XAKUTHAMI 7 - Sumi Naga CL (Re-edited) Bible (BSI)

Gideonw Timi Aqhe Küthü

¹ Tithiu Jerubbaal (ti ye Gideon) eno pa gholo timi akeqo no inaqhe itheno ithu wuno Harod züpuki phivilo aghazü shive. Midianmi ghazü no ahuu Moreh toghi phivilo akhila lo ae.

² Ampeu no Gideon vilo pi, “O gholo timi akeqo ye ihulo anike Ni ye Midianmi pesü ow timiqo u lo sütsü mlae, tikumo ye Israelmi no I qhive no aqheküza shi, ‘I u ampi no I xalue’ ipiuve nosae.

³ Tighenguno timiqo kütüghü lo, ‘Khukhumu msaichi eno khokhoshi aghi keu ye mtazü Gilead Toghi lono aki lo idewolu nani.’” Kuchono pano 22,000 no idewove eno 10,000 likhive.

⁴ Ampeu no Gideon vilo pi, “Itaghi timi chilo aphi. Panongu sasü azü lo iqilo, tileno I no o ghenguno kishe tsüni. I no o vilo, ‘Hipau no o gholo wuni,’ ipikeu no o gholo wu nani, eno, ‘Hipau ye o gholo wumoe,’ ipikeu ye wumo nani.”

⁵ Ikehu Gideon no timiqo sasü azü lo iqi, eno Ampeu no pa vilo pi, “Khunono atsü no azü yekeshi pa mili no azü damineni keno tipaqo kütashi qhilo eno khunono qhoqhünhe pe azü yeni keno tipaqo kütashi qhilo.”

⁶ Ikelo timi 300 no au no azü shope ikuno ye, ikemu tinguno alau ye qhoqhünhe no azü yekhae.

⁷ Tileno Ampeu no Gideon vilo pi, “Au no azü shope ye keqo pano 300 vecheo I no o xalu nani eno Midianmi pesü o u lo sütsüni, tinguno alau ye pütüta kilo idewove pelo.”

⁸ Ikehu timiqo no pütüta nhemgha ngo afuko au lo pelu khave. Tishino Gideon no pano 300 kumo aye kütami ye kighide puwove. Midianmi ghazü ye panongu qhou akhila lo ae.

⁹ Tipa ji Ampeu no pa vilo pi, “Ithulo, iqi aghazü leve lo, kughengu I no pano pesü o u lo süve tsüae.

¹⁰ Ikemu nono iqi nike msa aghi aye, o qeu Purah sasü aghazü lo iqilo.

¹¹ Panongu no küptsa keu nono chilu nani eno tithiu no iqi lenike o u shikumtolu nani.” Ikehu Gideon ngo pa qeu Purah pama no aghümi ghazü apheu iqi.

¹² Tile Midianmi, Amalekmi, eno kipelau shiayeqo no akhila lo tülhaqu toi nhakha, eno panow sayeshiqo no azüghi mkülo asaye toi kihikhamla ae.

¹³ Kughou Gideon no iqighi keno, timi lakhi no pa samo hitoi pa küsau vilo lhe aghi keu chilu. Pa no pi, “I samouno barley sho lakhi ningu ghazü shou ikughi no aphiki lakhi lo vepuku kelo, aphiki huye ilaqive no ayeghi lo vedave cheghie.”

¹⁴ Ikelo pa küsau huno pi, “Ti ye Israelmi, Joash nu Gideon zütakikihi kethono kütau kumoe. Alhou no Midianmi eno aghazümi kümtsü pa u lo süve tsüae.”

¹⁵ Gideon no asamo eno akiqi chilu kemtsa qhoqhünhe no Alhou mllae. Tishino pa no Israelmi ghazü lo ideighi no pi, “Ithulo, Ampeu no Midian ghüshimi kümtsü nongu u lo süve tsüae.”

¹⁶ Pa no timi 300 kijepe amqo küthü shive no panongu u lo afuko eno ayeghi li lakhikhi alou akuluqhe süvetsü.

¹⁷ Pa no panongu vilo pi, “I juno I pape shilo. I no aghazü phivilo ighi kemtsa I no kiu shi keno titoi shilo.

¹⁸ Kughou ni eno I mqo no afuko ighani keno, nongu ghi aghazü homxa ako kümtsü lono afuko igha eno iqhaighu pilo, ‘Ampeu eno Gideon ghenguno.’”

Gideon no Midianmi Theqhive

¹⁹ Zübumta lo aghukhe kikili lono Gideon no pa lojimi 100 sasü aghazü phelo ighi. Panongu no afuko igha eno panongu no peche keu ayeghi li hephove.

²⁰ Tipa mtsa aloji kütami no afuko igha eno ayeghi li hephove. Panongu kümtsü no au piyiu no akulu küqüpe, eno au ajeu no afuko pesü igha, panongu no ishi ighamku, “Ampeu ghenguno azütakikihi eno Gideon ghenguno azütakikihi!”

²¹ Timi kümtsü no pütüta-a lo aghazü homxa puthugho, ikelo ghüshimi kümtsü no ighasü pokhave.

²² Kughou panongu no afuko 300 igha keno, Ampeu no aghümi zütakikihi pelo pano dolono ghiqhikile thuvepe. Ghüshimi no Zererah küdau Beth-shittah kutolo pove eno Tabbath phivilo Abel-meholah kutolo pokhave.

²³ Ikehu Naphtali, Asher eno Manasseh lagha lono timiqo kuphe no panongu no Midianmi hawue.

²⁴ Gideon no atsapemi hape Ephraim lo ato yeghi kümtsü lo puwu no pipe, “Iqighi no Midianmi sasü aghü shilo eno Beth-barah ngo Jordan kutolo pano züpukiqo hakholu lo.” Ikehu Ephraim lo kiptimi thaqhü kuphe no panongu no Beth-barah ngo Jordan kutolo azü hakho luve.

²⁵ Panongu no Midian yepemi kini Oreb ngo Zeeb pama küghaluve no Oreb Tuqu lono Oreb pithive eno Zeeb tsaizü kütsüghü-a lono Zeeb pithive. Panongu no Midianmi hawu, eno Oreb ngo Zeeb pama kütsü pesü Jordan katha iku Gideon lau peighi.