XAKUTHAMI 14 - Sumi Naga CL (Re-edited) Bible (BSI)

Samson külakupu

¹ Ghulo lakhi Samson no Timnah lo iqi, tilauno pa no Philistia limi lakhi kujuthulu.

² Pa no aki lo ideiqho papu ngo paza pama vilo pi, “Philistiami ilimi lakhi Timnah lo I no ithulue, ni ye li sasü külakupu shinishi anike li saghi tsülo.”

³ Ikemu papu ngo paza pama no pi, “Ni limi dolo momu ni shiaye dolo totimi kühave akesheno kushiye no ye aphighüyiko ghamo kemi Philistiami lau o nipu phuwu ani kea?” Ikemu Samson no papu vilo pi, “Li ye I ghenguno achipi shi anike li lu saghi tsülo.”

⁴ Hi ye Ampeu launo kepi pa puaza ye vethamlae, kughengu Ampeu ye Philistiami sasü aghü shini keu tüqhüdo phuju ake. Tipa ghuloki lo Philistiami no Israelmi shou ayepe che.

⁵ Tishino Samson no pa puaza sasü Timnah lo iqi chekelo atsailu lo ighi. Abongshuu lhothe lakhi no ighasü pa küdau ighi.

⁶ Paikhavi Ampeu Ghungu no pa lolo iloghive, eno pa no au kümsano aneti lakhi süla akeshi abongshuu sülatha pinyive. Ikemu pa no kiu shive keno tipau ghili pa puaza vilomu pimoe.

⁷ Tishino pa no ayiliu lau wuno li sasü küptsa eno li ye pa pulou shi ithulu.

⁸ Atsala hami thiu Samson no li saluni ye idewu. Pa no tsüghüwo abongshuu kumo jukelo abongshuu phi lono akhi ishe aghi eno akhingozü aghi.

⁹ Pa no au chhopulo akhingozü muxuphe no chusü wuve. Tishino pa puaza lau hami pesü ighi no tsükelo pama no chuve. Ikemu akhingozü ye abongshuu kumo lono lisüghie pimoe.

¹⁰ Papu no ayiliu lau iqighi eno akhuaye kiqi lono Samson no aghulhu kije lakhi kuto.

¹¹ Kughou timiqo no pa ithulu keno panongu no apumi shighi pa gholo ngo penike saghitsü.

¹² Samson no panongu vilo pi, “Sülekutho lakhi I no nongu vilo pini. Nongu no aghulhu tsala tsüni dolono tipau kiqi I vilo pilu aye, I no phepheike phi shighi eno aghulhu lo pepu chekeu phi shighi nongu tsünike khü ani;

¹³ ikemu nongu no I vilo pimlave aye nongu no phepheike phi shighi eno aghulhu lo pepu chekeu phi shighi I tsüni.” Panongu no pi, “Ow sülekutho piju lo, nino inijuni.”

¹⁴ Tileno pa no pi, “Tsükuchuu launo kiukela chukepu ipeghi. Akumtou launo thime kiukela ngonyi keu ipeghi.” Atsala küthü kutolo panongu ye kiqikuto mlave.

¹⁵ Atsala abidini panongu no Samson nipu vilo pi, “O kimi züiza no sülekutho kiqi inijupe ni vilo pilo, tikumo aye ningu no o pu kilo ami süve tsüno no ghi tipau gholono piti küqhaveni. Nongu ye ni kusü no ni shipüqüve niye ani keshea?”

¹⁶ Samson nipu no anhezü ipeghi ghi pa vilo pi, “No ye I kimiye amoe; no ye I mithi ani. Nono Iw timiqo lau sülekutho pi kemu I vilo tipau kiqi pitsümoe.” Pa no li vilo pi, “Julo, ni ye I pu ngo I za pama vilomu pi mphike kishino o vilo pini kea?”

¹⁷ Li no atsala tsüni aghulhu shi ake kutolo pa zülo qauve, eno atsala akütsüniu lo ye pa no akiqi li vilo pive, kughengu li no pa pünaqhi auveke. Tileno li no sülekutho kiqi liw timiqo vilo pive.

¹⁸ Atsala akütsüniu khetsünhe ilomphi züuno mishighüna lo küami no pa vilo pi, “Kiu no akhingozü nguno ngonyi kea? Kiu no abongshuu nguno akumtou kea?” Pa no panongu vilo pi, “Nongu no I mishiqu sasü hokide moke aye, nongu ye Iw sülekutho phuphe mlani cheke.”

¹⁹ Tileno Ampeu Ghungu no pa shou ikughive, eno pa no Ashkelon lo iqi no tile xüküami shighi heqhive no pano phiminiqo hakho pewo sülekutho pikeqo tsüve. Pa ye ighono amloidesü papu kilo idewove.

²⁰ Eno Samson nipu pesü pa ghulhu lo pa küsau kiviu tsüve.