XAKUTHAMI 5 - Sumi Naga CL (Re-edited) Bible (BSI)

Deborah ngo Barak Le

¹ Tipani Deborah ngo Abinoam nu Barak pama no ishi ale phe:

² “Ampeu no Israelmi sakipheu shi timiqo no akutoshi no pulolu, Ampeu sheqhelo!

³ “Inilo, O kükami; akini xükho lo, O yepemi; Ampeu lau I no ale pheni; I no alekuju kivi Ampeu Israel Lhou lau pheni.

⁴ “Ampeu, kughou Nono Seir qhive keno, kughou Nono Edom ghakhu lono chewuve keno, ayeghi no itha eno atsütsü lono tsütsüghu iqighi, iyei, khüngküsü no azü leqhie.

⁵ Naghutoqo no Ampeu zülo khokhoshi, Sinai thotsü Ampeu Israel Lhou zülo ithae.

⁶ “Anath nu Shamgar ghuloki lo, eno Jael ghuloki lo alaghila ye kümsa shive, eno kicheghüzümi no lavela pülae.

⁷ I no ighi moke kutolo aphulomi kühave; ni, Deborah no Israel lo aza shi ipeghie.

⁸ Kughou alhou kithe kishe keno aphughi khagho lo aghükishi ighive. Israelmi 40,000 gholo azüto momu angu ithulu keshea?

⁹ Israel zatsümi khunono puloniqhiyi pano ampi pesü tsü keno, I mlo no pano kümsü ani. Ampeu sheqhelo.

¹⁰ “Nongu khurha kimiye sakichemi, amekusho küqhaphi qhaiqa chekeqo, alaghila lo kichemiqo, hipau ghili pesü pilo.

¹¹ Azükikhe lo alephemi sütsa no Ampeu mikucho tokulu ghili pi ide ani, Pa ghami mikucho tokulu ghili Israel lo pi ani. “Tishino Ampeu timiqo no khagho lo chesü iqive.

¹² “Ithulo Deborah, ithulo! Ithulo, ithulo, ale phesü wulo! Ithulo, O Abinoam nu Barak, o kughumi sawuve lo.

¹³ Ghükulumi ghenimi no iqighi; Ampeuw timiqo no I züqhushi akumtomi leniye iqie.

¹⁴ Panongu no Ephraim lono akhila lo iqi, Benjamin ngo pa lagha no o pape; Zatsümi no Makhir lono iqie, eno Zebulun lono kijemi michipu akemi iqighi.

¹⁵ Issachar sakiphemi no Deborah gholono ighi, Issachar no Barak gholo ngoe; panongu no pa pape akhila kutolo kuha iqi. Reuben lagha loye, amlo lakhi shimlave.

¹⁶ Nongu ye aloji kukeu sütsa khe ghi ighowo ngove kea? Reuben lagha loye, amlo kütha mlave.

¹⁷ Gilead no Jordan kukuu ngove; Dan ye kushiye zükiluqo gholo ngove kea? Asher no ithamo no azüghi mkülo küghünauve.

¹⁸ Ikemu Zebulun timiqo ye kümsapu shi aküxü ghi tsüe; Naphtali ghi tishike.

¹⁹ “Kükami no ighi kelo panongu no sasü aghüshi; Megiddo ghoki lo Taanach lono Canaan kükami sasü aghüshi; panongu no ghükayi lutsümoe.

²⁰ Atsütsü lo ayepuqo no aghüshi, pano la lono Sisera küpüghüe.

²¹ Khaghi ghoki Kishon zükuqo no panongu yipe wuve. O I ngulho, mtotoi chewulo!

²² “Tile khurshiqo kupo ghügha, ayeghi lo hesü keu ghügha no kije ipeghie.

²³ “Meroz ghusholo, ipi Ampeuw kungumi no piani, tile xüküami ghushoqhi lo, kughengu panongu ye Ampeu no akumtomi sasü aghü shikelo kuphu nike ighimoe.

²⁴ “Kümtsü nguno akümghau ye Kenimi Heber nipu Jael, aphiki lo kungou totimi huye shishe akümghaue.

²⁵ Sisera no li vilo azü khu, eno li no akichhizü pa tsüe; eno ghenimi khu lono li no pa loji.

²⁶ Li no aphiki kufuyi ikhilu, eno li u ajeu no akümlami yihesü ikhipe Sisera heqhi no pa boghe kubove tsü; li no pa nhigi lono yepilive tsüe.

²⁷ Li pukhu dolono pa ye ikiqive no ithamo no ngove; li pukhu dolono pa ye ikiqive; pa no khile ikiqive keno tilehi no thive.

²⁸ “Sisera paza no alashe lono juphe: ghoküküna thiuno li no qae: ‘Kushiye paw khurkulu ighi nike ado lu ani kea? Kushiye paw khurkulu kupo ghügha ye munuve ani kea?’

²⁹ Liw alokütsülimi no khochile, kuchou no li no li khochile,

³⁰ ‘Panongu ye hakhokulu phulu no kije lumphi keshea? Timi lakhi ghenguno ilimi lakhi momu kini hu; Sisera ghenguno aphimini kivi, akuo ghenguno aye shisü keu jukivi phi hakholu keu ithulu mphi keshea?’

³¹ “Hitoi o ghümi kümtsü thive pelo, O Ampeu! Ikemu o küsami ye khetsünhe no ipeche ketoi vülu pelo.” Eno aghakhu ye ampe lhobidi alokughuno shi akulho qhilue.