XAKUTHAMI 2 - Sumi Naga CL (Re-edited) Bible (BSI)

Israel Hekibide

¹ Tipa ghuloki lo Ampeuw kungumi no Gilgal lono Bokhim lo iqho no pi, “I no Egypt lono nongu saipeghi no nongu puasüqo vilo piqhi püakeu yeghi lo sailo, eno pi, ‘I no nongu sasü puloshoqhi shi püakeu khilemu hephomo nani,

² nongu ye hipa ghakhu lo küghüna akemi sasü khilemu puloshoqhi shi kevilo; eno nongu ye panongu kümlla khacheqo tuleqhi khave masae.’ Ikemu nongu no I tsa lumovae. Nongu ye kiu shive akea?

³ Tighenguno itehi I no piani, Ni ye nongu zülono panoqo hapupomo nani ikemu panongu no nongu sahu shipeni eno pano lhouqo no nongu lichhe shive peni.”

⁴ Kungumi huno Israelmi vilo hi pive kemtsa, timiqo no ighamku qaukhave.

⁵ Eno panongu no tipa-a pesü Bokhim kuvetsü eno tileno Ampeu lau aghakishi tsüe.

Joshua Kithi

⁶ Joshua no Israelmi puwove kethiu kümtsü no pütüta saje shitsü keu yeghi pükha lukhave.

⁷ Joshua no xüake kutolo, Israelmi ye Ampeu huthu ache, eno pa thiu layemi khunoqo Ampeu no Israelmi lau akümla kije mlatsü keu ithulu keno, pano küxü tivilo Israelmi ye Ampeu huthu cheke.

⁸ Ampeu qeu Nun nu Joshua ye apunu mpe 110 shiake lono aküxü kühave.

⁹ Pa ye Gaash naghuto ahuu Ephraim ghakhu lo, pa saje shitsü keu, Timnath-heres lo qhove.

¹⁰ Eno tipa tiqhelimi kümtsü thi khave no tipa shelo ipeghi keu tiqhelimi ye Ampeu mtha eno Ampeu no Israel ghenguno kiu mlatsü keno mthae.

Israelmi Küpülü Küküha

¹¹ Israelmi no Ampeu zülo küsakügha shiuve eno Baal mllau khave.

¹² Panongu no Ampeu pano puasü Lhou, khuu no Egypt lono panongu saipeghi keno, Pa pheve. Panongu ye alhou kütauqo phuwuve, eno timi kütami khunoqo pano sümxape ache keno, tipaqo lhou mllauve. Tishikeu lono panongu no Ampeu mlo shikighide tsüe.

¹³ Panongu no Ampeu pheve no Baal ngo Ashtaroth mllauve.

¹⁴ Ikehu Ampeu no Israelmi lau ighono axuideve no panongu pesü süxakuchumi tsüve no tipaqo no pano xüle puwuve pe. Pa no pano ghümi u lo panoqo jesüve, tishikeu lono Israelmi ye kiu nomu panongu süshokulupu shimlave.

¹⁵ Ampeu no kütüghü eno tushoqhi püake toi kughou panongu no aghüshi lo wuni keno, Ampeu u no pano mjochile. Eno panongu ye aghime küsa shike.

Ampeu no Xaküthami Puthu

¹⁶ Tishino Ampeu no xaküthami puthu eno tipaqo no süxakuchumi launo pano xaphe.

¹⁷ Ikeghi panongu no xaküthami tsa initsü moe kughengu panongu no alhou kütauqo sasü kütüqha eno tipaqo mlla ke. Pano puasüqo no Ampeu zakütsü gholu ghi cheche keu laghi lo panongu ye püla move.

¹⁸ Kugho kughomu Ampeu no panongu ghenguno xaküthami süsü aye, Ampeu no pa gholo ache, eno pa küxü tivilo pa no aghümi u lono timiqo xaphe che. Kughengu aghümi no ghime keu ghügha ghenguno Ampeu no panongu kimiyeve cheke.

¹⁹ Ikemu kugho kughomu xaküthau no thive kemtsa timiqo ye itaghi idechile aqau küxü lo ilove no pano puasüqo nguno alau alhoksa shikitheve che, eno alhou kütau mlla eno huthuuve cheke. Panongu ye pano lhoksa kümla ngo kuthovi keu lhoaye phevemoe.

²⁰ Ikehu Ampeu mlo kighide no Israelmi shou ikuve no pi, “Timi hipaqo no Puloshoqhi khikhi I no pano puasü vilo shilo pi keno, ti hexave eno I gholu move kehu,

²¹ Joshua no haphemo no qhive keqo shiye lakhimu, Ni ye haphe moae,

²² tishino I no Israelmi pejuni cheni; pano puasüqo toi panongu ye Ampeu laghi lo züni kemo keno juni.”

²³ Ikehu Ampeu no shiye tipaqo haphemo no tilau küghüna achepe, eno Pa no shiye tipaqo Joshua u lo phesü tsümoe.