XAKUTHAMI 10 - Sumi Naga CL (Re-edited) Bible (BSI)

Tola ngo Jair

¹ Abimelek thiu Issacharmi Dodo nu, Puah nu Tola no Israelmi xaluni ke ipeghi. Pa ye Ephraim tokukujo lo Shamir lo xüache.

² Pa no ampe muku küthü Israelmi shou xaküthau shi. Tishino pa ye thive eno Shamir lo qhove.

³ Pa thiu Gileadmi Jair ipeghi eno ampe muku kini Israelmi shou xaküthau shilu.

⁴ Pa ye anu 30 ache, panongu ye khurha 30 sasü iqhoiqi che, Gilead lo mishighüna shighi Havvoth-jair ipikeu ache eno ishi kutolo aje tishi kuchephi.

⁵ Tishino Jair ye thive eno Kamon lo qhove.

Aghokulukumo eno Aghime

⁶ Itaghi Israelmi no Alhou zülo küsakügha shino Baal ngo Ashtaroth, Syriami, Sidonmi, Moabmi, Ammonmi, eno Philistiami lhouqo mllau khaveno Ampeu pheve no Pa huthu move.

⁷ Ikehu Ampeu no Israelmi shou amloideve no Philistiami ngo Ammonmi pelo panongu qhasü luvepe.

⁸ Tipa mpe lo panongu no Israelmi ghimeqhi. Eno Ampe chighitache kutolo panongu no Israelmi khunoqo Gilead ghakhu Jordan hechesü Amorimi ghakhu lo ache keno tipaqo nedaqoda ghimeqhi che.

⁹ Ammonmi no Jordan kathasü ikuno Judah ngo Benjamin eno Ephraim laghaqo sasü aghü shiche eno tino shishe Israelmi kijipüsa tsüche.

¹⁰ Ikehu Israelmi no Ampeu lau ighamku pi, “Ningu no O zülo küsakügha shivae, kughengu nino ni Lhou pheve no Baal mllauve ke.”

¹¹ Ampeu no panongu vilo pi, “Ni ye Egyptmi, Amorimi, Ammonmi, Philistiami launo nongu xaluke kumo keshea?

¹² Sidonmi ghi eno Amalekmi ngo Maonmi no nongu ghimeqhi kelo, nongu no I lau ighamku eno I no nongu xaphelue.

¹³ Ikeghi nongu no I pheve no alhou kütau mllauve, tighenguno Ni ye nongu xaphe moae.

¹⁴ Wuno nongu no kisheluve keu lhouqo lau ighamku khulo. Panongu pelo nongu no aghime shi akelo xaphelu pelo.”

¹⁵ Ikemu Israelmi no Ampeu vilo pi, “Ningu no küsakügha shivae. Tighenguno Nono ni lau kiu shinishi ani keno shilo, ikemu kimiyeno ishi tsala lono ningu xaphelu tsülo.”

¹⁶ Tishino panongu no inami lhouqo ikhipe peve no Ampeu mlla; ikelo Ampeu no Israelmi ghime jupe kutuu mlave.

¹⁷ Tithiu Ammonmi ghüshimi no aghü shinike Gilgal lo aghazü shive. Israelmi ghi kümtsa kumqo no Gilead lo Mizpah lo aghazü shiluve.

¹⁸ Tileno timiqo ngo Gilead lo sakiphemi no lakhino lakhi vilo pikile, “Timi khuu no Ammonmi sasü aghü shithuni kea? Timi tipau huno Gilead lo xüküami kümtsü shou akütsü shiniae.”