XAKUTHAMI 21 - Sumi Naga CL (Re-edited) Bible (BSI)

Benjamin Laghami Nipu

¹ Israelmi no Mizpah lono Ampeu lau tushoqhi püake, “Ningu khumu ni ngaqo pesü Benjaminmi kilo külapuwu moe.”

² Israelmi no Bethel lo wuno Alhou zülo avela kutolo ngove; panongu no ighamku anhezü piji qa,

³ Panongu no pi, “O Ampeu, Israel Lhou, kushiye Israel lo hikithipu shive kea? Kushiye Israel lo alagha lakhi ye kühave masave kea?”

⁴ Thanau inaqhe itheno timiqo no akiptia lakhi mlano akipti kümllagho ngo külakishi kümllagho pesü Alhou mllae.

⁵ Israelmi no pi, “Israel shiaye dolo khuno lagha no Mizpah lo Ampeu zülo kumqo kelo iqhoghi move kea?” Kughengu tile ighi püaghimo keu shou ashoqhi kije lakhi shike, “Timi tipau ye pithiveni.”

⁶ Israelmi no pano thiküzümi Benjaminmi shou amlo ighive no pi, “Ishi no Israel lo alagha lakhi kühavae.

⁷ Ningu ye Benjaminmi khunoqo achili ani keno tipaqo nipu ghenguno kishiveni kea? Kughengu ningu no ni ngaqo pesü pano kilo küla puwo moni keu shoqhi Ampeu zülo shive ake.”

⁸ Panongu no pi, “Mizpah lo Ampeu lau iqhoghi mokeu khuno lagha ani kea?” Ikelo Jabesh-gilead lagha ye khunomu Mizpah lo kumqo kelo ighimo keu phuphelu.

⁹ Kughengu Israelmi hekütsü kelo ghi Jabesh-gilead lo xüküami ye lakhimu aghimo ke.

¹⁰ Ikehu aqoaho no timi amlo kumtomi pano 12,000 hapuwu no ishi azah tsü, “Jabesh-gilead lo wulo eno tile küxümi kiptimi totimi eno atianuli kümtsü azütakikihi pesü ghiqhive lo.

¹¹ Nongu no hitoi shini: kiptimi thaqhü eno totimi khunoqo no athathe kumove akeno tipaqo kümtsü heqhive lo.”

¹² Ikelo panongu no Jabesh-gilead lo xüküami dolo ili lhothe pano 400 no athathe shi aghikeu phulu, ikehu panongu no Canaan yeghi lo Shiloh ghazü lo sasü ighive.

¹³ Tithiu aqoaho no Benjaminmi Rimmon Tuqu lo akemi vilo külakishi tsa pi puwu.

¹⁴ Tileno Benjaminmi no ideighive. Israelmi no Jabesh-gilead lono totimi xaphe saghi keqo pesü Benjaminmi tsüve. Ikemu panongu kümtsü ghenguno lukümkha shimove.

¹⁵ Timiqo no Benjaminmi kimiye qhiyive kughengu Ampeu no Israel lagha kubove tsüke.

¹⁶ Ikehu itaghi aqoaho sakiphemi no pi, “Benjamin lagha lo totimi ye kühava keke anipu ithumlave keqo ghenguno ningu ye kiu kishive tsüni kea?”

¹⁷ Panongu no pi, “Israel lo alagha lakhimu pühavemo nike Benjaminmi xüakeqo ghenguno amheghi ighini kemi aghi masae.”

¹⁸ Ikemu ningu ye ni ngaqo pesü pano tsülu moae, kughengu Israelmi no ashoqhi shive ake, “Khuu no panga pesü Benjaminmi lau küla puwuni keno müsüinivae.”

¹⁹ Ikehu panongu no pi, “Julo, Ampeu lau mpetsü pine ghulhu Shiloh lo kuhoni cheae.” Shiloh ye Bethel ahuu eno Lebonah apeu, eno Bethel ngo Shechem küma dolo alaghi ajeu ache.

²⁰ Panongu no Benjaminmi vilo pi, “Wuno atsaili lo itshüpe ngolo

²¹ eno jukuto lo. Kughou Shiloh limiqo no ilhesü khalau ipeghini keno, nongu ghi atsaili lono ipeghi no pütüta sala ilimi küghalu lo, eno sasü Benjamin ghakhu lo wovelo.

²² Tsala panongu papu momu apelimi no ningu lau muchho ighi aye, nino panongu vilo pi nani, ‘Alo kelauno no ngaqo ni tsüve lo, kughengu ningu ye aghüshi lono pano nipu lutsümoe. Eno nongu ghi no ngaqo pesü panongu tsümo keke nongu ghi akipimi küha nani.’”

²³ Benjaminmi no titoi ilimi ilhe ake lono pütüta nipu shini keu kügha pewuve. Tishino panongu no pano ghakhu lo wuve no pano phughi shiqhe kitheve eno tilau xüuve.

²⁴ Israelmi kütami ghi pütüta shiaye eno akibo phusü wove eno pütüta mheghi lo idewo xüuve.

²⁵ Tipau ghuloki lo Israel lo akükau kühano ache. Kümtsü no pütüta chipiu gholau no aghoshi xüche.