XAKUTHAMI 3 - Sumi Naga CL (Re-edited) Bible (BSI)

¹ Ampeu no shiye hipaqo thosülo Canaan lo aghü shijumo keqo pesü Israelmi pejuni ke ghenguno Canaan lo qhive.

² Pa no hi shikeu ye Israelmi tiqheli lakhikhi pelo aghükishi ghili ithi peniye eno kütami khunoqo no aghükishi ghili mtha keno, tipaqo shika peniye ke.

³ Shiye hipaqo: Philistiami yepemi pungu, Canaanmi, Sidonmi eno Hivimi khunoqo Lebanon naghuto lo küghüna chekeno, ti ye Baal-hermon lono Lebo-hamath kutolo akeqo.

⁴ Panongu pesü Israelmi pejuni ye qhike; Israelmi ye kuchou no Moses vecheo pano puasü tsükeu Ampeu zakütsü gholu nani kemo keno pejuni ye shike.

⁵ Ikehu Israelmi ye Canaanmi, Hittimi, Amorimi, Perizimi, Hivimi, eno Jebusimi gholo kitekungo küghünauve.

⁶ Panongu no pütüta ngaqo sasü külauve, panongu ngaqo pelo pano puqo sasü külape, eno tipaqo lhouqo mllauve.

Othniel

⁷ Israelmi no Ampeu zülo küsakügha shiuve eno Ampeu Alhou kümsümave no Baal ngo Asheroth mllauve.

⁸ Tighenguno Ampeu no Israelmi lau axuideve no panoqo pesü Mesopotamia kükau Cushan-rishathaim u lo süvetsü. Tishino Israelmi ye ampe tache Cushan-rishathaim qeche.

⁹ Ikemu kughou Israelmi no Ampeu lau ighamku keno, Ampeu no panongu xaphe nike Kenaz nu, Caleb thiküzüu Othniel puwu, eno pa no panoqo xalue.

¹⁰ Ampeu Ghungu no pa shou ikughi eno pa no Israelmi shou xaküthau shive. Pa no aghüshi lo wukelo, Ampeu no Cushan-rishathaim, Mesopotamia kükau pesü pa u lo süvetsü. Pa no Cushan-rishathaim shou toluve.

¹¹ Tishino tipa ghakhu lo ampe lhobidi kutolo alokughuno shive. Tithiu Kenaz nu Othniel ye thive.

Ehud

¹² Itaghi Israelmi no Ampeu zülo küsakügha shiuve kehu Ampeu no Moab kükau Eglon shikumto no Israelmi mjochilepe.

¹³ Eglon no Ammonmi ngo Amalekmi ghakütsü no Israelmi theqhive. Panongu no amsabo mishighüna ipikeu leluve.

¹⁴ Tishino Israelmi ye ampe chighitache kutolo Eglon qeche.

¹⁵ Tithiu Israelmi no Ampeu lau ighamku, Ampeu no panongu xaphekuluu Benjamin limi Gera nu, Ehud puwu, pa ye au piyiu sülami. Israelmi no Ehud u lono sükusho süqha pesü Moab kükau Eglon tsüpuwu.

¹⁶ Ehud no putoputo zütakikihi tsüghaminhei keu mla, ti ye akushulau aunhekipshe lakhi tüxa. Pa no aphiküzü qhou no tipau pa yiku ajeu chhepu luve.

¹⁷ Tishino pa no sükusho süqha pesü Moab kükau Eglon tsü. Eglon ye aqu checheshi kemi.

¹⁸ Ehud no sükusho süqha tsüve kethiu ti süghi keqo ye puwove.

¹⁹ Ikemu pau ye Gilgal phivilo ajulho akeqo lono idewo no pi, “O, akükau, ni ye o vilo tuqhou tsa pikepu ani.” Akükau no “Iqünhei lo” ipi azah tsü, eno pa qemi kümtsü khalacheu ipe khavepe.

²⁰ Akükau no paw iqüghai keu chebo lo pa likhi iqa ake lono Ehud no pa lau ighi no pi, “Alhou launo ighikeu tsa ni ye o vilo pikepu ani.” Pa no puthughove.

²¹ Ehud no pa u piyiu no azütakikihi pa yiku ajeu chhepuche keu süjophe no akükau kive lo jisüve tsü.

²² Ikelo azütalaghi ghi kümtsü ilokhave eno pa kive lo atha no azütakikihi kümtsü küzüluve, kughengu pa no azütakikihi süjophe moveke; eno kighinoli ijo ipeghive.

²³ Tishino Ehud no khalau ipeve no akükau chebo khathasüpe qhive.

²⁴ Pa no wuve kethiu aqemiqo no ighi no ahukikha kha püaghi keu ithulu kehu panongu no kümsü, “Akükau ye mtsüqheino khatha ilo pa likhi alokughuno shi akulhoqhi ani.”

²⁵ Panongu no kheju kepu thaqhü kheju akemu ahukikha khaqhimo mitheve kehu khaqhiyi ikhipe aki khaqhi ilo kelaye panongu mpeu ye aghüza lo ikiqi thive aghi.

²⁶ Panongu no khe ake lono Ehud ye pokaluve. Pa ye ajulho akeqo hechesü Seirah lo pove.

²⁷ Kughou pa no Ephraim ghakhu toghi tolu keno afuko ighape Israelmi kütüghü. Tileno Israelmi no ato ghakhu lono pa gholo iqi, eno pa no panoqo sakipheu shive.

²⁸ Pa no pi, “I papelo, kughengu Ampeu no nongu ghümi Moabmi nongu u lo süve tsüae.” Panongu no Ehud papesü apeu iqighi eno Jordan leluve no timi lakhimu azü katha iku pemove.

²⁹ Tipa tsalani panongu no Moab ghüshimi kivimi 10,000 kutolo pithive tsü; eno lakhimu pokalu pemoe.

³⁰ Ikehu tipa tsalani Israelmi no Moabmi qhasüve, eno tipa ghakhu lo ampe lhotache kutolo alokughuno shive.

Shamgar

³¹ Pa shelo sakipheu Anath nu Shamgar ighi, pa no ayikümtsü küsü pesü Philistiami 600 heqhi pithive tsüno Israelmi xalue.