XAKUTHAMI 16 - Sumi Naga CL (Re-edited) Bible (BSI)

Samson ngo Delilah

¹ Samson no Gaza lo wuke lono kütüqhalimi sasü kusholu, eno pa no li sasü züve.

² Gazami vilo asütsa tsüve, “Samson ye hile ighi ani.” Panongu no a-a tipau homxape puthotsü qümüi khepe ngono panongu dolo küptsa kile, “Ningu thanau tsütho ipeghi keu kheno pa pithiveni.”

³ Ikemu Samson no zübumta kutolo züa püzü ithuve no aphughi khagho hukikha ngo atsükucho kini ishi süjope pa bighi shou beno Hebron zülo atoghi akeu kütsüqa lo iqhove.

⁴ Tithiu Samson ye Sorek khila lo küami totimi lakhi Delilah ipikeu sasü küzüvü wuve.

⁵ Philistiami yepemi no li lau ighi no pi, “Samson züiza no pa kumto ye kiu lono ani, eno kiu lono ningu ye pa mhoqhipe shikuchuni luve nani keno phuju lo. Tishi aye ningu lakhi khino ghükayi 1,100 pesü o tsüni.”

⁶ Ikehu Delilah no Samson vilo pi, “O kumto ye kiu lo ani keno, kimiye no I vilo pilo eno khuana no o qhasüni shi aye, pa ye kiu ghola lono o tishi masa nani kea?”

⁷ Samson no li khochile, “Tsala panongu no shexilika kighi qhai mphi keu akithe tsüni pesü I phedave aye, ni ye miqemleive nani eno timi kütami toive nani.”

⁸ Philistiami yepemi no shexilika kighi qhai mphi keu akithe tsüni pesü li tsü eno li no ti pesü Samson phedave.

⁹ Li no timi khami pesü achebo kütau lono ngokhepe. Li no pa vilo pi, “Samson, Philistiami ye o lau cheae!” Ikemu Samson no shexilika kighi, ayeho no ami diluke toi süthave tsü. Ikehu paw tuqhou kumto kiu lo akeno mthave.

¹⁰ Delilah no Samson vilo pi, “Julo, no ye akimki tsa I vilo pino I thoghavae. Kimiyeno kishi o tshülu nani keno, I vilo pilo.”

¹¹ Pa no khochile, “Panongu no peitha jumphi keu akighi kithe pesü I phedave aye ni ye miqemleive nani eno timi kütami toive nani.”

¹² Ikehu Delilah no akighi kithe pesü pa phedave. Tishino li no pa vilo pi, “Samson, Philistiami ye o lau cheae!” Pa leni keqo ye achebo alou lo ngoae. Ikemu pa no akighi hu ayeho sütha ketoi pa u lono süthave tsüe.

¹³ Tileno Delilah no Samson vilo pi, “Itehi kutolo no ye I vilo miki aphi eno I thogha ani. I vilo pilo, kishino o phedalu nani kea?” Pa no pi, “Nono I sa kipili tsüni shi ghoküna no mtotoi aküptasü no pütave aye, ni ye miqemleive no timi kütami toive nani.”

¹⁴ Pa no züake lono Delilah no pa sa kipili tsüni shi ghokünape aküptasü no pütave no pi, “Samson, Philistiami ye o lau cheae!” Ikemu pa no idathughi no aküptasü süjove, eno pa sa pili püakeqo xaleqhive.

¹⁵ Tile li no pi, “O mlo no I gholo küha keghi no ye kishino, ‘Ni ye o kimiye ani,’ ipi luni kea? No ye ghuthu küthü kutolo I thoghavae eno itehi kutolo kiu lono akumto ani keno I vilo pi mphie.”

¹⁶ Kughou li no tsalakipe iniju kichichi auve keno, pa ye angaghai ipeghive.

¹⁷ Ikehu pa no ashekha loye paw tuqhou kümtsü li vilo pive. “Aqe pesü khilemu I sa miye mphi, kughengu ni ye I za tita lono Alhou lau tsüve kemi, Nazirmi shive ake. Tsala I kütsüsa miyeve aye, I küka ye I qhive nani eno ni ye miqemleive no timi kütami toive nani.”

¹⁸ Kughou Delilah no pa ye paw tuqhou kümtsü li vilo pikeu ithive keno, li no Philistiami yepemi kupuwu no pi, “Itaghi ighi lo, kughengu pa ye I vilo pa mlo tsa kümtsü pivae.” Ikehu Philistiami yepemi no li lau pisa pesü ighie.

¹⁹ Delilah no li lukobo lono Samson müzü püzüve, tishino li no timi lakhi kuno Samson sa kipili tsüni miyeve tsüpe. Li no Samson ghime thuve eno pa küka no pa qhive.

²⁰ Li no pi, “Samson, Philistiami ye o lau cheae!” Pa no idathughi no pi, “Thosülo toi I no khalau ipe no ni ampi kuqhoveni.” Ikemu Ampeu no pa phevae pi pa ye mthano ae.

²¹ Philistiami no pa küghaluve no anhethi lejove tsü eno sasü Gaza lo iqighive. Alazayi yikichhe no pa tshüve no akughuki lo potsüghü kümla shi auvepe.

²² Ikemu pa no tile ake lono pa sa ipeghi no thuwuve.

Samson Kithi

²³ Tithiu Philistiami yepemi no kumqo no aghakishi kije pesü pano lhou Dagon mllani keu shi. Panongu no pi, “Ni lhou no ni ghümi Samson pesü ningu u lo süve tsüae.”

²⁴ Kughou timiqo no pa ithulu keno, panongu no pano lhou sheqhe no pi, “Ni lhou no ni ghümi ni yeghi shiküpsau khuu no ni timi kutomo pithive tsü keno, pa pesü ni u lo süve tsüae.”

²⁵ Kughou panongu no shomzüve keno ishi pi, “Samson kuphelo, eno pa pelo ningu lopivi tsü peni.” Ikehu panongu no akughuki lono Samson sasü ipeghi no pa pelo pano lopivi tsüpe. Panongu no pa pelo atsükucho kijeje kini dolo puthughope.

²⁶ Samson no apumi khuu pa küghape akeno, pa vilo pi, “I pelo hi aki choqhepe akeu tsükucho bulu pelo, ni ye tipau mungupe ngonishi ani.”

²⁷ Aki tipau lo kiptimi totimi no chhitoi kuhoqhe ae. Philistiami yepemi kümtsü tile ae, eno aki tsüqau ghi kiptimi totimi 3,000 kutolo Samson juae eno pa pelo panongu lopivi tsü apeke.

²⁸ Tile Samson no inikhu, “O Ampeu Alhou, kimiyeno I kümsülu tsülo eno thosülo küka ghuthu lakhi I tsülo, O Alhou, tishikeu lono I nhethi lejove tsükeu ghenguno I no Philistiami shou amkhü luveni.”

²⁹ Tishino Samson no aki tsükucho amtau küma, khikhi no aki choqhepe akeno, ti küma mtuluve. Pa u ajeu no lakhi eno piyiu no lakhiu mtuluve.

³⁰ Pa no pi, “I pelo Philistiami gholono thive pelo.” Tishino pa no pa küka kumto kümtsü pepheno sükini thu, ikelo aki no ilaqi Philistiami yepemi ngo tile kuho akemi kümtsü shou ikuve. Samson no pa xülono pithi keu nguno alau pa kithi tsala lou no timi kutomo pithive tsüe.

³¹ Pa thiküzümi eno pa kibolomi kümtsü iqighi no pa sükumo pesü wuve no Zorah ngo Eshtaol küma dolo khile papu Manoah kumo akeno tile qhove. Pa ye ampe muku Israelmi shou xaküthau shie.