XAKUTHAMI 20 - Sumi Naga CL (Re-edited) Bible (BSI)

Israelmi no Aghü shinike Kuto

¹ Tithiu Israelmi kümtsü no hekütsü, Dan lono Beersheba kuto, eno Gilead yeghi ghi Ampeu zülo lakhi shi Mizpah lo kumqo.

² Israelmi sakiphemi kümtsü no kuloqu, eno Alhouw timi no kumqo kelo ghüshimi azütakikihi kipemi pano lakh bidi kutolo hekütsü lu.

³ (Israelmi no Mizpah lo hekütsüpe anie pikeu Benjamin laghami no chiluve). Israelmi no pi, “Kishino hi alhoksa kümla shive keno ni vilo pilo.”

⁴ Levimi khuu nipu ghiqhi pithive keno pa no khochile, “I nipu nikujo izüsü Benjaminmi yeghi Gibeah lo zünike ighi.

⁵ Ikelo Gibeah lo timiqo no I lau akümla lhoksa shinike ighi no putho lono aki sühope ngove. Panongu no I pithiveni ye shi, eno I nipu amishiu shipüthave no li ye tipau lono thive.

⁶ Ikehu I no I nipu khape wove no aleqhi shi ghithape Israelmi no amheghi shi küghüna akeu ghakhu kümtsü lo tsüpuwue. Kughengu timi hipaqo no Israel lo aphikümqhüpu eno axeküsü shike.

⁷ Ikehu nongu Israelmi no mijetsü juno akükümsü tsü julo.”

⁸ Timi kümtsü no lakhi shino pi, “Ningu khumu pa phiki lo womoe, eno khumu pa kilo idewo moe.

⁹ Ikemu ningu ye Gibeah lau hitoi shini: ningu no asaqhi no tipa kiqi lono Gibeah lenike iqhoni,

¹⁰ eno ghüshimi ghenguno achuqupu pekishe kepushi Israel lagha kümtsü lono hitoi shini, timi 100 aghi keqo no 10 luni, 1,000 aghi keqo no 100 luni, timi 10,000 aghi keqo no 1,000 luni. Benjamin lagha no Israel lo axeküsü kümla shike ghenguno pano lochileni.”

¹¹ Ikehu Israelmi kümtsü no lakhi shino mishighüna lenikeu shive.

¹² Israelmi no timi hape Benjamin laghami kümtsü lau pi puwu, “Nongu gholo hi kixikila kümla shive keu ye kiu ghenguno kea?

¹³ Itehi Gibeah lo hu timi ameküha keqo ni u lo phesüve tsülo, nino tipaqo pithive no alhoksa kümla hipau Israel yeghi lono ikhiveni.” Ikemu Benjamin laghami no pano thiküzümi no pi akeu tsa ini move.

¹⁴ Tishino Benjamin lagha kümtsü pütüta mishighüna lono hekütsüpe Gibeah lo ighi no Israelmi sasü aghü shinike kutove.

¹⁵ Tipa tsalani Benjamin lagha no mishighünaqo lono ghüshimi 26,000 kukütsü. Tipau gholono akimchimi 700 kishephelu.

¹⁶ Tipaqo dolo pano 700 ye piyiu sülami, kümtsü no asa lothi mu vezü mono atu kihi puwo vekuve chekeqo ke.

¹⁷ Israelmi kümtsü küqha kelo Benjamin lagha kihimo no ghüshimi lakh bidi hekütsülu; panongu kümtsü aghü kivimi ke.

¹⁸ Israelmi no Bethel lo iqho no Alhou vilo iniju, “Ningu dolo khuno lagha paghino Benjamin lagha sasü aghü shini kea?” Ampeu no khochile, “Judah lagha paghino iqhoni.”

¹⁹ Israelmi no thanau ithughi no Gibeah phivilo aghazü shiluve.

²⁰ Panongu no Benjaminmi sasü aghü shiniye ipe, eno ghüshimi no leniye kithipe ngoluve.

²¹ Benjaminmi no Gibeah lono ipeghi no tipa tsala lo likhino Israel ghüshimi 22,000 pithive tsü.

²² Ikemu Israelmi no amlo mtolu no itaghi aghü shinike kutope atsala atüghüni ngoke-a lo ngoluve.

²³ Israelmi no atüghüu tsalani tomlave kelo, Ampeu lau wuno Pa zülono avelau kutolo mloqa. Panongu no Ampeu vilo iniju, “Ningu ye wuno ni thiküzümi Benjamin lagha sasü aghü shikepu kemo kea?” Ampeu no pi, “Iqho no panongu sasü aghü shilo.”

²⁴ Israelmi no akiniu tsalani Benjaminmi sasü aghü shinike kupunu wu.

²⁵ Atsala akiniuni ghi Benjaminmi no Gibeah hechesü ipeghi no ghüshimi 18,000 pithive tsü.

²⁶ Ikehu Israelmi ghüshimi kümtsü no Bethel lo iqho mloqa. Panongu no Ampeu zülo iqa no tipani kijiliu shiveke kutolo kümvü, eno akipti kümllagho ngo külakishi kümllagho pesü Ampeu lau tsü.

²⁷ Alhouw puloshoqhi bohu tile ache kehu Israelmi ye Ampeu vilo inijuni ye wuke.

²⁸ Aaron nu Eleazar nu Phinehas no Alhouw puloshoqhi bohu lo hukuthu kümla shiche kehu pa no pi, “Ningu ye ni thiküzümi Benjaminmi sasü aghü shini keo taveni kea?” Ampeu no khochile, “Iqholo, kughengu thoghiu ye I no panongu pesü nongu u lo süve tsüni.”

²⁹ Ikehu Israelmi no ghüshimi khami Gibeah homxa küghütshüpe qhive.

³⁰ Tishino atsala aküthüni ghi Benjaminmi sasü aghü shinike iqho eno thosülo toi kithipe ngove.

³¹ Benjaminmi no khalau ipeghi kelo Israelmi no panongu müsü sasü aphughi lono putosüu wuve. Eno azüu toi panongu no Bethel ngo Gibeah lo wuche keu laghi eno aghasa lo Israelmi akeqo heqhi thuve. Kümtsü küqha kelo Israelmi shighi kutolo pithive tsü.

³² Benjaminmi no pi, “Azüu toi panongu ye ni zülo ikiqivae.” Ikemu Israelmi no ishi piae, “Ningu poveni eno aphughi lono panongu müsü sasü aghüzüla lo wuveni.”

³³ Israelmi no pano-a lono idewo Baal-tamar lo kumqo luve, eno Maareh-geba lo itshüpe akeqo no ipeghive,

³⁴ eno Gibeah lenike akumtomi pano 10,000 ighi no aghü shithuve ikemu Benjaminmi ye pano shou ahasapu ikughive keu mthae.

³⁵ Ampeu no Benjaminmi pesü Israelmi tsüve eno Israelmi no tipa tsalani Benjaminmi pano 25,100 eno aqhe pithive tsü.

³⁶ Ikehu Benjaminmi ye tomo keu ithive. Israelmi ghüshimi amqo akichiu no ideighive, kughengu panongu ye Gibeah sühope itshü akeqo shou pükhükibe ake.

³⁷ Itshü akeqo no mtazü posü Gibeah lo ilo no aphughi lo akemi kümtsü heqhive tsü.

³⁸ Israelmi ghüshimi dolo amchipu shi püake, ti ye itshüpe akeqo no aphughi lono amchhi phopuku kelo

³⁹ Israel ghüshimi poche keqo no tsüghü ighi no aghü shithuni keu shike. Benjaminmi no Israelmi shighi kutolo heqhi pithive tsüno panongu no pi, “Azüu toi, ningu no panongu theqhivae.”

⁴⁰ Ikemu kughou amchipu michhi no phoboi ikughiuve keno, Benjaminmi no pano thiu jupuwo no aphughi kümtsü ami iqü ipeghi keu ithulu no akümzave.

⁴¹ Tileno Israelmi no xatsüghü ighi kelo Benjaminmi ye kichimamaive, kughengu panongu no pano shou ahasapu ikughive keu ithive.

⁴² Ikehu panongu no Israelmi launo idesü asayeqha küdau pokhave, ikemu panongu ye poka mlave, kughengu Israelmi aphughi lono ipeghi kemi no panongu sühope kütsauve.

⁴³ Eno Benjaminmi bothape Israelmi no Nohah lono kipelau Gibeah ghüngü kutolo pithive tsüe.

⁴⁴ Benjaminmi aghütomi likhi pano 18,000 pithive tsü.

⁴⁵ Kütami ye Rimmon Tuqu küdau pove. Eno alaghi lono pano 5,000 pithive tsü. Tishino Israelmi no Benjaminmi Gidom kutolo hasü wuno 2,000 pithive tsü.

⁴⁶ Tipa tsalani likhino Benjaminmi azütakikihi kipemi kümtsü kelo 25,000 pithive tsü.

⁴⁷ Ikemu pano 600 ye tsüghüsü Rimmon tuqu küdau pove eno tile aqhi bidi ngove.

⁴⁸ Israelmi no ideighi no Benjaminmi achili aghi keqo aphughi, timi, eno lhoxü kümtsü kütsa khavetsü. Eno tipau hokümxa lo aphughi kümtsü pitileve tsü.