Titus 3 - Sumi Naga CL (Re-edited) Bible (BSI)

Akümla Kivi Ghenguno Kutolo

¹ Yepemi ngo kükagha kipemi qhoqhü penike panongu ghutu lo, aghokulu shino akümla kivi shinike kutolo pilo.

² Khuu vilomu atsa lhoksa pipe kevi, mtomshu pekevi, ikemu kümtsü lau mtshaivü no akhuaye kivi piye pelo.

³ Kughengu ghuthu lakhi lo ningu ampi ghi mbomzü, aghelumo kemi, pishikiqhimi, eno ashiaji lo kimne jeli qemi shiche, eno timi kiphikumo, anhekushu lono kütami kimthipu eno lakhi no lakhi mithi keu lono ningu do puwovae.

⁴ Ikemu kughou ni Xakuluu Alhouw akivi eno iqemokeu kikimiye ipeghi keno,

⁵ Pa no ningu xalue, ti ye nino amikucho kümla shikeu lono kumoe, ikemu Paw kimiyekini vecheo Aghungu Kimthe no qhukimthe pe punu kithe eno akithe shitsüe,

⁶ eno Jisü Khristo ni Xakuluu vecheo Pa no Aghungu Kimthe kupukuno shi ni shou lepuku tsü,

⁷ tishikeu lono Paw küpükini vecheo ningu pesü achipikalupe no lhokta küxü lajupu lo amheghi kiyighimi shilu peke.

⁸ Akipitsa hi ye ameküapue, ni ye o pelo hipaqo pikichichi apenishi ani, tishikeu lono khunono Alhou pülüluve akeno panongu pelo tsaqüi akümla kivi lo amlotsü penishi ani. Hipaqo ye timi ghenguno akighiche eno ala shikulupu anike.

⁹ Ikemu mbomzü shi kütsala keu, laghaphi, kimpikile keu, eno Ayezah ghenguno mtomshu keu, hipaqo ye ala shimo eno ame kühake hipaqo lono putosüve lo.

¹⁰ Timi khuu no kijetha niye xukuthoni keno, ghuthu lakhi eno akiniu pa ghutu lo, tithiu ye kiu lomu pa akhoto shikevilo,

¹¹ titoi kemi ye sabideve kemi eno axinemie pi ithive lo, pa ye pa ampi kileqhivae.

Kishekha Petha

¹² Kughou I no Artemas momu Tychicus o lau puwuni keno, no ye Nicopolis lo ighini keu pükapütsa lo, kughengu ni ye süsü tusho ye tileno puwoni ke xathavae.

¹³ No ye pükapütsa no ayezah kighithiu Zenas eno Apollos pama ghüzüla lo tomove keu shi pemoni ke kuphu puwulo.

¹⁴ Niw timiqo pelo amlo tsüqhiyi akümla kivi shikalu pelo, tishikeu lono avehu küküha küxü xümono avehupu shikütü akemi kuphulu peni.

¹⁵ I gholo akemi kümtsü no petha o tsü puwu ani. Aküpülü lono ni kimiye chekemi lau petha tsü ani. Nongu kümtsü gholo küpükini apeniu.