XAKUTHAMI 1 - Sumi Naga CL (Re-edited) Bible (BSI)

Ishokibe Canaan Le

¹ Joshua thive kethiu, Israelmi no Ampeu vilo iniju, “Ningu dolo khuu paghino iqho no Canaan leni kea?”

² Ampeu no khochile, “Judah paghino iqho nani. Julo, I no aghakhu pa u lo süve tsüae.”

³ Judah no pa thiküzüu Simeon vilo pi, “Ayeghi kothape I tsü püakeu kutolo I gholo iqhoghi lo eno kümtsa küqhano Canaanmi sasü aghü shini. Titoi ni ghi o sasü ayeghi kothape o tsü püakeu kutolo wuni.” Ikehu Simeon no pa sasü wue.

⁴ Tishino Judah no iqho eno Ampeu no Canaanmi ngo Perizimi panongu u lo süvetsü, eno panongu no Bezek lo timi 10,000 theqhive.

⁵ Panongu no Bezek lo Adoni-bezek phulu no pa sasü aghüshi eno Canaanmi ngo Perizimi theqhive.

⁶ Adoni-bezek ye pove kemu panongu no hawo pa küghaluve no pa uloqu eno pa pukhu loquqo micheve tsü.

⁷ Tileno Adoni-bezek no pi, “Kükami pano 70 auloqu ngo apukhuloqu ghithave kemi no I no ilhu cheke-a lo ikiqive keqo kiche chuche. I no panongu lau mlake toi itehi ye Alhou no I lau mlavae.” Eno panongu no pa sasü Jerusalem lo ighi no pa ye tilauno thive.

⁸ Judah timiqo no Jerusalem leluve eno azütakikihi pesü tile küami heqhive no mishighüna lo ami süvetsü.

⁹ Tithiu Judah timiqo no Negeb ato yeghi lo eno aqa yeghi lo Canaanmi küghüna chekeqo sasü aghü shinike iqive.

¹⁰ Judah no Canaanmi Hebron lo küghüna chekeqo sasü aghüshi no Sheshai, Ahiman eno Talmai laghaqo theqhive (Hebron ye inahuu ye Kiriath-arba ipi kucheghi).

¹¹ Tilau no panongu no Debir phughi lo xüküami sasü aghüshi. Debir ye inahuu ye Kiriath-sepher ipi kucheghi.

¹² Ikelo Caleb no pi, “Timi khuu no Kiriath-sepher leluni keno, I no I nga Achsah sasü külakupu shi penike tsüni.”

¹³ Caleb thiküzüu ayitiu Kenaz nu, Othniel no aphughi hu leluve eno kuchono Caleb no pa nga Achsah pesü pa nipu shi penike tsüve.

¹⁴ Kughou li no Othniel lau ighi keno, li no li papu vilo alu lakhi khulepi pa kite. Li no liw khurha lono iqighi no Caleb no vilo pi, “No ye kiu lunishi ani kea?”

¹⁵ Li no khochile, “Kükümgha I tsülo, nono Negeb yeghi lo I puwuve akeke azüpuki ghi I tsülo.” Tighenguno Caleb no lashou eno chhiliu azüpuki akeu pesü li tsüve.

¹⁶ Moses pangu Kenimi kughukomi ghi Judah timiqo gholono, Amsabo phughi lono Negeb lo Arad phivilo, Judah sayeqha kutolo iqho eno tilau küghünauve.

¹⁷ Judah no pa thiküzüu Simeon sasü wuno Zephath lo Canaanmi küghüna akemi theqhive eno aphughi tipau kütsave tsü. Ikehu aphughi tipau pesü Hormah kuvetsü.

¹⁸ Judah no Gaza, Ashkelon, eno Ekron tokukujo kümtsü qhasü luve.

¹⁹ Ampeu no Judah gholo akehu pa no ato ghakhu kümtsü qhasü luve ikemu aqa lo küghüna akeqo ye haphe mlave kughengu tipaqo ye ayi no mlakeu khurkuluqo acheke.

²⁰ Moses no azah tsüke toi Hebron pesü Caleb tsüve eno pa no Anak nu pano küthü tile küghüna chekemi hapheve.

²¹ Ikemu Benjaminmi ye Jebusimi Jerusalem lo küghüna akemi haphe move, ikehu Jebusimi ye Benjaminmi sasü ishi kutolo kümtsa xü cheni.

²² Joseph laghami ghi Bethel lo küghüna akemi sasü aghü shinike iqho eno Alhou no panongu sacheke.

²³ Joseph laghami no Bethel lo pukujumi puwu (aphughi hipau ye inahuu ye Luz ipiche.)

²⁴ Pukujumi no timi lakhi aphughi lono ipe cheghi keu ithulu kehu pa vilo pi, “Kimiyeno aphughi lo iloni keu la ningu piyelo, tishi aye nino o ghime monani.”

²⁵ Pa no aphughi lo ikulo la panongu piyeve. Eno panongu no azütakikihi pesü aphughi kütsave kemu timi tipau eno pa bolomi ye wuvepe.

²⁶ Timi huno Hittimi yeghi lo wuve eno tilau mishighüna lakhi shiqhe no Luz ipi kuvetsü. Ti ye ishi kutolo tishi ku chephi.

Qhasü Khamlave keqo

²⁷ Manasseh lagha no Beth-shean, Taanach, Dor, Ibleam, momu Megiddo eno ti sükümxa lo aphu akeqo lo küghüna akeqo haphe move, kughengu Canaanmi tipaqo no tishi küghüna auve ke.

²⁸ Kughou Israelmi no mtotoive keno, panongu no Canaanmi pesü anguka lono akümla shipe ikemu lotoshi haphe move.

²⁹ Ephraim lagha no Gezer phughi lo Canaanmi akeqo haphe move, ikehu Canaanmi no panongu gholo kümtsa tile küghünauve.

³⁰ Zebulun lagha no Kitron ngo Nahalol phughi lo küghüna akemi haphe move, ikehu Canaanmi no panongu gholo küghünauve, ikemu anguka lono akümlami shipe che.

³¹ Asher ghi Acco, Sidon, Ahlab, Achzib, Helbah, Aphik eno Rehob phughiqo lo küghüna akemi haphe move.

³² Ikehu Asher lagha no aghakhu lo küxümi Canaanmi sasü küghünauve, kughengu panongu no hupaqo haphe moveke.

³³ Naphtali ghi Beth-shemesh ngo Beth-anath lo küghüna akemi haphe move. Ikehu panongu no tile küxümi Canaanmi sasü küghünauve, ikemu Beth-shemesh ngo Beth-anath phughi lo Canaanmi pesü anguka lono panongu kümla shipeche.

³⁴ Amorimi no Dan laghami mjochilesü atoghiu puqhove eno pano pelo aqa lo küghüna nike iqighi pemove.

³⁵ Amorimi ye Heres Toghi, Aijalon, eno Shaalbim lo küghüna ache ikemu Joseph limi no akumto shi panongu qhasüve no anguka lono pano kümla shipe.

³⁶ Amorimi ghuthu ghiphi ye Akrabbim kita lo Sela lono ahuu iqho keu kutolo ke.