XAKUTHAMI 17 - Sumi Naga CL (Re-edited) Bible (BSI)

Micah eno Levimi

¹ Ephraim ghakhu lo timi lakhi Micah ache.

² Pa no paza vilo pi, “Ow ghükayi 1,100 püka süwuve kelo nono ghusho no I vilo pi keu hu julo, ghükayi tipau Iw lo ani; I no luveke.” Pa za no pi, “Ampeu no I nu kümghatsü peni.”

³ Pa no ghükayi hu pesü paza tsüchile kelo li no pi, “Ghukusho I nu shou iku pemoni ke I no ghükayi hipaqo pesü Ampeu lau tsüve ani. Hipau pesü no ajulho ngo ghükayi julho mla peni. Ikehu I no o tsüchileve ani.”

⁴ Tishino pa no tipau paza tsüve. Li no ghükayi 200 pesü ayi kiyiqimi lakhi pelo ajulho ngo ghükayi julho mla phevepe. Ti ye Micah kilo ghope qhivetsü.

⁵ Micah ye pa kümlla khache ache, ikehu pa no Ephod ngo aki lhouqo mla no pa nuli lakhi pelo pa chineu kümla shipe.

⁶ Tipa ghuloki lo Israel lo akükau kühae; kümtsü no pütüta ghoshi xüche.

⁷ Levimi lhothemi lakhi Judah lo Bethlehem phughi lo ache eno pa ye Judah laghami gholo xüche.

⁸ Pa no Bethlehem qhive no a-a kütau khileala ngoni ye wuve. Pa no kicheghüzü shi cheke lono Ephraim ghakhu lo Micah kilo ighilu.

⁹ Micah no pa iniju, “No ye khila no ighi ani kea?” Pa no pi, “Ni ye Judah lo Bethlehem lono ighi kemi Levimi, eno khile khilemu a-a ithulu keu lo xüsüve niye cheni.”

¹⁰ Micah no pi, “I gholo ngove lo. I pu kumlhoshi eno achineu shitsülo, tishiaye I no ampe lo ghükayi chighi gholo aphimini ngo achuqupu o tsüni.”

¹¹ Levimi apuu huno Micah gholo ngoni keu pulove eno pa ye pa nuli gholo lakhi kumlho shive.

¹² Tishino Micah no pa pesü pa chineu shi penike nukisheve, eno pa ye Micah kilo acheuve.

¹³ Micah no pi, “I no ithi anike itehi ye Ampeu no I kümghatsü nani kughengu Levimi no I gholo achineu shivae.”