XAKUTHAMI 8 - Sumi Naga CL (Re-edited) Bible (BSI)

Zebah ngo Zalmunna Theqhi

¹ Ephraim timi no Gideon vilo pi, “No ye kushiye Midianmi sasü aghü shini kelo ningu kumono hitoi ni peitha kea?” Tishino panongu no ighono pa nguku.

² Ikemu pa no khochile, “Nongu sasü kimheju kelo ni ye kiu mla kea? Ephraim lo atsaithi kiche kütsülu keu no Abiezer lo atsaithi ghile nguno akiviu ke kumo?

³ Alhou no nongu u lo Midian yepemi Oreb ngo Zeeb pama sütsüe. Imaye nongu sasü kimhe kelo, ni ye kiu ala mlalu kea?” Kughou pa no hi pi keno, panongu mlo kighide iqüve.

⁴ Tishino Gideon no pa gholo timi 300 chekeu sasü Jordan lo ighi no kathasü ikuve. Panongu ye akulho shive kemu aghümi hache.

⁵ Ikehu pa no Succoth lo küami vilo pi, “Kimiyeno asho pesü Iw timiqo tsülo. Panongu ye akulho shivae eno ni ye Midian kükau Zebah ngo Zalmunna pama hacheni.”

⁶ Succoth lo hiyampemi no pi, “Zebah ngo Zalmunna pama ye nongu u lo iloghi mphi mu kushiye ningu ye asho pesü ow ghüshimi tsüni kea?”

⁷ Tileno Gideon no pi, “Tishi aye Ampeu no Zebah ngo Zalmunna pama pesü I u lo süvetsü kethiu no I no asayeli lo sahu ngo ayemhi pesü nongu phimpi lo munuda tsüni.”

⁸ Gideon no tileno Penuel lo wuve eno panongu vilo ghi atho qhüiniju, ikemu Penuel lo küamiqo ghi Succoth lo küami toi khochileve.

⁹ Pa no Penuelmi vilo pi, “I no tokulu shi ideighi kelono hipau qogheki kuboleve tsüni.”

¹⁰ Zebah ngo Zalmunna pama no ghüshimi sasü Karkor lo ngoae. Kipelau ghüshimi kutomo gholo pano 15,000 qhalo likhive, kughengu lakh lakhi qhethonhe muku ye pithive tsüe.

¹¹ Nobah ngo Jogbehah lono kipelau Gideon no aphiki lo kungomi laghi züsü iqho no aghümi le.

¹² Midian kükami Zebah ngo Zalmunna pama ye pove, ikemu pa no hasü wuno küghaluve eno pama ghüshimi kümtsü akümsa lono pokhave.

¹³ Tishino Gideon no aghüshi lono Heres kita lono ideighi.

¹⁴ Pa no Succothmi apumi lakhi küghaluve no pa vilo iniju. Apumi huno Succoth lo hiyampemi ngo layemi pano 77 je yepe Gideon tsü.

¹⁵ Gideon no Succoth lo timiqo lau wuno pi, “Zebah ngo Zalmunna pama julo, pama ghenguno nongu no I thogha ghi pi, ‘Zebah ngo Zalmunna pama ye nongu u lo iloghi mphi mu kushiye ningu ye asho pesü ow ghüshimi akulho shive keqo tsüni kea?’”

¹⁶ Tishino pa no asayeli lo sahu ngo ayemhi pesü Succoth sakiphemi eno timiqo ghime.

¹⁷ Pa no Penuel lo qogheki kuboleve tsü eno tipau phughi lo kiptimiqo pithive tsüe.

¹⁸ Tishino Gideon no Zebah ngo Zalmunna pama vilo pi, “Nokujo no Tabor lo timi heqhive keqo ye kiu toi kemi kea?” Pama no khochile, “Panongu ye o kimihi, kümtsü no kükami nu toike.”

¹⁹ Pa no pi, “Panongu ye I thiküzümi, I za nuliqo ke. Ampeu xü anike tsala nokujo no panongu küxü xalu püaghi keaye, ni ghi nokujo heqhi pithi moni che.”

²⁰ Tishino pa no pa nu anoghiu Jether vilo pi, “Ithulo, eno pama pithive lo!” Ikemu anu no akümsa no pa zütakikihi süjo mono auve, kughengu pa ye itimi shiake.

²¹ Tileno Zebah ngo Zalmunna pama no pi, “No ampi no ithu no nikujo ghiqhive lo, kughengu kiptimi lakhi ye pa kumto lono ithi cheni.” Ikehu Gideon no ithu no pama ghiqhive eno pamaw sayeshiqo kuo lo akughupu nanu puche keu kuqho luvetsü.

Gideonw Ephod

²² Tithiu Israelmi no Gideon vilo pi, “No eno o nu ngo o tilimiu ghi ningu shou ayepe lo, kughengu nono Midianmi launo ni xalue.”

²³ Gideon no khochile, “Ni eno I nulimu nongu shou ayepe monani; Ampeu no nongu shou ayepe nani.”

²⁴ Pa no pi, “I no nongu vilo hi qhüiniju ani: nongu kümtsü aghüshi lono hakholu keu akinikighi pesü I tsüve lo.” (Midianmi ye Ishmael laghami kehu ameshoyi kinikighi acheke.)

²⁵ Ikehu timiqo no khochile, “Ningu no puloniqhiyi o tsü nani.” Panongu no hebephi qhano kümtsü no pütütaw hakhokulu ameshoyi kinikighi pesü pa tsüve.

²⁶ Ameshoyi kinikighi qhalu keu huju kelo ahu 19 qhemi aghi, eno akughupu tünananu, achila ngo hughaike phi Midian kükami no pepu chekeu, panow sayeshiqo no akuo lo xini chekeqo ye kihisü moe.

²⁷ Gideon no tipaqo pesü Ephod mla, eno pesü pa no xüsüve keu phughi, Ophrah lo qhive. Ikelo Israelmi kümtsü no ti mllauve eno tino Gideon ngo pa kibolomi ghi meluve.

²⁸ Ikehu Midianmi ye Israelmi zülo ikiqive eno panongu ye pano kütsü peqhe move. Gideon küxü tivilo ampe lhobidi kutolo aghakhu ye akulho qhilue.

Gideon Kithi

²⁹ Joash nu Jerubbaal ye pa kilo wove eno tilau xüache.

³⁰ Gideon ye anu 70 ache, kughengu pa ye anipu kutomo acheke.

³¹ Eno pa nipu amishiu Shechem lo achekeu ghi anu lakhi punu tsü, pa no Abimelek ipi kuvetsü.

³² Joash nu Gideon ye aloqhi kitemi shino thive eno pa kumo ye Abiezer laghami phughi Ophrah lo papu kumo phivilo qhove.

³³ Gideon thive kemtsa, Israelmi ye itaghi idewo Baal mllauve no Baal-berith pesü pano lhou shive.

³⁴ Israelmi ye Ampeu pano Lhou, khuu aghümi no panongu homxape ake lono panoqo xaphetsü keno, Pa kümsümave ke.

³⁵ Eno Jerubbaal (ti ye Gideon) no Israelmi lau akümla kivi kutomo shitsü keu theli lo, panongu ye pa kibolomi lau ghi kiumu iqemokeu kikimiye piyemoe.