XAKUTHAMI 4 - Sumi Naga CL (Re-edited) Bible (BSI)

Deborah ngo Barak

¹ Ehud thive kethiu, itaghi Israelmi ye Ampeu zülo küsakügha shiuve.

² Ikehu Ampeu no Canaanmi kükau Hazor ghakhu lo akükau Jabin pelo panongu leluvepe. Paw ghüshimi shou zatsüu ye Harosheth-hagoyim ghami Sisera.

³ Ikehu Israelmi no Ampeu vilo kuphu tsülopi ighamku, kughengu Jabin ye ayi khurkulu 900 ache eno pa no ampe muku ayiküsa shi Israelmi qhasü.

⁴ Tile Lappidoth nipu tungkupliu Deborah no Israelmi shou xaküthau shiae.

⁵ Ephraim ghakhu tokukujo lo Ramah ngo Bethel küma dolo, li no amsabo qholo iqache, eno Israelmi no li lau iqhoghi no liw küghakütha luche.

⁶ Li no Kedesh-naphtali lo timi puwu no Abinoam nu Barak kuno pi, “Ampeu Israel Lhou ye ishi azah o tsü püanike kumo? ‘Wulo, eno Naphtalimi ngo Zebulunmi 10,000 Tabor Toghi lono hekütsülo.

⁷ I no Jabin ghüshimi shou zatsüu Sisera pelo o sasü Kishon ghoki lono küpüghü peni. Pa ye paw khurkulu eno ghüshimi ani, ikemu I no pa pesü o u lo süvetsü nani.’”

⁸ Barak no pi, “Nono I sasü wu aye ni ye wuni ikemu nono I sasü wumo aye ni ye wumoe.”

⁹ Li no khochile, “Ni ye o sasü wuni pütsa, tishimu tokulu juaje ye ow shimoae, kughengu Ampeu no Sisera pesü totimi lakhi u lo süve tsüni cheni.” Tishino Deborah no Barak sasü Kedesh lo wu.

¹⁰ Barak no Zebulun ngo Naphtali lagha Kedesh lo kusü eno timi 10,000 no pa papesü wu. Deborah ghi pa gholo wue.

¹¹ Tipa ghuloki lo Kenimi lakhi Heber ye Kedesh phivilo Zaanannim lo aphisübo qholo küghüna ache; hi Kenimi ye Moses pangu Hobab kughukomi eno Heber ye Kenimi gholono kajosü wuve kemi ke.

¹² Kughou Sisera no Abinoam nu Barak ye Tabor Tolo ikuvae pi keu ithive keno,

¹³ pa no paw ayi khurkulu 900 eno Harosheth-hagoyim lono Kishon ghoki kutolo paw timi kümtsü kukütsü luve.

¹⁴ Deborah no Barak vilo pi, “Wulo! Kughengu ishi tsala lono Ampeu no Sisera o u lo süve tsüae. Ampeu ye o züu no ipeve ake kumo keshea?” Barak no Tabor To lono paw timi 10,000 sasü iqive.

¹⁵ Ampeu no Barak nhethe lono Sisera ngo paw khurkulu ngo timi kümtsü kütsave tsü, eno Sisera ye paw khurkulu lono ilhe iqive no apukhu lono pove.

¹⁶ Barak no khurkulu ngo ghüshimi Harosheth-hagoyim kutolo hawu, eno Siseraw ghüshimi kümtsü ghiqhi khave tsü. Timi lakhimu ghümo no pithive.

¹⁷ Ikemu Sisera ye posü Kenimi Heber nipu Jael phiki lo ilove, kughengu Hazor kükau Jabin ngo Kenimi Heber lagha dolo külakishi acheke.

¹⁸ Jael no khalau ipeghi no Sisera sasü kusho no pa vilo pi, “Alou iloghi lo I mpeu; I phiki lo iloghilo, msa kevilo.” Ikehu pa no alou ilo eno li no alashe lo aphi nhaqhi chekeu phi no pa küzüpe qhive.

¹⁹ Pa no li vilo pi, “Kimiyeno azü I piyelo kughengu ni ye tüghüthi ani.” Ikehu li no ashiyiko bo lono akichhizü lesü no pa piye no küzüpe qhive.

²⁰ Pa no li vilo pi, “Aphiki kulaghi lo puthugho no khuana no ighi no o vilo, ‘Timi khumu anima?’ pi ighiju aye, ‘Kühae’ ipive lo.”

²¹ Ikemu Heber nipu Jael no aphiki kufuyi lakhi eno ayihesü ikhipe Sisera no akulhoshi züake lono agholau no pa phivilo wuno pa nhigi lo yesüve tsü, eno Sisera ye aphiki kufuyi no pa kütsü lo yesüpe thive.

²² Kughou Barak no Sisera phusü ighi keno Jael no khalau ipe pa sasü kusho no pi, “Hilau ighilo, nono phuche keu timi hu I no o piyeni.” Pa no li sasü alou ilo, eno Sisera ye aphiki kufuyi no pa nhigi lo yesüpe ayeghi lo ikiqi thive aghi.

²³ Tipa tsalani no Alhou no Israelmi zülono Canaanmi kükau Jabin qhasüve.

²⁴ Eno Israelmi no akumto lono Canaanmi kükau Jabin kütsave moke kutolo pa sasü aghüshi.