XAKUTHAMI 6 - Sumi Naga CL (Re-edited) Bible (BSI)

Midianmi no Israelmi Qhasü

¹ Israelmi no Ampeu zülo küsakügha shiuve kehu, Ampeu no panongu pesü ampe tsüni Midianmi u lo süvetsü.

² Midianmi no Israelmi leluve, Israelmi no Midianmi launo itshüni ye naghuto lo atuki ngo sükusho-a mlave.

³ Kughengu kugho kughomu Israelmi no tüxatini alu lo yisü aye, Midianmi ngo Amalekmi eno kipelau shiayeqo no panongu lenike iqhoghi che.

⁴ Panongu no Israelmi mjoni ke aghazü shi, Gaza kutolo alu lo pekighi luve tsüche, eno kiumu qhitsümo no pano mbe, amshitsü, eno khurha luve tsüche.

⁵ Kughengu Midianmi no tülhaqu toi panow lhoxü jeli sasü iqhoghi no aphiki shi, ikemu panongu eno panow sayeshiqo ye kihikhamlae, tishikeu lono panongu no ngove keu yeghi kümtsü shipüsave tsü cheke.

⁶ Israelmi ye Midianmi no ighono shikuchunipe qhive. Ikehu panongu no Ampeu lau akukuphu ighamku khue.

⁷ Kughou Israelmi no Ampeu lau Midianmi ghenguno ighamku keno,

⁸ Ampeu no tungkupu lakhi panongu lau puwu. Tungkupu huno pi, “Ampeu Israel Lhou no ishi piani: I no Egypt lono nongu saipeghi eno aqüaxe lono nongu kuqhophe ke.

⁹ I no Egyptmi u lono eno nongu qhasü kemi kümtsü launo nongu xaphe, eno nongu zülono panongu hapheve no pano yeghi pesü nongu tsüe.

¹⁰ I no nongu vilo pike, ‘Ni ye Ampeu nongu Lhou, tighenguno nongu ye Amorimi khuno yeghi lo itehi nongu no küghüna ani keno tipaqo lhou mlla kevilo.’ Ikemu nongu no I gholu move.”

Gideon Kukulu

¹¹ Tipa ghuloki lo AMPEUw kungumi lakhi no ighi no Ophrah lo Abiezer laghami Joashw aphisübo qholo ngove; pa nu Gideon ye Midianmi launo küsüve niye atsaizü kütsüghü-a lono ashothi munu ae.

¹² AMPEUw kungumi no pa lau ipeghi no pi, “Ampeu no o gholo ani, O, aghü kivimi.”

¹³ Gideon no pa vilo pi, “I mpeu, I pelo inijulu pelo, Ampeu no ni gholo aniaye kushiye hi kümtsü ni pelo sholu anipe kea? Eno ni puasü no Paw akümzapu kümla ghili, ‘Ampeu no Egypt lono ni saipeghi ke kumo keshea?’ ipiche keqo khile ani kea? Ikemu itehi ye Ampeu no ni phevae eno ni pesü Midianmi u lo süve tsüae.”

¹⁴ Ampeu no pa lau tsüghü ighi no pi, “O kumto hipau lono wuno Midianmi u lono Israelmi xalu lo. I no o puwu anike kumo?”

¹⁵ Gideon no pi, “Ampeu, ikemu kishino ni ye Israelmi xaluni kea? Julo, Manasseh shiaye lo ni laghau no akimqeu, eno ni limi dolo ghi niu no akimkheue.”

¹⁶ Ampeu no pa khochile, “Ikemu I no o gholo anani, eno timi lakhi heqhi akeshi nono Midianmi kümtsü heqhive nani.”

¹⁷ Gideon no pi, “Imaye I no O pulou shi aghi aye, Nono I pütsa anie pikeu kiqishi amchipu I piyelo.

¹⁸ Kimiyeno I no O zülo agho süghi mphi kutolo, hileno wu kevilo.” Ampeu no pi, “Nono ighi moke kutolo I no ngo aghini.”

¹⁹ Ikehu Gideon no pa kilo ilo no ane lhothe lakhi heqhipe lho eno kholaqhi sümo keu ashomkhu ahu lakhi no asho shi. Pa no ashi no atsüto lo sü, eno akulhozü no ali lo süno pesü aphisübo qholo Ampeu lau süghi no pa tsü.

²⁰ Kungumi huno pa vilo pi, “Ashi ngo asho pesü atuqu hipau shou beno akulhozü no tipau shou letelo.” Gideon no tishive tsü.

²¹ AMPEUw kungumi no pa küsü kümtsü pesü ashi ngo asho küma di eno tileno atu lono ami ipeghi püzü ashi ngo asho küma pitive, eno AMPEUw kungumi ghi hauve.

²² Gideon no hi ye kuchou no AMPEUw kungumi kepi pimhe luve no pi, “Aha, O Ampeu Alhou! Ni ye Ow kungumi agi kinheqhe ghi ithuluvae.”

²³ Ikemu Ampeu no pa vilo pi, “Aloino alo! Msa kevilo; no ye thimo nani.”

²⁴ Gideon no akiptia lakhi tile shiqhe no, “Ampeu ye aloino” ipi kuvetsü. Ishi kutolo Ophrah lo ti aphi eno ti ye Abiezer laghamiw ke.

²⁵ Ampeu no tipa ji Gideon vilo pi, “O pu mishitsü lakhi, eno lakhiu no ampe tsüni mishitsü sawo o puw Baal kümlla khache tulave tsülo, eno tipau phivilo Asherah julho loqhive tsülo.

²⁶ Tipau tope shou atu pesü akivishi kithipe Ampeu o Lhou lau akiptia lakhi mlalo. Tishino amshitsü akiniu pesü akipti kümllagho shi tsüno Asherah julho nono loqhi niye akeu sülu pesü ti süküghüpu sü shilo.”

²⁷ Ikehu Gideon no pa qemi chighi sasü wuno Ampeu no pa vilo kiu shilo pi keno tipaqo kümtsü shive. Ikemu pa ye pano kibolomi eno mishiphu lo xüküami msa kelauno puchou no kumono putho lono tishive.

Baal Kümlla Khache Kütsave

²⁸ Kughou mishiphu lo xüküami no thanau ithughi keno, Baal kümlla khache tulave aghi eno Asherah julho loqhive aghi, eno amshitsü akiniu akiptia mla püakeu lono mllave aghi.

²⁹ Panongu lakhino lakhi vilo pikile, “Khuu no hi shive akea?” Panongu no phuju no pi, “Joash nu Gideon no hi shivae.”

³⁰ Tile panongu no Joash vilo pi, “O nu pithive nike saipeghi lo, kughengu pa no Baal kümlla khache tulave tsü eno tipau phivilo Asherah julho loqhive tsüae.”

³¹ Ikemu Joash no khunoqo pa sasü kushoni ye ighi keno panoqo vilo pi, “Nongu ye Baal ghenguno puthugho ani keo? Ikeo pa süsho niye ani kea? Khuu no pa she petsüni keno thanau inaqhe tomphi lono pithive nani. Tsala Baal no alhou shi aghi aye, pa likhi pa saphu pelo, kughengu pa kümlla khache kütsave tsüake.”

³² Tighenguno tipani no Gideon ye Jerubbaal ipi kuuve, tipau kiqi ye, “Baal no pa lau amkhülu pelo” kughengu pa no Baal kümlla khache kütsave tsüke.

³³ Tipa ghuloki lo, Midianmi, Amalekmi, eno kipelau shiaye kümtsü hekütsü no Jordan kathasü iku püzü Jezreel Khila lo aghazü shive.

³⁴ Ikemu Ampeu Ghungu no Gideon peitha luve, pa no afuko igha eno pa pape penike Abiezermi kütüghü.

³⁵ Pa no Manasseh ghakhu kuchopu atsapemi puwu no pa pape ighi penike kütüghü. Pa no atsapemi hape Asher, Zebulun, eno Naphtali shiaye kümtsü lau puwu eno panongu no ighi no pa gholo süküqha luve.

Amhi Yeho lono Amchipu

³⁶ Gideon no Alhou vilo pi, “Nono pive toi, I vecheo Israel xalunie pi aye,

³⁷ julo, I no aniqa lo amhi yeho hami qhini. Thanau atsüzü no aniqa lo kumono amhi yeho lo likhi qipuku püaghi aye, Nono pike toi, I vecheo Nono Israelmi xalu nanie pi I no ithive niae.”

³⁸ Kuchou no titoi shive. Kughou Gideon no inaqhe itheno ithughi no amhi yeho süleju keno atsüzü no abohu lakhi chhitoi süphelu.

³⁹ Tileno Gideon no Alhou vilo pi, “I shou amloide kevino I pelo no itaghi hi pilu pelo. Kimiyeno I pelo itaghi ghuthu lakhi amhi yeho pesü pejulu pelo. Itehi ye amhi yeho likhi no qhaive no aniqa lou no atsüzü aghi pelo.”

⁴⁰ Tipa ji Alhou no titoi shive, eno thanau amhi yeho no qhai aghi no aniqa shou no atsüzü aghive.