XAKUTHAMI 13 - Sumi Naga CL (Re-edited) Bible (BSI)

Samson Punu

¹ Israelmi ye itaghi Ampeu zülo küsakügha shiuve, ikehu Ampeu no Philistiami pelo pano shou ampe lhobidi kutolo qhasüve pe.

² Tipa ghuloki lo Dan shiayemi Zorah lo xüsüve kemi timi lakhi, Manoah ipikeu ache. Pa nipu ye atianuli ithumla no ache.

³ Ikelo Ampeuw kungumi no li lau ipeghi no pi, “Julo, no ye anuhami eno atianuli küha no ighivae, ikemu no ye mishiniae eno anu lakhi punu nani.

⁴ Tighenguno kutokupui luve no kiukiu tsaizü momu akümka ji pinamu sho kevilo eno mithekumo chuqupu chu kevilo,

⁵ kughengu julo, nono mishipuve no anu punu nani. Khilemu pa kütsüsa miyetsü kevilo, kughengu pa ye atita lono Alhou lau ikhiphepe tsüve kemi, Nazirmi shinani, eno pa no Philistiami launo Israelmi xaluni keu kümla huthu nani.”

⁶ Totimi huno li kimi vilo pi, “Alhou timi lakhi I lau ighi, pa jukelo Alhouw kungumi toi ighono qhivütsünyi. Pa ye khila no ighi keno ni ye iniju move eno pa ghi pa je I vilo pimoe.

⁷ Ikemu pa no I vilo pi, ‘Julo, no ye mishipuve no anu punu nani. Ikehu kiukiu tsaizü momu akümka ji pinamu sho kevi, eno mithekumo chuqupu chu kevilo, kughengu anu ye atita lono pa kithi tsala kutolo Alhou lau ikhiphepe tsüve kemi Nazirmi shinani ke.’”

⁸ Tile Manoah no Ampeu lau inikhu, “O Ampeu, Nono Alhouw timi puwu keu pelo ni lau itaghi ighi pelo eno anu punu niye akeu hu kishi saputhuni keno ni shika piyetsü pelo.”

⁹ Alhou no Manoah no qhüiniju keu shitsü eno kuchono Paw kungumi huno pa nipu no alu lo iqa akelono li lau ideighi. Ikemu li kimi Manoah ye li gholo kühae.

¹⁰ Ikehu li no mtazü posü li kimi vilo pi, “Julo, timi khuu ishiküthüni I lau ipeghi keno, itaghi I lau ighi ani.”

¹¹ Manoah no ilhethu pa nipu pape timi lau wuno iniju, “I nipu sasü küptsa keu hu no keshea?” Pa no pi, “Iyei.”

¹² Manoah no pi, “Tishiaye, kughou nono pikeu tsa shikupuni keno, anu ye kiu gholau no xümasa eno pa kümlapu ye kiu shinani kea?”

¹³ Ampeuw kungumi no khochile, “I no o nipu vilo kiu pive akeno tipaqo kümtsü shimasae.

¹⁴ Li ye atsaibo lo pekighi kiumu chumoni; kiukiu tsaizü momu akümka ji pinamu shomoni eno mithekumo chuqupu chumoni. I no azah kiu li tsüve akeno ti kümtsü pekupu lo.”

¹⁵ Manoah no Ampeuw kungumi vilo pi, “Kimiyeno kitila ngokhe tsülo, nikujo no aneti lakhi heqhipe lho no o tsüni.”

¹⁶ Ikemu Ampeuw kungumi no pi, “I no ngokhe namu no chuqupu chumoe, ikemu nokujo no akipti kümllagho kutoni shiaghi aye, Ampeu lau mlla lo.”

¹⁷ Manoah no Ampeuw kungumi vilo pi, “Nono pikeu tsa shikupu kelo nikujo no o gihuni ke o je khuu kea?”

¹⁸ Kungumi no pi, “No ye kushiye I je ithinishi ani kea? Hi ithulu akeu no akümzapue.”

¹⁹ Ikehu Manoah no athi kümllagho gholono ane lhothe lakhi pesü Ampeu khuu akümzapu mla cheni keno, Pa lau atu shou bepe qhino mllave, eno Manoah ngo pa nipu pama no ti juae.

²⁰ Kughou akümlla-khache lono ami no iqüsü kungugha küdau iku keno, Ampeuw kungumi ye amiküqü gholono kunguu ikuve. Manoah ngo pa nipu pama no ti ithulu no agi pishiqhope ayeghi lo ikiqive.

²¹ Tinguno tilau ye Ampeuw kungumi ye khilemu Manoah ngo pa nipu pama lau ipeghi move. Manoah no timi tipau ye Ampeuw kungumi kepi ithive.

²² Pa no pa nipu vilo pi, “Nikujo ye Alhou ithuluve akeke thiveni pütsae.”

²³ Ikemu pa nipu no khochile, “Tsala Ampeu no nikujo pithiveni keu shi aghi aye, Pa ye khilemu nikujo no akipti kümllagho ngo athi kümllagho pesü tsükeu ikhilu moni che, momu nikujo zülo hipaqo piye moni che eno akümzapu thime hipaqo ni vilo pimoni cheke.”

²⁴ Tithiu totimi huno anu lakhi punu eno pa je Samson kuvetsü. Eno anu ye thuwuve no Ampeu no pa kümgha tsüe.

²⁵ Pa no Zorah ngo Eshtaol küma dolo Mahaneh-dan lo ake lono Ampeu küka no pa xukutho thuve.