XAKUTHAMI 15 - Sumi Naga CL (Re-edited) Bible (BSI)

Philistiami Theqhive

¹ Atsala hami thiu ashothi ghile huake ghuloki lo, Samson no ane lhothe lakhi pesü pa nipu pütsani ye wu; eno pa no li papu vilo pi, “Ni ye I nipu chebo lo ilonishi ani.” Ikemu apu huno pa pelo ilo pemoe.

² Samson vilo pi, “No ye mtsüqheino li mithivae pi kümsüve no ni ye li pesü o küsau tsüvae. Ikemu li tsünipu no li nguno ajukiviu ke kumo? Kimiyeno atsünipuu luvelo.”

³ Samson no panongu vilo pi, “Ishiu ye I no Philistiami ghime namu, ni ye achipi aniae.”

⁴ Tishino Samson no wuno aghalo tsü 300 küghape ashomhi kinini no tsügha küqhave tsüno ti kumkho keu lo akuluqhe tsüghadave tsü.

⁵ Pa no akuluqheqo lo ami süve tsüno tipaqo kuqhope Philistiamiw ashothi lu lo hasüve. Ikelo ashothi lu eno ghile hupe hekütsü püakeqo ngo Olive ghutu kümtsü ami no pitileve.

⁶ Philistiami no pi, “khuu no hi shive akea?” Timi khami no khochile, “Timnahmi makishiu Samson noe, kughengu pangu no pa nipu pesü pa küsau kilo puwove ke.” Philistiami no ighi no atotiu ngo li papu pama ami no pitiqhive.

⁷ Samson no panongu vilo pi, “Nongu no hitoi shi aniaye, I no tushoqhi ani, nongu shou amkhü lumoke kutolo ni ye inaqhoi monani.”

⁸ Eno pa no tipaqo yiku ngo alukobo kümtsü ghapuku no kutomo pithive, eno pa ye iqi Etam tuxu lo ngove.

⁹ Philistiami no ighi no Judah lo aghazü shino Lehi le thuve.

¹⁰ Judah lo timiqo no pi, “Kushiye nongu ye ni le ani kea?” Panongu no pi, “Ningu ye Samson tshüpe wunike ighi ani, pa no kiu toi ningu lau mla keno tipaphi shi pa lau shiniye ighi ani.”

¹¹ Tileno Judah lo timi 3,000 no Etam tuxu lo iqi no Samson vilo pi, “Philistiami ye ni shou yepemie pi no ye mtha keshea? No ye ningu lau kiu shive akea?” Pa no khochile, “Panongu no I lau mlake toi ni ghi tipatho panongu lau shivae.”

¹² Panongu no pa vilo pi, “Ningu ye o tshüpe Philistiami u lo süve tsüniye hilau iqighi ani.” Samson no pi, “Nongu ampi ye khilemu I heqhimoe pi tushoqhi lo.”

¹³ Panongu no pi, “Moe, ningu ye o heqhimoe, ikemu o tshüpe panongu u lo süve tsüke likhi shini.” Ikehu panongu no akighikipili akithe kini no pa tshüpe atuxu lono khape iqhoghi.

¹⁴ Pa no Lehi lo ighi kelo Philistiami no posü pa küdau ighamku ighi. Paikhavi Ampeu küka no pa shikumto luve no akighikipili pa phiau tsügha püakeu ye ami no pitive keshi ichonhei itaiqive.

¹⁵ Pa no tile khurha anileshi thive keu mükhüghi lakhi ithulu no pa u chhopiqi ti ikhipe timi 1,000 heqhi pithive.

¹⁶ Samson no pi, “Khurha mükhüghi pesü I no timi qhethonhe heqhi, Khurgha mükhüghi pesü timiqo amoqhe pukue.”

¹⁷ Pa no ti pive kemtsa amkhüghi pa u lono peve. Tipa-a pesü Ramath-Lehi kuvetsü.

¹⁸ Samson ye ighono tüghüthive, ikehu pa no Ampeu vilo pi, “Nono xakulu kije hipau pesü o qeu tsüe, ikemu itehi ni ye atüghü no thive cheake aphighüyiko ghamo kemi Philistiami u lo iloveni keshea?”

¹⁹ Tile Alhou no Lehi lo ayeghi kubokhu akeu lakhi lhaphe tsüno tipau lono azü qoipeghi. Pa no azü yeve eno pa tüghü ghapiqi luno aghüthi püxülu. Tighenguno tipa-a pesü En-hakkore kuvetsü eno ti ye ishi kutolo Lehi lo aphi.

²⁰ Samson no ampe muku Israelmi shou xaküthau shilue.