XAKUTHAMI 12 - Sumi Naga CL (Re-edited) Bible (BSI)

Jephthah ngo Ephraimmi

¹ Ephraim timiqo ye aghü shinike kutove; eno panongu no Jordan hechesü Zaphon lo ikughi no Jephthah vilo pi, “No ye kushiye azüghi hechesü Ammonmi sasü aghü shiniye wu keghi ningu kumove kea? Ningu no o ki gholono no ghi süküqha no pitive nani.”

² Jephthah no panongu vilo pi, “Ni eno Iw timiqo ye Ammonmi sasü shishe kimpive, tileno I no nongu ku kemu nongu no pano launo ni xaphe moe.

³ Kughou I no nongu laju pühave keno, I no ighümo no katha iku Ammonmi sasü aghüshi eno Ampeu no pano shou tokulu I tsüe. Imaye nongu ye kushiye I sasü aghü shinie piani kea?”

⁴ Tile Jephthah no Gilead lo küami kümtsü kukütsü no Ephraimmi sasü aghüshi. Eno panongu no Ephraimmi heqhi, kughengu tipaqo no pike, “Nongu Ephraim ngo Manasseh dolo küghüna chekemi Gileadmi, nongu ye Ephraim ghakhu lo kupokichemi ke.”

⁵ Gileadmi no Ephraimmi u lono Jordan lo azü kakütha-a hakholuve tsü. Eno Ephraimmi khuana no panongu vilo, “I pelo katha ikulu pelo,” ipi aye, Gileadmi no pa vilo pi, “No ye Ephraimmi keshea?” Eno pa no “Moe” ipi aye,

⁶ Gileadmi no pa vilo hitoi pilo piche, “Shibboleth,” ikemu timi huno achipi lo pimla no, “Sibboleth,” ipi aye tileno pa küghape Jordan kakütha-a lono pithive che. Hitoi Ephraim timi 42,000 kutolo heqhi pithive tsü.

⁷ Jephthah no ampe tsügho Israelmi shou xaküthau shi, tishino pa ye thive eno pa kumo ye Gilead lo pa no achekeu mishighüna lo qhove.

Ibzan, Elon, Abdon

⁸ Jephthah thiu Bethlehemmi Ibzan no Israel shou xaküthau shi.

⁹ Pa ye anu shighi, anga shighi, pa no pa ngaqo pesü alagha kütami kilo külapuwu eno pa nu shighi pelo inalimi shighi sasü külakupu shilupe. Pa no ampe tsüni Israelmi shou xaküthau shi.

¹⁰ Tishino Ibzan ye thive eno Bethlehem lo qhove.

¹¹ Pa thiu Zebulunmi Elon no ampe chighi Israelmi shou xaküthau shilu.

¹² Elon ye thive eno Zebulun yeghi lo Aijalon lo qhove.

¹³ Pa thiu Pirathonmi Hillel nu Abdon no Israelmi shou xaküthau shi.

¹⁴ Pa ye anu lhobidi eno atilimi shighi ache, eno tipaqo no khurha 70 sasü iqhoiqi che. Pa no ampe tache Israelmi shou xaküthau shilu.

¹⁵ Tishino Pirathonmi Hillel nu Abdon ye thive eno pa ye Amalekmi ghakhu, Ephraim lughi lo Pirathon lo qhove.