XAKUTHAMI 18 - Sumi Naga CL (Re-edited) Bible (BSI)

Micah eno Danmi

¹ Tipa ghuloki lo Israel lo kükami kühae. Tishi akelo Dan shiaye ye pano mheghi yeghi phuche, kughengu tikutolo Israel shiaye dolo khunomu pano yeghi pesü Dan laghami u lo sütsü mphike.

² Ikehu Danmi no pano timi dolono, ti ye Zorah lo ngo Eshtaol lono, amlo kumtomi pungu kishepe ayeghi kivi pujuwu pe. Panongu no pano pungu vilo pi, “Wuno ayeghi pujulo.” Panongu no Ephraim ato yeghi lo ighi eno Micah kilo ngolu.

³ Kughou panongu no tile akeno, panongu no Levimi apumi tsapi michilu. Panongu no lomoshi pa iniju, “Khuu no hilau o saghi kea? No ye hilau kiu shi ani kea?”

⁴ Pa no khochile, “Ni ye Micah sasü ishi avehu pekithi püani: pa no ajume I tsüno ni ye pa chineu shi ani.”

⁵ Panongu no pa vilo pi, “Kimiyeno nino kicheghüzü shi wuche keu ye tolu nani kemo keno Alhou vilo iniju tsülo.”

⁶ Achineu no khochile, “Aloino wulo. Nongu ghüzüla ye Ampeu nhethe lono checheni.”

⁷ Pano pungu no wuve no Laish lo ighi. Panongu no tile timiqo no xüakeu ithulu: kishi sükusho kivi lo xüani, eno kishi Sidonmi xüghola lono iqüghai pülüküpsa kühano acheni keno ithulu. Panongu ye kinikülü shi ayeghi lo thime kiumu püqü mono xüaghi; Sidonmi launo ala sheshulo akemi eno khunomu sasü kütshükime mono aghie.

⁸ Kughou panongu no idesü Zorah ngo Eshtaol lo ighi keno, pano thiküzümi no iniju, “Nongu ye kiu sütsa ani kea?”

⁹ Panongu no khochile, “Ithulo, ningu wuno Laish leni, kughengu nino ayeghi ithuluvae, ighono alo ani. Nongu ye kiumu shimo keshea? Tilau wuno ayeghi lenike qeinai kevilo.

¹⁰ Kughou nongu no ti toni keno, nongu no timi pülüpüsamo kemi sholu nani. Aghakhu tipau ye ililai ani eno tilau ye ayeghi lo thime kiumu püqü keu kühae. Alhou no nongu u lo süve tsüae.”

¹¹ Ikehu Zorah ngo Eshtaol lono Dan shiaye pano 600 aghüshi nanu xapusü wuve.

¹² Panongu no iqho Judah yeghi lo Kiriath-jearim lo aghazü shi. Hipau lono ishi kutolo tipa-a pesü Mahaneh-dan ipi cheni; ti ye Kiriath-jearim kulolau ani.

¹³ Panongu no tileno chesü Ephraim ato yeghi lo wuno Micah kilo ighilu.

¹⁴ Tileno pano pungu Laish lo ayeghi pujuwu keqo no pano thiküzümi vilo pi, “Aki hipau lo Ephod, aki lhouqo, ajulho, eno ghükayi julho qhipüa keu nongu ye ithi anima? Nongu ye kiu shini keno kümsü julo.”

¹⁵ Panongu no Micah ki khile Levimi akeno tile wuno pa ye kishi ani kelapi iniju.

¹⁶ Tipa dolono Danmi pano 600 ye aghü shinike aghili kutope khagho ikulo lo khea.

¹⁷ Ayeghi pukujumi pano pungu no vejoi aki sholokuu ilo no Ephod, aki lhouqo, ajulho, eno ghükayi julho ikhiluve; tishi akelo achineu ye ghüshimi 600 gholo khagho ikulo lo ae.

¹⁸ Kughou panongu no Micah kilo ilo no Ephod, aki lhouqo, ajulho, eno ghükayi julho ishi ikhiluve keno, achineu no panongu vilo pi, “Nongu ye kiu shi ani kea?”

¹⁹ Panongu no pi, “Qümüilo, o u no o kichi kujukhape ni gholo ighive lo, ningu papu eno achineu shilo. Timi lakhi kibo lo achineu shi akeu ye Israel shiaye eno alagha shou achineu shikeu pavimo keshea?”

²⁰ Achineu ye alovive, eno pa no Ephod, aki lhouqo, eno ajulho ikhiluve no panongu sasü cheve.

²¹ Panongu no ideighi no pano nuli, pichepighi eno anhemgha kümtsü pesü cheve.

²² Panongu no Micah ki lono kushuo lo wuve kethiu no Micah no pa kisüghümi sasü hawu eno Dan timiqo halu.

²³ Panongu no ighamku kelo Danmi no tsüghüwo Micah vilo iniju, “Kiu shivepi no ye timi hijeje sasü ighi ani kea?”

²⁴ Micah no pi, “Nono I lhouqo eno achineu sasü wuve no I ghenguno kiumu qhitsü moe, tishino itehi ye kishino I vilo ‘No ye kiu shive akea?’ ipi iniju ani kea?”

²⁵ Danmi no pi, “Ningu pelo o sütsa chilupe kevilo, tikumo aye amlo kighidemi hipaqo no no eno o kibolomi kümtsü küxü pühave tsü nosae.”

²⁶ Tishino Danmi no cheve. Micah no hupaqo ye pa nguno ighono akumto shi aghi keu ithive no idechile pa kilo wove.

²⁷ Ikemu Danmi no Micah no mlakeu lhou ngo pa chineu sasü Laish lo timi iqüghai eno kütami pülüpüsamo keqo lau ighi eno pano zütakikihi pesü tipaqo ghiqhive no mishighüna pitive tsü.

²⁸ Tile pano xaphekuluu kühave kughengu panongu ye Sidon lono putosüu ake, eno panongu ye khuno sasümu kütshükime keu kühake. Ti ye Beth-rehob khila lono tishie. Panongu no mishighüna tipau mla kitheve no tile küghüna luve.

²⁹ Eno tipau pesü Dan ipi pano pasü je lono kukideve. Ikemu atüghü loye Laish ipi cheke.

³⁰ Tishino Danmi no ajulho ghope qhive eno Moses nu Gershom nu Jonathan ngo pa nuliqo no Danmi gholo achinemi shiche. Panongu ye inami yeghi lo akughumi shi sawu moke kutolo achinemi shiche.

³¹ Panongu no Micah no mlakeu julho pesü tilau ghope qhive eno Alhou ki no Shiloh lo ake thaqhülo, tishi ache.