve.

²⁷ Panongu no pütüta tsailu lo huno atsaithi xope aji mlano aghulhu kije shi eno pano lhou kilo ilo no chusho püzü Abimelek thaigha.

²⁸ Ebed nu Gaal no pi, “Abimelek ye khuu eno ningu Shechemmi ye khuue pi ningu ye kushiye pa qeni kea? Pa ye Jerubbaal nu, eno pa qholo kijemi huno Zebul ke kumo? Shechem papu Hamor timiqo qeni thono kushiye ningu ye Abimelek qemasa kea?

²⁹ Timi hipaqo no I u bokhu lo aghike aye lae! Ni ye Abimelek ikhiveni chekewa. I no pa vilo piniche, ‘Ow ghüshimi kughuko no ipeghi lo.’”

³⁰ Kughou mishighüna yepeu Zebul no Gaal tsa chilu keno, pa mlo ideve.

³¹ Pa no küsüu no Abimelek lau atsapemi pelo piwu pe, “Ebed nu Gaal no pa kibolomi sasü Shechem lo ighi no o mjochile nike xüküami xukutho ani.

³² Tighenguno no eno ow timiqo ye putho lono cheve no aluza lo aghüthe luvelo.

³³ Tishino thanau inaqhe khetsünhe ipeghi kemtsa ithu no aphughi lo koha iloghi lo. Gaal ngo paw timiqo no o mjochileni ke ipeghi kelono nono khije panongu kütsa luni keno tishilu lo.”

³⁴ Ikehu Abimelek ngo paw timiqo no putho lono wo Shechem khalau amqo bidi shi ngoluve.

³⁵ Kughou Abimelek eno paw timiqo no Gaal no aphughi khagho lo puthugho akeu ithulu keno pütüta küghütshü-a lono ithughive.

³⁶ Eno kughou Gaal no panongu ithulu keno, pa no Zebul vilo pi, “Julo, naghuto tsüqo lono timiqo iqi cheni!” Zebul no pi, “No ye naghuto yekükhü pesü timi küghashi ani.”

³⁷ Gaal no itaghi pi, “Julo, atoghi mta lono timiqo iqi cheni eno aloji lakhi no chine chini phisübo küdau no iqi chenie.”

³⁸ Tileno Zebul no pa vilo pi, “O qheküza tsa khilave akea? ‘Abimelek ye khuue pi ningu ye kushiye pa qeni kea?’ ipi nono ni vilo pi akehu, timi hipaqo ye nono thaigha akeqo ke kumo? Ipe no panongu sasü aghü shilo.”

³⁹ Gaal no Shechem lo sakiphemi sasü ipe no Abimelek sasü aghü shithuve.

⁴⁰ Abimelek no Gaal hasü khagho kutolo ipeve, eno panongu no poche kelo timi kutomo aghüzaku xapu ikiqive.

⁴¹ Tithiu Abimelek ye Arumah lo ache eno Zebul no Shechem lono Gaal ngo pa kibolomi hapupo khave, ikehu panongu ye tile küghüna mlave.

⁴² Tishiwo thoghiu timiqo no alu lo huniye akeu sütsa Abimelek tsüve.

⁴³ Pa no paw timi amqo küthü shi kijeve no aluza kheluve; timiqo no aphughi lono ipeche keu miqe apüzü panongu pithive.

⁴⁴ Abimelek no pa mqo sasü poilo aphughi khagho kheluve, eno amqo kini aluza lo küghütshü püakeqo no aluza lo timiqo ghiqhi khave tsü.

⁴⁵ Abimelek no tipa tsala kupuju aphughi lo akeqo sasü aghü shino tile küghüna akeqo heqhi pithive; pa no aphughi tipau kütsave tsüno amti pesü jonhave tsü.

⁴⁶ Kughou Shechem lo sakiphemi kümtsü no tipau ghili chilu keno panongu no El-berith chineki sükusho-a lo ilove.

⁴⁷ Panongu ye tile hekütsüpe anie pi khami no Abimelek vilo pive.

⁴⁸ Abimelek no paw timiqo sasü Zalmon Toghi lo iqho. Pa no amüghü pesü asübo yeqhi no alokaqo thape piqhe no pa bighi lo beluve. Eno paw timiqo vilo pi, “Mtazü I no shike toi nongu ghi tishilo.”

⁴⁹ Ikehu timi kümtsü no asübo yeqhi no asü lokaqo piqhepe Abimelek pape wuno sükusho-a bophi lo qhino ami süve, ikelo Shechem Qoghe lo akemi kiptimi totimi kümtsü kelo 1,000 qhalo tileno pitiqhive.

⁵⁰ Tishino Abimelek no Thebez lo wuno khasüpe leluve.

⁵¹ Ikemu aphughi alou akumto qogheki lakhi akehu kiptimi totimi eno sakiphemi kümtsü tipau lo poilove, panongu no khathasü ilove no tilauno qogheki kütsüqa lo ikuve.

⁵² Abimelek no qogheki lo ighi no le thuve eno ahukikha phivilo ighi no ami süve tsüniye shi.

⁵³ Tile topumi lakhi no athi kütsüghü tuqu pesü pa kütsü lo vepuku no pa boghe kubove tsü.

⁵⁴ Tipa mtsa pa no pa züta-angu kipeu apumi kuno pi, “O zütakikihi pesü I ghiqhive lo, tikumo aye panongu no ishi I ghili kügha cheniae, ‘Topumi no pa pithive ke.’” Kuchono apuu huno pa jipilive no pithive.

⁵⁵ Kughou Israelmi no Abimelek thive keu ithulu keno, panongu kümtsü pütüta kilo idewove.

⁵⁶ Abimelek no pa thiküzümi 70 pithive keu lono papu shou küsakügha shive keu lo Alhou no hitoi pa tsüchileve.

⁵⁷ Shechem timiqo ghi Alhou no pano xine pesü pano kütsü lo ikughipe, eno Jerubbaal nu Jotham no ghusho püake toi pano shou ikughie.