XAKUTHAMI 19 - Sumi Naga CL (Re-edited) Bible (BSI)

Levi eno Pa nipu Amishiu

¹ Tipa ghuloki lo Israel lo akükau kühano ache kelo Levimi lakhi Ephraim toghi ghakhu cheku lo ache. Pa no Judah ghakhu lo Bethlehem lono ilimi lakhi pa nipu amishiu shinike lue.

² Ikemu li no akimi lau amikucho shimove no idewo Bethlehem lo apuno kilo aqhi bidi kutolo ngove.

³ Timi huno li pütsa kideküdai shino li sasü aki lo ideighive nike li lau wu. Pa no pa qeu lakhi eno khurha kini pa gholo sawu. Anipu no pa sasü iloghi kelo apu no alokivi shi pa pütsa.

⁴ Pa ngu no tsüikhomo pa pelo tilau atsala küthü ngovepe. Ikehu pama kümtsa chusho eno tsüküzü puwove.

⁵ Atsala abidini pa ye inaqhe ithe ithuve no cheveni ke aghili kutove. Ikemu apu no pa vilo pi, “Asho chuno ampi shikumtolu no wolo.”

⁶ Pama kümtsa iqa no chushove. Tileno li papu no pa vilo pi, “Kimiyeno itiji ghi züve no o mlo vepiqi lulo.”

⁷ Kughou Levimi huno cheveni ke ithughi keno, itaghi pangu no tsüikhomo ngovelo pi auve, tighenguno pa ye tipaji ghi tilau züve.

⁸ Atsala apunguni inaqhe, pa ye cheveni ye itheno ithuve. Ikelo pangu no pa vilo ishi pi, “Chusho no o shikumtolu lo eno puchou no wolo.” Ikehu pama no itaghi kümtsa chuae.

⁹ Kughou timi eno pa nipu amishiu ngo pa qeu pano küthü no cheveni ye shive keno itaghi apu no pi, “Julo, avela shiwo cheae; tighenguno itiji ye hilau ngove lo. Atsala ye avela shiwo cheae, hilau züve no o mlo vepiqilu lo eno thoghiu no itheno ithu aki lo wolo.”

¹⁰ Ikemu timi huno tipaji ye zünishi move kehu pa ye ithu no chesü Jebus (ti ye Jerusalem) lo ighi. Pa gholo khurha kini eno pa nipu amishiu che.

¹¹ Panongu no chesü Jebus kupunu ighi kelo atsala iloveni kelau shive, ikehu aqeu no ampeu vilo pi, “Ighilo, ningu Jebusimi phughi hipau lo ilo no itiji tilau züveni nolo.”

¹² Pa mpeu no pi, “Ningu ye inami phughi lo ngomlae ikemu hechesü Gibeah lo wuveni.”

¹³ Pa no pi, “Ighilo, pükapütsa no Gibeah momu Ramah tolu aye ti küma khikhiu lomu züveni.”

¹⁴ Panongu no Benjamin yeghi lo Gibeah toluke mtsa khetsünhe ilove.

¹⁵ Ikehu Gibeah lo züveni keu shi ilove. Panongu no aphughi lo iloghi no kobidi-a lo ngove, kughengu khuno kilo mu panongu sasü move.

¹⁶ Ikelo velami lakhi alu lo huno woche ghi. Pa ye inahuu ye Ephraim ghakhu lono ighi kemi, ikemu itehi ye Gibeah lo xüsüve kemi eno Gibeah lo küami ye Benjamin laghami ke.

¹⁷ Pa no kicheghüzümi kobidi-a lo iqa aghi keu ithulu no pi, “Nongu ye khilau no ighi eno khila wucheni kea?”

¹⁸ Levimi huno khochile, “Ningu ye Judah yeghi lo Bethlehem lono izüsü Ephraim ghakhu lo ni kilo idewo cheni. Ni ye Judah lo Bethlehem lo wuke, eno Ampeu kilo wucheni kemu khunomu ni sasü mono ani.

¹⁹ Ningu ye khurha no chukepu aghijini pucheni eno I nipu ngo aqeu ni küthü ghenguno asho ngo atsaiji pucheni. Ningu no kiu avehupu shi ani keno kümtsü pucheni.”

²⁰ Velami huno pi, “Aloino lo; I no nongu no avehupu shi akeu kümtsü tsüni. Ikemu kimiyeno alaghila lo zü kevilo.”

²¹ Tishino pa no panoqo sasü pa kilo wono panoqow khurha achuqupu tsüve. Eno panongu no apukhu qhuve no chushove.

Gibeah Xine

²² Panongu no chushove no alokughuno shi akelo aphughi lo timi lhoksami ighi no aki sühope ngoluve no ahukikha lo hepuku thuve. Eno panongu no velami vilo pi, “Timi khuu o kilo ighi keno, pa sasü ipeghi lo, ningu no pa ithinie.”

²³ Tileno velami, aki mpeu no khalau ipe no panongu vilo pi, “Moe, I thiküzümiqo, kixikila shi kevilo; timi hipau ye I kilo ighive akeke Iw shoinami ae. Alhoksa hitoike shi kevilo.

²⁴ Julo, I nga ililhothe ngo pa nipu amishiu anike I no pama saipeghi tsünike tilauno nongu no kiu kiu shinishi ani keno nongu gho shivelo, ikemu timi hipau lau ye akumou kümla shi kevilo.”

²⁵ Ikemu timiqo no pa tsa ini tsümoe. Ikehu Levimi huno pa nipu amishiu khalau pipeve. Tileno panongu no puthotsü li süqoqhi eno shipüthasü thanau tove eno tsükutho launo li pheve.

²⁶ Tsütho ipeche kelo li no ighi no li mpeu no zü akeu ki hukikha lo ikiqive. Li ye khetsünhe ipeghike kutolo tishi ngove.

²⁷ Li mpeu no ithughi no ahukikha khaqhisü wuveni ye cheke lono pa nipu no li u chhopuwo ahukikha tomla no akulaghi lo ikiqi aghikeu sholu.

²⁸ Pa no li vilo pi, “Ithughi lo, ningu wuveni.” Ikemu kiumu khokichile kühave. Tileno pa no li khape khurha shou pukuve no pa kilo wove.

²⁹ Kughou pa no pa ki tolu keno, aki sholokuu ilo azütachi ikhipe pa nipu phimpi ghitha chighikini shive no aleqhi lakhikhi pesü Israel lagha chighikini lau kijeve tsü.

³⁰ Ti ithulu kemi kümtsü no pi, “Israelmi no Egypt qhive no ipeghike tsala lono ishi kutolo khilemu hikithipu shiju mphi; tsaqüi kümsü julo, akükümsü tsükile julo, eno achipiu tsa pilo.”